ᠱᠠᠩᠨᠠᠯ ᠬᠦᠷᠲᠡᠭᠴᠢ ᠲᠣᠰᠬᠠᠢ ᠡᠷᠦᠬᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/3
    ᠰᠣᠷᠭᠠᠭᠤᠯᠢ ᠡᠬᠢᠯᠡᠬᠦ ᠠᠴᠠ ᠡᠮᠦᠨ᠎ᠡ ᠪᠢᠯᠡ᠂ ᠬᠤᠢ ᠽᠢ ᠶᠢᠨ ᠯᠢᠩ ᠢ ᠳᠠᠭᠠᠭᠤᠯᠵᠣ᠂ ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ ᠠᠴᠠ ᠪᠢᠴᠢᠭ ᠤᠨ ᠪᠣᠭᠴᠣ ᠬᠤᠳᠠᠯᠳᠣᠨ ᠠᠪᠴᠣ ᠦᠩᠭᠡᠷᠡᠭᠰᠡᠨ ᠶᠤᠮ᠃ ᠶᠢᠨ ᠯᠢᠩ ᠤᠨ ᠪᠢᠴᠢᠭ ᠤᠨ ᠪᠣᠭᠴᠣ ᠶᠢ ᠵᠢᠯ ᠪᠣᠯᠭᠠᠨ ᠨᠢᠭᠡ ᠰᠣᠯᠢᠳᠠᠭ᠂ ᠬᠠᠮᠤᠭ ᠤᠨ ᠬᠢᠮᠳᠠ ᠳᠤ ᠪᠠᠨ ᠲᠠᠪᠢ ᠭᠠᠷᠣᠢ ᠵᠣᠭᠤᠰ ᠤᠨ ᠪᠣᠭᠴᠣ ᠶᠢ᠂ ᠬᠠᠮᠤᠭ ᠤᠨ ᠦᠨᠡᠳᠡᠢ ᠠᠴᠠ ᠨᠢ ᠵᠠᠭᠤ ᠭᠠᠷᠤᠢ ᠵᠣᠭᠤᠰ ᠤᠨ ᠪᠣᠭᠴᠣ ᠶᠢ ᠪᠦᠷ ᠬᠤᠳᠠᠯᠳᠣᠨ ᠠᠪᠴᠣ ᠦᠩᠭᠡᠷᠡᠪᠡ᠃ ᠲᠠᠪᠢ ᠭᠠᠷᠣᠢ ᠵᠣᠭᠤᠰ ᠤᠨ ᠬᠢ ᠨᠢ ᠬᠡᠳᠦ᠋ᠢᠪᠡᠷ ᠬᠢᠮᠳᠠ ᠪᠣᠯᠪᠠᠴᠣ ᠬᠡᠷᠡᠭᠯᠡᠬᠦ ᠬᠤᠭᠤᠴᠠᠭ᠎ᠠ ᠨᠢ ᠬᠠᠷᠢᠨ ᠦᠨᠡᠳᠡᠢ ᠪᠣᠭᠴᠣ ᠶᠢᠨ ᠬᠠᠭᠠᠰ ᠬᠢᠷᠢ ᠪᠠᠰᠠ ᠦᠬᠡᠢ᠂ ᠬᠡᠷᠡᠭᠯᠡᠭᠡᠳ ᠢᠷᠡᠪᠡᠯ᠂ ᠣᠭᠤᠰᠣᠷ  ᠨᠢ ᠲᠠᠰᠣᠷᠠᠬᠤ ᠦᠬᠡᠢ ᠪᠣᠯ᠂ ᠲᠠᠲᠠᠭᠤᠷ ᠨᠢ ᠡᠪᠳᠡᠷᠡᠳᠡᠭ᠂ ᠨᠢᠭᠡᠨ ᠤᠳᠠᠭ᠎ᠠ ᠢᠷᠣᠭᠠᠷ ᠨᠢ ᠪᠦᠷ ᠣᠨᠠᠴᠢᠬᠠᠯ᠎ᠠ᠃     ᠶᠢᠨ ᠯᠢᠩ ᠲᠡᠭᠦᠨ ᠢᠶᠠᠨ ᠡᠭᠦᠷᠦᠭᠡᠳ ᠶᠡᠭᠡ ᠵᠡᠭᠡᠯᠢ ᠪᠠᠷ ᠠᠯᠬᠤᠯᠠᠵᠤ ᠶᠠᠪᠣᠳᠠᠯ᠎ᠠ᠂ ︽ᠬᠤᠸᠠᠷ︾ ᠬᠢᠨ ᠳᠣᠣᠭᠠᠷᠴᠣ᠂ ᠪᠦᠬᠦ᠋ᠢᠯᠡ ᠬᠢᠴᠢᠶᠡᠯ ᠤᠨ ᠪᠢᠴᠢᠭ᠂ ᠪᠢᠴᠢᠭ ᠤᠨ ᠬᠡᠷᠡᠭᠰᠡᠯ ᠨᠢ ᠶᠠᠭ ᠯᠡ ᠬᠤᠭ ᠭᠡᠭᠡᠬᠦ ᠮᠠᠰᠢᠨ ᠤ ᠶᠡᠭᠡ ᠣᠳᠬᠤᠭᠤᠷ ᠠᠴᠠ ᠪᠠᠶᠢᠭᠤᠯᠵᠣ ᠢᠷᠡᠭᠰᠡᠨ ᠮᠡᠲᠦ ᠭᠠᠵᠠᠷ ᠳᠦᠭᠦᠷᠡᠩ ᠰᠠᠴᠣᠭᠳᠠᠪᠠ᠃ ᠵᠡᠭᠡᠯᠢ ᠳᠡᠭᠡᠷ᠎ᠡ ᠠᠭᠱᠠᠨ ᠵᠠᠭᠤᠷᠠᠯᠳᠣᠨ ᠬᠢᠴᠢᠶᠡᠯ ᠤᠨ ᠪᠢᠴᠢᠭ᠂ ᠪᠢᠴᠢᠭ ᠤᠨ ᠬᠡᠷᠡᠭᠰᠡᠯ ᠤᠨ ᠵᠢᠵᠢᠭ ᠬᠤᠳᠠᠯᠳᠤᠭ᠎ᠠ ᠳᠡᠯᠭᠡᠭᠳᠡᠨ᠂ ᠶᠢᠨ ᠯᠢᠩ ᠢ ᠪᠠᠯᠠᠮᠠᠭᠳᠠᠭᠤᠯᠪᠠ᠃ ᠨᠢᠭᠤᠷ ᠪᠠᠷᠠᠬᠤ ᠨᠢ ᠴᠦ ᠶᠠᠭᠠᠬᠢᠮᠠᠢ᠂ ᠬᠠᠮᠤᠭ ᠤᠨ ᠬᠤᠷᠣᠰᠣᠯᠲᠠᠢ ᠨᠢ ᠰᠢᠨ᠎ᠡ ᠲᠠᠷᠬᠠᠭᠠᠭᠰᠠᠨ ᠬᠢᠴᠢᠶᠡᠯ ᠤᠨ ᠪᠢᠴᠢᠭ ᠨᠢ ᠵᠠᠮ ᠤᠨ ᠬᠠᠵᠠᠭᠤ ᠶᠢᠨ ᠯᠠᠭ ᠰᠢᠪᠠᠷ ᠲᠤ ᠪᠤᠵᠠᠷᠲᠣᠭᠠᠳ ᠠᠪᠬᠤ ᠶᠢᠨ ᠳᠠᠮᠳᠤᠭ ᠦᠬᠡᠢ ᠪᠣᠯᠵᠤᠭ᠂ ᠠᠦ᠋ᠲ᠋ᠣᠮᠠᠳ᠋ᠴᠢᠯᠠᠭᠰᠠᠨ ᠬᠠᠷᠠᠨᠳᠠ ᠶᠢᠨ ᠳᠣᠳᠣᠷᠠᠬᠢ ᠲᠤᠭᠤᠯᠭ᠎ᠠ ᠨᠢ ᠪᠦᠷ ᠲᠠᠰᠣᠷᠠᠵᠤ᠂ ᠪᠣᠯᠣᠳ ᠪᠢᠷ ᠤᠨ ᠬᠢ ᠨᠢ ᠦᠵᠦᠭ ᠨᠢ ᠮᠣᠯᠳᠣᠷᠠᠵᠠᠢ᠃ ᠶᠢᠨ ᠯᠢᠩ ᠨᠠᠪᠳᠠᠷᠬᠠᠢ ᠪᠣᠭᠴᠣ ᠪᠠᠷ ᠢᠶᠠᠨ ᠨᠢᠭᠡ ᠶᠡᠭᠡ ᠣᠪᠣᠭ᠎ᠠ ᠶᠠᠭᠤᠮ᠎ᠠ ᠪᠠᠨ ᠪᠠᠭᠴᠠᠯᠠᠵᠤ ᠠᠪᠣᠭᠠᠳ᠂ ᠳᠠᠭᠤ ᠲᠠᠯᠪᠢᠨ ᠣᠬᠢᠯᠠᠭᠰᠠᠭᠠᠷ ᠬᠠᠷᠢᠭᠰᠠᠨ ᠪᠢᠯᠡ᠃ ᠬᠤᠵᠢᠮ ᠨᠢ ᠬᠠᠰᠢ ᠯᠡ ᠬᠤᠢ ᠽᠢ ᠰᠣᠨᠢᠨ ᠳᠡᠭᠡᠷ᠎ᠡ ᠲᠠᠨᠢᠯᠴᠠᠭᠤᠯᠣᠭᠰᠠᠨ ᠠᠷᠭ᠎ᠠ ᠶᠢ ᠲᠣᠷᠰᠢᠨ ᠬᠡᠷᠡᠭᠯᠡᠵᠦ᠂ ᠨᠦᠢᠲᠠᠨ ᠵᠦᠯᠭᠦᠭᠦᠷ ᠪᠥᠰ ᠢᠶᠠᠷ ᠬᠢᠴᠢᠶᠡᠯ ᠤᠨ ᠪᠢᠴᠢᠭ ᠢ ᠨᠠᠷᠢᠨ ᠨᠢᠮᠪᠠᠢ ᠵᠦᠯᠭᠦᠨ ᠴᠡᠪᠡᠷᠯᠡᠭᠡᠳ᠂ ᠬᠦᠯᠳᠡᠭᠡᠭᠦᠷ ᠲᠤ ᠠᠪᠠᠴᠢᠵᠤ ᠲᠠᠯᠪᠢᠨ ᠴᠢᠬᠢᠭ ᠲᠤ ᠨᠢ ᠬᠠᠲᠠᠭᠠᠭᠰᠠᠨ ᠠᠴᠠ ᠰᠠᠶ᠋ᠢ ᠬᠢᠴᠢᠶᠡᠯ ᠤᠨ ᠪᠢᠴᠢᠭ ᠤᠨ ᠣᠣᠯ ᠬᠡᠪ ᠰᠢᠨᠵᠢ ᠶᠢ ᠨᠢ ᠡᠪᠳᠡᠭᠰᠡᠨ ᠦᠬᠡᠢ ᠪᠠᠶᠢᠯ᠎ᠠ᠃ ᠡᠭᠦᠨ ᠠᠴᠠ ᠬᠤᠶᠢᠰᠢ᠂ ᠬᠤᠢ ᠽᠢ ᠶᠢᠨ ᠯᠢᠩ ᠳᠤ ᠬᠢᠮᠳᠠ ᠪᠠᠷᠠᠭ᠎ᠠ ᠬᠤᠳᠠᠯᠳᠣᠨ ᠠᠪᠴᠣ ᠥᠭᠬᠦ ᠪᠠᠨ ᠪᠣᠯᠢᠭᠰᠠᠨ ᠶᠤᠮ᠃    ᠬᠤᠢ ᠽᠢ ᠶᠢᠨ ᠪᠣᠳᠣᠬᠤ ᠪᠠᠷ᠂ ᠡᠮᠦᠨ᠎ᠡ ᠨᠢ ᠪᠢᠳᠡᠨ ᠢ ᠪᠢᠴᠢᠭ ᠦᠵᠡᠵᠦ ᠪᠠᠶᠢᠭ᠎ᠠ ᠦᠶᠡᠰ᠂ ᠪᠢᠴᠢᠭ ᠤᠨ ᠪᠣᠭᠴᠣ ᠪᠠᠨ ᠪᠠᠭ᠎ᠠ ᠰᠣᠷᠭᠠᠭᠤᠯᠢ ᠠᠴᠠ ᠳᠣᠮᠳᠠᠳᠣ ᠰᠣᠷᠭᠠᠭᠤᠯᠢ ᠪᠣᠯᠲᠠᠯ᠎ᠠ ᠭᠡᠷᠡᠭᠯᠡᠭᠰᠡᠨ ᠴᠦ ᠡᠪᠳᠡᠷᠡᠳᠡᠭ ᠦᠬᠡᠢ ᠰᠢᠳᠡ︕ ᠲᠠᠬᠢᠨᠲᠠ ᠨᠢᠭᠡ ᠪᠣᠳᠣᠭᠠᠳ ᠰᠠᠶ᠋ᠢ ᠣᠬᠠᠭᠠᠨ ᠶᠢ ᠨᠢ ᠣᠯᠪᠠ᠄ ᠦᠩᠭᠡᠷᠡᠭᠰᠡᠨ ᠳᠤ ᠲᠠᠷᠬᠠᠭᠠᠳᠠᠭ ᠨᠢ ᠵᠦᠪᠬᠡᠨ ᠬᠡᠯᠡ ᠪᠢᠴᠢᠭ᠂ ᠲᠤᠭ᠎ᠠ ᠪᠣᠳᠣᠯᠭ᠎ᠠ ᠬᠤᠶᠠᠷᠬᠠᠨ ᠨᠣᠮ᠂ ᠪᠢᠴᠢᠭ ᠤᠨ ᠪᠣᠭᠴᠣ ᠪᠠᠨ ᠡᠭᠦᠷᠦᠭᠡᠳ ᠶᠠᠪᠣᠪᠠᠯ ᠬᠥᠪ ᠬᠦᠩᠭᠡᠬᠡᠨ ᠪᠠᠶᠢᠵᠤ ᠨᠢᠰᠦᠨ ᠳᠡᠪᠳᠡᠷᠢᠮᠡᠷ ᠰᠠᠨᠠᠭᠳᠠᠨ᠎ᠠ᠂ ᠬᠠᠨᠠᠰᠠ ᠡᠪᠳᠡᠷᠡᠬᠦ ᠶᠤᠮ ᠪᠢᠯᠡ᠃ ᠪᠢᠴᠢᠭ ᠤᠨ ᠪᠣᠭᠴᠣ ᠶᠢᠨ ᠯᠠᠩᠭᠦᠢ ᠳᠡᠭᠡᠷ᠎ᠡ ᠦᠨᠡᠬᠡᠷ ︽ᠶᠢᠰᠦᠨ ᠦᠩᠭᠡ ᠪᠠᠷ ᠰᠣᠯᠣᠩᠭᠠᠷᠠᠨ᠎ᠠ︾᠂ ᠲᠣᠭᠠᠯᠠᠵᠣ ᠦᠵᠡᠪᠡᠯ᠂ ᠵᠠᠭᠤ ᠭᠠᠷᠣᠢ ᠵᠦᠢᠯ ᠦᠬᠡᠢ ᠭᠡᠰᠡᠨ ᠴᠦ ᠲᠠᠪᠢ ᠭᠠᠷᠣᠢ ᠵᠦᠢᠯ ᠪᠠᠷᠳᠠᠭ᠎ᠠ ᠪᠠᠷ ᠪᠣᠢ᠃ ᠶᠢᠨ ᠯᠢᠩ ᠬᠤᠨᠳᠠᠨ ᠣᠯᠠᠭᠠᠨ ᠦᠩᠭᠡ ᠪᠠᠷ ᠴᠢᠮᠡᠭᠯᠡᠭᠰᠡᠨ ᠪᠢᠴᠢᠭ ᠤᠨ ᠪᠣᠭᠴᠣ ᠶᠢ ᠦᠵᠡᠵᠦ ᠲᠣᠭᠤᠯ᠎ᠠ᠃ ᠡᠨᠡ ᠪᠣᠭᠴᠣ ᠶᠢᠨ ᠬᠢᠴᠡ ᠨᠢ ᠦᠨᠡᠬᠡᠷ ᠨᠠᠷᠢᠨ ᠰᠠᠶᠢᠬᠠᠨ᠂ ᠦᠵᠡᠭᠦᠯᠡᠷ ᠪᠦᠬᠡ ᠮᠦᠷᠲᠡᠭᠡᠨ ᠬᠡᠷᠡᠭᠯᠡᠬᠦ ᠳᠤ ᠳᠠᠭᠠᠭᠠᠴᠠᠳᠠᠢ᠂ ᠳᠣᠮᠳᠠᠳᠣ ᠭᠠᠳᠠᠭᠠᠳᠣ ᠶᠢᠨ ᠬᠠᠮᠲᠣᠷᠠᠨ ᠪᠡᠯᠡ ᠣᠷᠣᠭᠤᠯᠵᠣ ᠦᠢᠯᠡᠳᠪᠦᠷᠢᠯᠡᠭᠰᠡᠨ ᠪᠦᠳᠦᠭᠡᠭᠳᠡᠬᠦᠨ ᠪᠠᠶᠢᠯ᠎ᠠ᠃ ᠬᠤᠢ ᠽᠢ ᠦᠨ᠎ᠡ ᠶᠢ ᠨᠢ ᠠᠰᠠᠭᠤᠭᠰᠠᠨ ᠳᠤ᠂ 140 ᠭᠡᠨ᠎ᠡ᠃ ᠬᠤᠢ ᠽᠢ ᠰᠣᠨᠣᠰᠣᠭᠠᠳ ᠳᠣᠳᠣᠷ᠎ᠠ ᠨᠢ ᠬᠦᠢᠲᠡ ᠣᠷᠬᠢᠯ᠎ᠠ᠃    ᠯᠠᠩᠭᠦᠢ ᠶᠢᠨ ᠲᠡᠷᠭᠡᠳᠡᠬᠢ ᠳᠣᠮᠳᠠ ᠨᠠᠰᠤᠨ ᠤ ᠪᠠᠷᠠᠭ᠎ᠠ ᠬᠤᠳᠠᠯᠳᠣᠭᠴᠢ ᠣᠪᠣᠷ ᠡᠶᠡᠯᠳᠡᠭ᠂ ᠢᠨᠢᠶᠡᠮᠰᠦᠭ ᠨᠢᠳᠦ  ᠲᠠᠢ᠂ ᠬᠡᠯᠡᠵᠦ ᠶᠠᠷᠢᠬᠤ ᠳᠤ ᠪᠠᠨ ᠴᠢᠳᠠᠮᠠᠭᠠᠢ ᠪᠠᠶᠢᠵᠤ᠂ ᠶᠢᠨ ᠯᠢᠩ ᠪᠢᠴᠢᠭ ᠤᠨ ᠪᠣᠭᠴᠣ ᠶᠢ ᠲᠣᠨᠣᠷᠠᠳᠠᠯ᠎ᠠ ᠰᠢᠷᠳᠡᠵᠦ ᠪᠠᠶᠢᠬᠤ ᠶᠢ ᠬᠠᠷᠠᠭᠠᠳ᠂ ᠳᠠᠷᠦ᠋ᠢᠬᠠᠨ ᠨᠢᠭᠡ ᠶᠢ ᠠᠪᠴᠣ᠂ ᠬᠠᠯᠠᠭᠤᠨ ᠳᠣᠳᠣᠨᠣᠰᠤᠭ ᠢᠶᠠᠷ ᠶᠢᠨ ᠯᠢᠩ ᠢ ᠡᠭᠦᠷᠴᠦ ᠦᠵᠡᠬᠦ ᠶᠢ ᠱᠠᠭᠠᠷᠳᠠᠪᠠ᠃ ᠶᠢᠨ ᠯᠢᠩ ᠡᠭᠦᠷᠬᠦ ᠲᠠᠢ ᠵᠡᠷᠭᠡ᠂ ᠶᠠᠭᠠᠬᠢᠨ ᠲᠠᠯᠪᠢᠬᠤ ᠪᠢᠯᠡ︖ ᠬᠡᠳᠦ᠋ᠢᠪᠡᠷ ᠠᠮᠠᠨ ᠳᠡᠭᠡᠷ᠎ᠡ ᠪᠠᠨ ᠬᠡᠯᠡᠬᠦ ᠦᠬᠡᠢ ᠪᠣᠯᠪᠠᠴᠣ᠂ ᠨᠢᠳᠦᠨ ᠳᠣᠳᠣᠷ᠎ᠠ ᠪᠠᠨ ᠮᠡᠯᠮᠡᠷᠡᠲᠡᠯ᠎ᠡ ᠬᠦᠰᠡᠨ ᠪᠠᠶᠢᠭ᠎ᠠ ᠪᠢᠯᠡ᠃    ᠬᠤᠢ ᠽᠢ᠄ ︽ᠳᠡᠩᠳᠡᠭᠦᠦ ᠦᠨᠡᠲᠡᠢ ᠪᠠᠶᠢᠨ᠎ᠠ︾ ᠭᠡᠵᠦ ᠲᠦᠳᠦᠨᠡᠪᠡ᠃    ᠪᠠᠷᠠᠭ᠎ᠠ ᠬᠤᠳᠠᠯᠳᠤᠬᠴᠢ᠄ ︽ᠬᠢᠷᠢ ᠵᠡᠷᠭᠡ ᠵᠣᠭᠤᠰ ᠪᠣᠯ ᠳᠡᠳᠦᠢ ᠵᠡᠷᠭᠡ ᠪᠠᠷᠠᠭ᠎ᠠ ᠭᠡᠳᠡᠭ ᠰᠢᠦ ᠳ᠋ᠠ︕ ᠡᠨᠡ ᠬᠦ ᠪᠣᠭᠴᠣ ᠶᠢ ᠪᠢᠳᠡ ᠬᠡᠳᠦᠨ ᠵᠠᠭᠤ ᠣᠷᠣᠭᠤᠯᠣᠭᠠᠳ ᠬᠡᠳᠦᠨ ᠡᠳᠦᠷ ᠪᠣᠯᠣᠭᠰᠠᠨ ᠦᠬᠡᠢ ᠬᠤᠳᠠᠯᠳᠣᠭᠠᠳ ᠪᠠᠷᠠᠴᠢᠠᠬᠯ᠎ᠠ᠃ ᠦᠵᠡᠭᠡᠴᠢ᠂ ᠬᠡᠳᠦᠢ ᠪᠦᠬᠡ ᠪᠣᠢ᠂ ᠬᠡᠷᠡᠭᠯᠡᠬᠦ ᠳᠤ ᠳᠠᠭᠠᠭᠠᠴᠠᠳᠠᠢ ᠰᠢᠦ︕ ᠬᠡᠦᠭᠡᠳ ᠡᠭᠦᠷᠦᠭᠡᠳ ᠶᠠᠪᠣᠬᠤ ᠳᠤ ᠬᠡᠳᠦᠢ ᠴᠤᠭ ᠵᠣᠯᠪᠣᠭ᠎ᠠ ᠲᠠᠢ ᠪᠣᠢ︕︾ ᠭᠡᠰᠡᠨ ᠢᠶᠠᠨ ᠬᠤᠢ ᠽᠢ ᠶᠢᠨ ᠮᠦᠨ ᠬᠦ ᠡᠷᠡᠭᠡᠯᠵᠡᠵᠦ ᠪᠠᠶᠢᠭ᠎ᠠ ᠶᠢ ᠬᠠᠷᠠᠭᠠᠳ᠂ ᠵᠦᠭᠡᠯᠡᠨ ᠡᠶᠡᠯᠰᠡᠭ ᠢᠶᠠᠷ ᠢᠳᠬᠠᠨ᠄ ︽ᠮᠠᠨ ᠤ ᠬᠤᠳᠠᠯᠳᠣᠭᠠᠨ ᠤ ᠲᠠᠯᠠᠪᠠᠢ ᠡᠨᠡ ᠬᠡᠳᠦᠨ ᠡᠳᠦᠷ ᠳᠡᠯᠭᠡᠭᠦᠷ ᠪᠠᠶᠢᠭᠤᠯᠣᠭᠳᠠᠭᠰᠠᠨ 40 ᠵᠢᠯ ᠤᠨ ᠣᠢ ᠪᠠᠨ ᠪᠡᠯᠭᠡᠯᠡᠬᠦ ᠪᠠᠷ ᠶᠠᠭ ᠳᠣᠮᠳᠠᠳᠣ ᠪᠠᠭ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠰᠣᠷᠣᠭᠴᠢᠳ ᠤᠨ ᠵᠣᠬᠢᠶᠠᠯ ᠤᠨ ᠣᠷᠣᠯᠳᠣᠭᠠᠨ ᠶᠠᠪᠣᠭᠳᠠᠭᠤᠯᠵᠣ ᠪᠠᠶᠢᠬᠤ ᠶᠤᠮ᠂ ᠬᠡᠦᠭᠡᠳ ᠢᠶᠠᠷ ᠢᠶᠠᠨ ᠵᠣᠬᠢᠶᠠᠯ ᠪᠢᠴᠢᠭᠦᠯᠦᠨ ᠲᠣᠷᠰᠢᠵᠤ ᠦᠵᠡᠭᠡᠷᠡᠢ᠃ ᠬᠡᠷᠪᠡ ᠱᠠᠩᠨᠠᠯ ᠣᠯᠴᠢᠬᠠᠪᠠᠯ᠂ ᠪᠢᠴᠢᠭ ᠤᠨ ᠪᠣᠭᠴᠣ ᠶᠢᠨ ᠵᠣᠭᠤᠰ ᠢ ᠨᠢ ᠣᠯᠣᠭᠠᠳ ᠠᠪᠴᠢᠷᠠᠴᠢᠬᠠᠬᠤ ᠪᠢᠰᠢ ᠦᠦ ︖︾ ᠭᠡᠪᠡ᠃    ᠬᠤᠢ ᠽᠢ ᠢᠨᠢᠶᠡᠰᠬᠢᠭᠡᠳ᠄ ︽ᠲᠡᠶᠢᠮᠦ ᠠᠮᠠᠷ ᠦᠦ ᠳ᠋ᠠ︖︾ ᠭᠡᠯ᠎ᠡ᠃    ︽ᠬᠡᠯᠡᠵᠦ ᠮᠡᠳᠡᠬᠦ ᠦᠬᠡᠢ᠂ ᠠᠵᠠ ᠬᠡᠢ ᠮᠣᠷᠢ ᠴᠢᠨᠢ ᠮᠠᠨᠳᠣᠪᠠᠯ᠂ ᠴᠢ ᠬᠤᠷᠢᠭᠯᠠᠵᠤ ᠪᠠᠰᠠ ᠳᠡᠶᠢᠯᠬᠦ ᠦᠬᠡᠢ ᠳ᠋ᠠ᠃︾    ᠬᠤᠢ ᠽᠢ ᠲᠡᠭᠦᠨ ᠲᠠᠢ ᠮᠡᠳᠭᠡᠭᠡᠳ ᠠᠷᠭ᠎ᠠ ᠦᠭᠡᠶᠢᠳᠡᠨ᠂ ᠬᠠᠰᠢ ᠯᠡ 140 ᠲᠦᠭᠦᠷᠢᠭ ᠢᠶᠠᠨ ᠵᠠᠷᠣᠴᠠᠭᠤᠯᠵᠣ ᠬᠤᠳᠠᠯᠳᠣᠨ ᠠᠪᠴᠠᠢ᠃ ᠡᠵᠢ ᠦᠬᠢᠨ ᠬᠤᠶᠠᠭᠤᠯᠠ ᠪᠠᠨ ᠠᠰᠠᠷ ᠠᠴᠠ ᠪᠠᠭᠤᠪᠠ᠂ ᠶᠡᠭᠡ ᠲᠠᠩᠬᠢᠮ ᠳᠤ ᠦᠨᠡᠬᠡᠷ ᠲᠡᠷᠡ ᠬᠦ ᠠᠯᠲᠠᠳᠠᠭᠰᠠᠨ ᠣᠯᠠᠭᠠᠨ ᠴᠠᠭᠠᠰᠤᠨ ᠳᠡᠭᠡᠷ᠎ᠡ ᠨᠠᠭᠠᠭᠰᠠᠨ ︽ᠵᠣᠬᠢᠶᠠᠯ ᠡᠯᠰᠡᠬᠦ ᠮᠡᠳᠡᠭᠳᠡᠯ︾ ᠢ ᠣᠯᠵᠣ ᠬᠠᠷᠠᠪᠠ᠂ ᠠᠭᠤᠯᠭ᠎ᠠ ᠨᠢ ᠳᠠᠷᠣᠢ ᠳᠣᠮᠳᠠᠳᠣ ᠪᠠᠭ᠎ᠠ ᠰᠣᠷᠭᠠᠭᠤᠯᠢ ᠶᠢᠨ ᠰᠣᠷᠣᠭᠴᠢᠳ ᠤᠨ ᠵᠣᠬᠢᠶᠠᠯ ᠤᠨ ᠣᠷᠣᠯᠳᠣᠭᠠᠨ ᠤ ᠣᠴᠢᠷ ᠠᠵᠢ᠂ ᠵᠣᠬᠢᠶᠠᠯ ᠤᠨ ᠠᠭᠤᠯᠭ᠎ᠠ ᠶᠢ ᠨᠢ ︽ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ︾  ᠲᠠᠢ ᠬᠤᠯᠪᠣᠭᠳᠠᠭᠰᠠᠨ ᠠᠯᠢᠪᠠ ᠪᠦᠬᠦᠨ ᠢᠶᠠᠷ ᠬᠢᠵᠠᠭᠠᠷᠯᠠᠵᠠᠢ᠃ ᠣᠯᠠᠨ ᠬᠦᠮᠦᠨ ᠬᠦᠷᠢᠶᠡᠯᠡᠨ ᠦᠵᠡᠵᠡᠭᠡᠵᠦ᠂ ᠶᠠᠮᠠᠷ ᠱᠠᠩᠨᠠᠯ ᠪᠠᠶᠢᠬᠤ ᠡᠰᠡᠬᠦ᠂ ᠡᠳ᠋ ᠪᠣᠳᠠᠰ ᠡᠰᠡᠬᠦᠯ᠎ᠡ ᠵᠣᠭᠤᠰ ᠪᠣᠯᠬᠤ ᠲᠣᠬᠠᠢ ᠲᠠᠭᠠᠯᠴᠠᠨ ᠬᠦᠦᠷᠨᠢᠯᠳᠦᠨ᠎ᠡ᠃     ᠶᠢᠨ ᠯᠢᠩ ᠡᠵᠢ ᠪᠠᠨ ᠡᠷᠬᠢᠨ ᠬᠠᠷᠠᠭᠠᠳ᠄ ︽ᠪᠢ ᠲᠣᠷᠰᠢᠨ ᠦᠵᠡᠵᠦ ᠪᠣᠯᠣᠨ᠎ᠠ︾ ᠭᠡᠪᠡ᠃    ᠬᠤᠢ ᠽᠢ ᠬᠠᠷᠢᠭᠤ ᠳᠤ ᠨᠢ᠄ ︽ᠶᠠᠷᠢᠶᠠᠨ ᠦᠬᠡᠢ ᠲᠣᠷᠰᠢᠵᠤ ᠪᠣᠯᠣᠨ᠎ᠠ᠂ ᠵᠣᠬᠢᠶᠠᠯ ᠪᠢᠴᠢᠬᠦ ᠶᠠᠪᠣᠳᠠᠯ ᠯᠡ ᠪᠢᠰᠢ ᠦᠦ︖︾ ᠭᠡᠨ᠎ᠡ᠃     ᠶᠢᠨ ᠯᠢᠩ ᠭᠡᠷ ᠲᠤ ᠪᠠᠨ ᠬᠠᠷᠢᠮᠠᠭᠴᠠ ᠳᠠᠷᠣᠢ ᠪᠢᠴᠢᠵᠦ ᠡᠬᠢᠯᠡᠪᠡ᠂ ᠭᠠᠷᠴᠠᠭ ᠨᠢ ︽ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ ᠨᠠᠮ᠎ᠠ ᠶᠢ ᠪᠠᠷᠠᠳᠠᠨ ᠦᠭᠡᠯᠡᠢ ᠪᠣᠯᠭᠠᠭᠰᠠᠨ ᠨᠢ︾ ᠪᠠᠶᠢᠯ᠎ᠠ᠃ ᠵᠣᠬᠢᠶᠠᠯ ᠳᠤ ᠪᠠᠨ ︽ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ︾ ᠤᠨ ᠡᠳ᠋ ᠪᠠᠷᠠᠭ᠎ᠠ ᠦᠨ᠎ᠡ ᠨᠢ ᠬᠢᠮᠳᠠ ᠭᠤᠶᠣ ᠰᠠᠶᠢᠬᠠᠨ᠂ ᠭᠡᠷ ᠳᠣᠳᠣᠷᠠᠬᠢ ᠪᠣᠢ ᠪᠦᠬᠦᠢ ᠬᠡᠷᠡᠭᠯᠡᠬᠦ ᠳᠤ ᠳᠠᠭᠠᠭᠠᠴᠠᠲᠠᠢ ᠡᠳ᠋ ᠲᠠᠸᠠᠷ ᠪᠣᠯᠣᠨ ᠴᠠᠬᠢᠯᠭᠠᠨ ᠬᠡᠷᠡᠭᠰᠡᠯ ᠤᠳ ᠢ ᠪᠦᠷ ︽ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ︾ ᠠᠴᠠ ᠬᠤᠳᠠᠯᠳᠣᠨ ᠠᠪᠣᠭᠰᠠᠨ ᠶᠤᠮ᠃ ᠵᠢᠯ ᠪᠣᠯᠭᠠᠨ ᠲᠡᠷᠡ ᠲᠦᠷᠦᠭᠰᠡᠨ ᠡᠳᠦᠷ ᠤᠨ ᠪᠠᠶᠠᠷ ᠢᠶᠠᠨ ᠪᠡᠯᠭᠡᠯᠡᠬᠦ ᠦᠶᠡᠰ᠂ ᠡᠵᠢ ᠨᠢ ᠪᠦᠷ ︽ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ︾ ᠲᠤ ᠣᠴᠢᠵᠤ ᠲᠡᠭᠦᠨ ᠳᠤ ᠪᠡᠯᠡᠭ ᠰᠡᠯᠲᠡ ᠰᠣᠩᠭᠤᠨ ᠥᠭᠳᠡᠭ᠂ ᠨᠢᠭᠡ ᠨᠠᠰᠤᠨ ᠤ ᠲᠦᠷᠦᠭᠰᠡᠨ ᠡᠳᠦᠷ ᠤᠨ ᠪᠠᠶᠠᠷ ᠢᠶᠠᠨ ᠪᠡᠯᠭᠡᠯᠡᠬᠦ ᠦᠶ᠎ᠡ ᠳᠤ ᠨᠢ ᠬᠤᠳᠠᠯᠳᠣᠨ ᠠᠪᠣᠭᠰᠠᠨ ᠳᠡᠭᠦᠯᠳᠡᠷ ᠭᠦᠭᠵᠢᠮ ᠠᠴᠠ ᠠᠪᠬᠠᠭᠤᠯᠣᠭᠠᠳ᠂ ᠠᠷᠪᠠᠨ ᠨᠢᠭᠡᠨ ᠨᠠᠰᠣᠨ ᠤ ᠲᠦᠷᠦᠭᠰᠡᠨ ᠡᠳᠦᠷ ᠤᠨ ᠪᠠᠶᠠᠷ ᠢᠶᠠᠨ ᠪᠡᠯᠭᠡᠯᠡᠬᠦ ᠦᠶ᠎ᠡ ᠳᠤ ᠨᠢ ᠬᠤᠳᠠᠯᠳᠣᠨ ᠠᠪᠣᠭᠰᠠᠨ ᠭᠤᠶᠣ ᠲᠠᠯᠪᠢᠭᠤᠷ ᠳ᠋ᠧᠩ ᠬᠦᠷᠲᠡᠯ᠎ᠡ᠂ ︽ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ︾ ᠲᠡᠭᠦᠨ ᠤ ᠠᠮᠢ ᠨᠠᠰᠤ ᠲᠠᠢ ᠨᠢ ᠠᠭᠤᠰᠣᠯᠳᠣᠨ᠂ ︽ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ︾ ᠲᠡᠭᠦᠨ ᠢ ᠪᠠᠷᠠᠳᠠᠨ ᠦᠭᠡᠯᠡᠢ ᠪᠣᠯᠭᠠᠭᠰᠠᠨ ᠪᠠᠶᠢᠨ᠎ᠠ᠃ ᠵᠣᠬᠢᠶᠠᠯ ᠢ ᠬᠡᠳᠦ᠋ᠢᠪᠡᠷ ᠮᠠᠰᠢ ᠪᠣᠷᠣᠭᠵᠢᠭᠤᠨ ᠪᠢᠴᠢᠭᠰᠡᠨ ᠪᠣᠯᠪᠠᠴᠣ᠂ ᠬᠠᠶᠢᠷ᠎ᠠ ᠰᠡᠳᠭᠢᠯᠭᠡ ᠨᠢ ᠲᠤᠩ ᠦᠨᠡᠨᠴᠢ ᠬᠠᠯᠠᠭᠤᠨ ᠪᠠᠶᠢᠵᠤ᠂ ᠬᠦᠮᠦᠰ ᠤᠨ ᠰᠡᠳᠭᠢᠯ ᠢ ᠬᠦᠳᠡᠯᠭᠡᠬᠦ ᠠᠵᠢ᠃ ᠬᠤᠢ ᠽᠢ ᠵᠣᠬᠢᠶᠠᠯ ᠳᠣᠳᠣᠷᠠᠬᠢ ᠬᠡᠳᠦᠨ ᠠᠯᠳᠠᠭ᠎ᠠ ᠦᠰᠦᠭ ᠢ ᠨᠢ ᠵᠠᠰᠠᠵᠤ ᠥᠭᠭᠦᠭᠡᠳ᠂ ᠦᠬᠢᠨ ᠢᠶᠠᠷ ᠢᠶᠠᠨ ᠵᠣᠬᠢᠶᠠᠯ ᠤᠨ ᠳᠠᠰᠬᠠᠯ ᠤᠨ ᠴᠠᠭᠠᠰᠣᠨ ᠳᠡᠭᠡᠷ᠎ᠡ ᠳᠠᠬᠢᠨᠲᠠ ᠴᠡᠪᠡᠷ ᠳᠣᠳᠣᠷᠬᠠᠢ ᠬᠠᠭᠤᠯᠣᠭᠤᠯᠣᠭᠠᠳ᠂ ᠵᠠᠬᠢᠳᠠᠯ ᠤᠨ ᠳᠣᠭᠳᠣᠢ ᠳᠡᠭᠡᠷ᠎ᠡ ᠬᠠᠶ᠋ᠢᠭ ᠪᠢᠴᠢᠨ᠂ ᠰᠢᠣᠳᠠᠨ ᠤ ᠮᠠᠷᠺ ᠨᠠᠭᠠᠵᠤ᠂ ᠠᠰᠠᠷ ᠤᠨ ᠳᠣᠣᠷᠠᠬᠢ ᠰᠢᠣᠳᠠᠨ ᠤ ᠲᠦᠩᠰᠡᠨ ᠳᠤ ᠬᠢᠵᠦ ᠥᠭᠪᠡ᠃    ᠡᠨᠡ ᠬᠡᠷᠡᠭ ᠦᠩᠭᠡᠷᠡᠭᠰᠡᠨ ᠤ ᠳᠠᠷᠠᠭ᠎ᠠ᠂ ᠬᠤᠢ ᠽᠢ ᠪᠦᠷ ᠮᠠᠷᠲᠠᠴᠢᠬᠠᠪᠠ᠂ ᠶᠢᠨ ᠯᠢᠩ ᠦᠪᠡᠷ ᠢᠶᠠᠨ ᠪᠠᠰᠠ ᠳᠤᠷᠠᠳᠤᠭ᠎ᠠ ᠦᠬᠡᠢ᠃ ᠭᠡᠲᠡᠯ᠎ᠡ ᠬᠠᠭᠠᠰ ᠰᠠᠷ᠎ᠠ ᠶᠢᠨ ᠳᠠᠷᠠᠭ᠎ᠠ ᠬᠤᠢ ᠽᠢ ᠵᠠᠬᠢᠳᠠᠯ ᠤᠨ ᠬᠠᠶᠢᠷᠴᠠᠭ ᠢᠶᠠᠨ ᠨᠡᠬᠡᠬᠡᠭᠦ ᠶᠢᠨ ᠦᠶᠡᠰ᠂ ︽ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ︾ ᠭᠡᠰᠡᠨ ᠦᠰᠦᠭ ᠪᠦᠬᠦᠢ ᠵᠠᠬᠢᠳᠠᠯ ᠭᠠᠷᠴᠣ ᠢᠷᠡᠪᠡ᠂ ᠵᠠᠬᠢᠳᠠᠯ ᠳᠤ ᠶᠠᠷᠢᠭᠰᠠᠨᠴᠢᠯᠠᠨ ᠢᠶᠠᠷ᠂ ᠰᠣᠷᠣᠭᠴᠢ ᠶᠢᠨ ᠯᠢᠩ ᠤᠨ ᠵᠣᠬᠢᠶᠠᠯ ᠱᠠᠩᠨᠠᠯ ᠳᠤ ᠳᠣᠳᠣᠷᠠᠪᠠ᠂ ᠭᠡᠷ ᠤᠨ ᠠᠬᠠᠮᠠᠳ ᠢ ᠳᠠᠷᠠᠭ᠎ᠠ ᠭᠠᠷᠠᠭ ᠤᠨ ᠡᠳᠦᠷ ᠡᠷᠦᠬᠡ ᠠᠮᠠ ᠶᠢᠨ ᠳᠡᠪᠲᠡᠷ ᠢᠶᠠᠨ ᠠᠪᠴᠣ᠂ ᠶᠢᠨ ᠯᠢᠩ ᠲᠠᠢ ᠬᠠᠮᠲᠤ ᠱᠠᠩᠨᠠᠯ ᠣᠯᠭᠤᠬᠤ ᠶᠣᠰᠣᠯᠠᠯ ᠳᠤ ᠣᠷᠣᠯᠴᠠᠬᠤ ᠶᠢ ᠣᠷᠢᠭᠰᠠᠨ ᠠᠵᠢ᠃    ︽ᠰᠠᠶᠢᠨ ᠶᠠᠪᠣᠳᠠᠯ ᠬᠤᠣᠰ ᠢᠶᠠᠷ︾ ᠭᠡᠳᠡᠭ ᠢᠶᠠᠷ᠂ ᠡᠨᠡ ᠬᠡᠪᠰᠢᠮᠡᠯ ᠦᠭᠡ ᠦᠨᠡᠬᠡᠷ ᠶᠣᠰᠣ ᠲᠠᠢ᠃ ᠶᠢᠨ ᠯᠢᠩ ᠤᠨ ᠵᠣᠬᠢᠶᠠᠯ ︽ᠮᠢᠨᠦ ᠠᠪᠤ︾ ᠲᠣᠭᠤᠷᠢᠭ ᠪᠣᠯᠣᠨ ᠬᠤᠲᠠ ᠶᠢᠨ ᠱᠠᠩᠨᠠᠯ ᠢ ᠬᠦᠷᠲᠡᠴᠢᠬᠡᠯ᠎ᠡ᠃ ᠨᠢᠭᠡ ᠭᠡᠷ ᠤᠨ ᠬᠦᠮᠦᠰ ᠪᠦᠷ ᠪᠠᠶᠠᠷᠯᠠᠵᠠᠭᠠᠨ᠎ᠠ᠃ ᠬᠤᠢ ᠽᠢ ᠪᠠᠶᠠᠷᠯᠠᠬᠤ ᠳᠤ ᠪᠠᠨ ᠶᠢᠨ ᠯᠢᠩ ᠳᠤ᠄ ︽ᠴᠢ ᠦᠨᠡᠬᠡᠷᠡᠨ ᠰᠠᠨᠠᠮᠰᠠᠷ ᠦᠬᠡᠢ ᠪᠠᠷ ᠱᠠᠩᠨᠠᠯ ᠬᠦᠷᠲᠡᠭᠴᠢ ᠲᠣᠰᠬᠠᠢ ᠡᠷᠦᠬᠡ ᠪᠣᠯᠴᠢᠬᠠᠯ᠎ᠠ︾ ᠭᠡᠨ᠎ᠡ᠃     ᠶᠢᠨ ᠯᠢᠩ ᠳᠤ ᠣᠮᠤᠭ ᠪᠠᠭ᠋ᠠᠳᠣᠯ ᠲᠦᠷᠦᠭᠳᠡᠭᠡᠳ ᠰᠢᠨᠡᠬᠡᠨ ᠰᠣᠷᠣᠭᠰᠠᠨ ᠬᠡᠪᠰᠢᠮᠡᠯ ᠬᠡᠯᠡᠯᠭᠡ ᠪᠠᠨ ᠭᠠᠶᠢᠬᠠᠭᠤᠯᠵᠣ᠄ ︽ᠳᠠᠬᠢᠶ᠎ᠠ ᠠᠯᠠᠬᠤ ᠳᠤ ᠦᠬᠡᠷ ᠤᠨ ᠬᠢᠳᠤᠭ᠎ᠠ ᠶᠢ ᠬᠡᠷᠡᠭᠯᠡᠭᠰᠡᠨ ᠯᠡ ᠳᠡᠳᠦᠢ︕︾ ᠭᠡᠵᠦ ᠮᠠᠵᠣᠣᠯᠠᠨ᠎ᠠ᠃ ᠶᠢᠨ ᠢ ᠮᠢᠩ ᠰᠠᠶ᠋ᠢᠬᠠᠨ ᠰᠣᠨᠣᠰᠣᠭᠤᠷ ᠢᠶᠠᠨ ᠴᠢᠬᠢᠨ ᠠᠴᠠ ᠪᠠᠨ ᠠᠪᠴᠣ᠂ ᠪᠢᠴᠢᠭ ᠤᠨ ᠥᠷᠥᠭᠡᠨ ᠠᠴᠠ ᠪᠠᠨ ᠭᠠᠷᠴᠣ ᠢᠷᠡᠭᠡᠳ᠂ ᠡᠭᠡᠳᠡᠢ ᠪᠣᠣᠳᠠᠢ ᠪᠠᠷ ᠬᠠᠭᠠᠰ ᠳᠣᠲᠠᠭᠤ ᠰᠣᠨᠣᠰᠣᠭᠰᠠᠨ ᠢᠶᠠᠨ᠄ ︽ᠶᠠᠭᠤ ᠭᠡᠨ᠎ᠡ ᠶᠠᠭᠤ ᠭᠡᠨ᠎ᠡ︖ ᠳᠠᠬᠢᠶ᠎ᠠ ᠠᠯᠠᠬᠤ ᠳᠤ ᠦᠬᠡᠷ ᠤᠨ ᠬᠢᠳᠤᠭ᠎ᠠ ᠶᠢ ᠬᠡᠷᠡᠭᠯᠡᠨ᠎ᠡ ᠭᠡᠨ᠎ᠡ︖︾ ᠭᠡᠵᠦ ᠯᠠᠪᠯᠠᠨ ᠠᠰᠠᠭᠤᠨ᠎ᠠ᠃     ᠶᠢᠨ ᠯᠢᠩ ᠢᠨᠢᠶᠡᠬᠦ ᠳᠤ ᠪᠠᠨ ᠰᠠᠶ᠋ᠢ ᠣᠣᠭᠤᠭᠰᠠᠨ ᠴᠠᠢ ᠪᠠᠨ ᠪᠦᠷ ᠰᠦᠷᠴᠢᠨ ᠭᠠᠷᠭᠠᠯ᠎ᠠ᠃ ᠱᠠᠩᠨᠠᠯ ᠣᠯᠭᠤᠬᠤ ᠶᠣᠰᠣᠯᠠᠯ ᠢ ᠬᠦᠬᠡᠮᠦ᠋ᠷᠡᠨ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ ᠤᠨ ᠠᠰᠠᠷ ᠳᠡᠭᠡᠷᠡᠬᠢ ᠬᠤᠷᠠᠯ ᠤᠨ ᠭᠡᠷ ᠲᠤ ᠲᠣᠬᠢᠷᠠᠭᠤᠯᠵᠣ᠂ ᠪᠠᠷᠤᠭ ᠵᠠᠷ ᠲᠠᠯᠪᠢᠬᠤ ᠡᠭᠦᠳᠡᠨ ᠠᠴᠠ ᠪᠣᠳᠣᠯᠬᠢᠨᠯᠭ᠍ᠰᠠᠨ ᠪᠣᠯᠣᠯᠲᠠᠢ᠂ ᠶᠣᠰᠣᠯᠠᠯ ᠤᠨ ᠲᠠᠯᠠᠪᠠᠢ ᠶᠢ ᠮᠠᠰᠢ ᠭᠤᠶᠣ ᠵᠠᠰᠠᠨ ᠴᠢᠮᠡᠭᠯᠡᠵᠦ᠂ ᠢᠳᠡᠭᠡᠨ ᠣᠮᠳᠠᠭᠠᠨ ᠪᠦᠷ ᠪᠠᠶᠢᠬᠤ ᠮᠦᠷᠲᠡᠭᠡᠨ ᠲᠧᠯᠸᠢᠰ ᠬᠤᠷᠢᠶᠠᠨ ᠠᠴᠠ ᠪᠠᠰᠠ ᠰᠣᠷᠪᠣᠯᠵᠢᠯᠠᠭᠴᠢ ᠵᠠᠯᠠᠵᠠᠢ᠃ ᠦᠨᠡᠨ ᠳᠤ ᠪᠠᠨ ᠱᠠᠩᠨᠠᠯ ᠬᠦᠷᠲᠡᠭᠰᠡᠨ ᠬᠡᠦᠭᠡᠳ ᠲᠡᠶᠢᠮᠦ ᠣᠯᠠᠨ ᠪᠢᠰᠢ᠂ 1 ᠨᠢᠭᠡᠳᠦᠭᠡᠷ ᠳᠡᠰ ᠤᠨ ᠱᠠᠩᠨᠠᠯ᠂ 2 ᠬᠤᠶᠠᠳᠣᠭᠠᠷ ᠳᠡᠰ ᠤᠨ ᠱᠠᠩᠨᠠᠯ᠂ 3 ᠭᠤᠷᠪᠠᠳᠣᠭᠠᠷ ᠳᠡᠰ ᠤᠨ ᠱᠠᠩᠨᠠᠯ ᠪᠠᠶᠢᠵᠤ᠂ ᠪᠣᠰᠣᠳ ᠨᠢ ᠪᠦᠷ ᠨᠢᠭᠡ ᠪᠦᠯᠦᠭ ᠵᠣᠷᠢᠭᠵᠢᠭᠤᠯᠣᠯ ᠤᠨ ᠱᠠᠩᠨᠠᠯ ᠪᠠᠶᠢᠵᠠᠢ᠃ ᠲᠠᠶᠢᠰᠠᠨ ᠳᠡᠭᠡᠷ᠎ᠡ ᠣᠯᠠᠭᠠᠨ ᠲᠣᠷᠭᠠᠨ ᠣᠭᠤᠰᠣᠷ ᠢᠶᠠᠷ ᠴᠢᠮᠡᠭᠯᠡᠭᠰᠡᠨ ᠱᠠᠩᠨᠠᠯ ᠤᠨ ᠪᠣᠳᠠᠰ ᠦᠷᠦᠭᠡᠰᠦᠳᠡᠢ᠂ ᠲᠡᠷᠡ ᠨᠢ ᠳᠡᠰ ᠳᠠᠷᠠᠭᠠᠯᠠᠭᠠᠳ᠄ ︽386︾ ᠺᠣᠮᠫᠢᠦ᠋ᠲ᠋ᠧᠷ ᠨᠢᠭᠡ᠂ ︽ᠺᠠᠰᠢᠡᠸᠦ︾ ᠡᠯᠧᠺᠳ᠋ᠷᠣᠨ ᠭᠦᠭᠵᠢᠮ ᠬᠤᠶᠠᠷ᠂ ︽ᠰᠢᠶᠤᠤ ᠪᠠ ᠸᠠᠩ︾ ᠺᠣᠮᠫᠢᠦ᠋ᠲ᠋ᠧᠷ ᠤᠨ ᠲᠣᠭᠯᠠᠭᠠᠮ ᠤᠨ ᠮᠠᠰᠢᠨ ᠭᠤᠷᠪᠠ ᠪᠠᠶᠢᠯ᠎ᠠ᠃  ᠶᠢᠨ ᠯᠢᠩ ᠶᠣᠰᠣᠯᠠᠯ ᠤᠨ ᠲᠠᠯᠠᠪᠠᠢ ᠳᠤ ᠰᠠᠭᠤᠭᠠᠳ᠂ ᠲᠠᠶᠢᠰᠠᠨ ᠳᠡᠭᠡᠷᠡᠬᠢ ᠱᠠᠩᠨᠠᠯ ᠤᠨ ᠪᠣᠳᠠᠰ ᠢ ᠲᠣᠨᠣᠷᠠᠲᠠᠯ᠎ᠠ ᠰᠢᠷᠲᠡᠨ᠂ ᠵᠢᠭᠠᠬᠠᠨ ᠪᠠᠴᠢᠮᠳᠠᠭᠰᠠᠨ ᠮᠠᠶ᠋ᠢᠭ ᠲᠠᠢ ᠬᠤᠢ ᠽᠢ ᠠᠴᠠ᠄ ︽ᠲᠠᠨ ᠤ ᠦᠵᠡᠬᠦ ᠪᠠᠷ ᠪᠢ ᠠᠯᠢ ᠵᠦᠢᠯ ᠤᠨ ᠱᠠᠩᠨᠠᠯ ᠢ ᠨᠢ ᠣᠯᠳᠠᠭ ᠪᠢᠯᠡ︖︾ ᠭᠡᠵᠦ ᠠᠰᠠᠭᠤᠨ᠎ᠠ᠃    ᠬᠤᠢ ᠽᠢ᠄ ︽ᠪᠢ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ︖ ᠠᠯᠢ ᠶᠢ ᠨᠢ ᠣᠯᠪᠠᠴᠣ ᠪᠦᠷ ᠪᠣᠯᠣᠨ᠎ᠠ᠂ ᠡᠵᠢ ᠨᠢ ᠪᠦᠷ ᠪᠠᠶᠠᠷᠯᠠᠨ᠎ᠠ︾ ᠭᠡᠨ᠎ᠡ᠃    ︽ᠪᠢ ᠲᠡᠷᠡ ᠺᠣᠮᠫᠢᠦ᠋ᠲ᠋ᠧᠷ ᠢ ᠣᠯᠬᠤ ᠶᠢ ᠬᠦᠰᠡᠨ᠎ᠡ︾ ᠭᠡᠳ ᠶᠢᠨ ᠯᠢᠩ ᠡᠵᠢ ᠶᠢᠨ ᠢᠶᠠᠨ ᠭᠠᠷ ᠠᠴᠠ ᠴᠢᠩᠭᠠᠭᠠᠨ᠂ ︽ᠠᠪᠤ ᠠᠯᠢ ᠬᠡᠳᠦ᠋ᠢᠨ ᠤ ᠺᠣᠮᠫᠢᠦ᠋ᠲ᠋ᠧᠷ ᠬᠤᠳᠠᠯᠳᠤᠨ ᠠᠪᠬᠤ ᠵᠠᠢ ᠰᠠᠨᠠᠵᠤ ᠪᠠᠶᠢᠭᠰᠠᠨ ᠶᠤᠮ︾ ᠭᠡᠳ ᠵᠤᠭᠰᠣᠰᠬᠢᠭ᠍ᠰᠡᠨ ᠢᠶᠠᠨ ᠳᠠᠬᠢᠨ᠄ ︽ᠲᠣᠭᠯᠠᠭᠠᠮ ᠤᠨ ᠮᠠᠰᠢᠨ ᠪᠠᠰᠠ ᠪᠣᠯᠣᠨ᠎ᠠ᠂ ᠮᠠᠨ ᠤ ᠣᠯᠠᠨ ᠬᠠᠮᠲᠤ ᠰᠣᠷᠣᠭᠴᠢ ᠭᠡᠷ ᠲᠤ ᠪᠠᠨ ᠪᠦᠷ ᠲᠣᠭᠯᠠᠭᠠᠮ ᠤᠨ ᠮᠠᠰᠢᠨ ᠲᠠᠢ︾ ᠭᠡᠵᠦ ᠶᠠᠷᠢᠨ᠎ᠠ᠃  ᠶᠢᠨ ᠯᠢᠩ ᠦᠪᠡᠷ ᠤᠨ ᠬᠤᠶᠠᠳᠣᠭᠠᠷ ᠳᠡᠰ ᠤᠨ ᠱᠠᠩᠨᠠᠯ ᠣᠯᠬᠤ ᠶᠢ ᠬᠦᠰᠡᠵᠦ ᠪᠠᠶᠢᠭ᠎ᠠ ᠪᠠᠨ ᠬᠠᠰᠢ ᠯᠡ ᠶᠠᠷᠢᠭ᠎ᠠ ᠦᠬᠡᠢ᠄ ᠲᠡᠷᠡ ᠬᠦ ᠦᠨᠡᠬᠡᠷ ᠵᠦᠭᠡᠷ ᠰᠢᠦᠬᠡᠨ ︽ᠺᠠᠰᠢᠡᠸᠦ︾ ᠡᠯᠧᠺᠳ᠋ᠷᠣᠨ ᠭᠦᠭᠵᠢᠮ ᠃ ᠭᠡᠲᠡᠯ᠎ᠡ ᠱᠠᠩᠨᠠᠯ ᠣᠯᠣᠭᠰᠠᠨ ᠨᠠᠷᠡᠰ ᠢ ᠨᠡᠶᠢᠳᠡᠯᠡᠬᠦ ᠳᠤ᠂ ᠶᠢᠨ ᠯᠢᠩ ᠶᠠᠭ ᠰᠠᠶᠢᠬᠠᠨ ᠬᠤᠶᠠᠳᠣᠭᠠᠷ ᠳᠡᠰ ᠤᠨ ᠱᠠᠩᠨᠠᠯ ᠢ ᠬᠦᠷᠳᠡᠭᠰᠡᠨ ᠪᠠᠶᠢᠯ᠎ᠠ᠃     ᠶᠢᠨ ᠯᠢᠩ ᠣᠷᠣᠭᠤᠯ ᠢᠶᠠᠨ ᠵᠢᠮᠢᠢᠯᠭᠡᠨ᠂ ᠪᠠᠶᠠᠷ ᠤᠨ ᠢᠨᠢᠶᠡᠳᠦ ᠪᠠᠨ ᠨᠢᠭᠤᠬᠤ ᠪᠠᠷ ᠮᠡᠳᠭᠡᠨ ᠴᠢᠷᠮᠠᠶᠢᠵᠤ᠂ ᠪᠣᠰᠴᠣ ᠵᠣᠭᠰᠤᠨ ᠲᠠᠶᠢᠰᠠᠨ ᠳᠤ ᠭᠠᠷᠴᠣ ᠡᠯᠧᠺᠳ᠋ᠷᠣᠨ ᠬᠦᠭᠵᠢᠮ ᠢ ᠲᠡᠪᠡᠷᠢᠨ ᠢᠷᠡᠪᠡ᠃ ᠡᠯᠧᠺᠳ᠋ᠷᠣᠨ ᠬᠦᠭᠵᠢᠮ ᠳᠡᠩᠳᠡᠭᠦᠦ ᠶᠡᠭᠡ᠂ ᠶᠢᠨ ᠯᠢᠩ ᠬᠦᠴᠢᠷᠳᠡᠯᠲᠡᠶᠢᠬᠡᠨ ᠢᠶᠠᠷ ᠡᠮᠦᠨ᠎ᠡ ᠪᠠᠨ ᠲᠠᠪᠡᠷᠢᠵᠤ᠂ ᠠᠯᠬᠤᠬᠤ ᠳᠤ ᠪᠠᠨ ᠵᠠᠮ ᠢᠶᠠᠨ ᠣᠯᠵᠤ ᠬᠠᠷᠠᠬᠤ ᠦᠬᠡᠢ ᠪᠠᠶᠢᠵᠤ᠂ ᠲᠠᠶᠢᠰᠠᠨ ᠠᠴᠠ ᠪᠠᠭᠤᠬᠤ ᠳᠤ ᠪᠠᠨ ᠡᠰᠡ ᠯᠡ ᠳᠠᠮ ᠬᠢᠰᠬᠢᠬᠦ ᠰᠢᠬᠠᠨ᠂ ᠲᠠᠶᠢᠰᠠᠨ ᠤ ᠳᠡᠭᠡᠷ᠎ᠡ ᠳᠣᠣᠷᠠᠬᠢ ᠶᠢᠨ ᠬᠢᠨ ᠶᠢ ᠨᠢᠭᠡ ᠵᠡᠷᠭᠡ ᠢᠨᠢᠶᠡᠯᠭᠡᠪᠡ᠃ ᠲᠧᠯᠸᠢᠰ ᠬᠤᠷᠢᠶᠠᠨ ᠤ ᠨᠢᠭᠡᠨ ᠰᠣᠷᠪᠣᠯᠵᠢᠯᠠᠭᠴᠢ ᠨᠢᠳᠦ ᠬᠤᠷᠳᠣᠨ ᠭᠠᠷ ᠪᠣᠰᠢᠭᠤ ᠲᠤᠯᠠ ᠲᠡᠭᠦᠨ ᠢ ᠬᠠᠪᠰᠣᠷᠣᠨ ᠭᠦᠭᠵᠢᠮ ᠢ ᠨᠢᠥ ᠠᠳᠬᠤᠨ ᠥᠭᠴᠦ᠂ ᠬᠤᠢ ᠽᠢ ᠶᠢᠨ ᠳᠡᠷᠭᠡᠳᠡ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠪᠦᠭᠡᠳ᠄ ︽ᠪᠢᠴᠢᠬᠠᠨ ᠨᠠᠶᠢᠵᠠ ᠡ᠂ ᠪᠢ ᠴᠢᠮ᠎ᠠ ᠶᠢ ᠰᠣᠷᠪᠣᠯᠵᠢᠯᠠᠵᠤ ᠪᠣᠯᠬᠤ ᠦᠦ︖︾ ᠭᠡᠵᠦ ᠣᠷᠢᠶᠠᠯᠭᠠᠬᠠᠨ ᠢᠶᠠᠷ ᠠᠰᠠᠭᠤᠯ᠎ᠠ᠃     ᠶᠢᠨ ᠯᠢᠩ ᠤᠨ ᠴᠢᠷᠠᠢ ᠨᠢ ᠣᠯᠠᠶᠢᠨ᠂ ᠬᠤᠢ ᠽᠢ ᠶᠢ ᠰᠢᠷᠪᠢᠨ ᠬᠠᠷᠠᠭᠠᠳ᠄ ︽ᠴᠢ ᠮᠢᠨᠦ ᠡᠵᠢ ᠠᠴᠠ ᠠᠰᠠᠭᠤᠭᠠᠴᠢ︾ ᠭᠡᠯ᠎ᠡ᠃    ᠬᠠᠵᠠᠭᠤᠳᠠᠬᠢ ‍ᠵᠠᠭᠤᠳᠠᠬᠢ ᠬᠦᠮᠦᠰ ᠨᠢ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠪᠠᠰᠠ ᠢᠨᠢᠶᠡᠵᠡᠭᠡᠯ᠎ᠡ᠃ ᠬᠤᠢ ᠽᠢ ᠶᠢᠨ ᠯᠢᠩ ᠢ ᠳᠠᠳᠠᠵᠤ ᠠᠪᠣᠭᠠᠳ᠄ ︽ᠬᠦᠮᠦᠨ ᠴᠢᠮ᠎ᠠ ᠶᠢ ᠰᠣᠷᠪᠣᠯᠵᠢᠯᠠᠬᠤ ᠭᠡᠵᠦ ᠪᠠᠶᠢᠨ᠎ᠠ ᠰᠢᠦ︕ ᠠᠭᠤᠵᠢᠭᠤ ᠲᠠᠯᠪᠢᠭᠤ ᠪᠠᠶᠢᠭᠠᠴᠢ᠃︾ ᠭᠡᠪᠡ᠃     ᠶᠢᠨ ᠯᠢᠩ ᠰᠣᠷᠪᠣᠯᠵᠢᠯᠠᠭᠴᠢ ᠠᠴᠠ᠄ ︽ᠲᠠ ᠨᠠᠳᠠ ᠪᠠᠷ ᠶᠠᠭᠤ ᠶᠠᠷᠢᠭᠤᠯᠬᠤ ᠭᠡᠵᠦ ᠰᠠᠨᠠᠵᠤ ᠪᠠᠶᠢᠭ᠎ᠠ ᠪᠣᠢ︖︾ ᠭᠡᠵᠦ ᠠᠰᠠᠭᠤᠯ᠎ᠠ᠃    ᠰᠣᠷᠪᠣᠯᠵᠢᠯᠠᠭᠴᠢ ᠢᠨᠢᠶᠡᠳᠦ ᠪᠠᠨ ᠳᠡᠰᠪᠦᠷᠢᠯᠡᠨ ᠪᠠᠶᠢᠵᠤ᠄ ︽ᠪᠢ ᠰᠠᠨᠠᠵᠤ ᠪᠠᠶᠢᠭ᠎ᠠ ᠪᠢᠰᠢ᠂ ᠬᠠᠷᠢᠨ ᠴᠢ ᠰᠠᠨᠠᠬᠤ — — ᠴᠢ ᠣᠯᠠᠨ ᠳᠤ ᠶᠠᠭᠤ ᠶᠠᠷᠢᠬᠤ ᠭᠡᠵᠦ ᠰᠠᠨᠠᠵᠤ ᠪᠠᠶᠢᠭ᠎ᠠ ᠪᠢᠯᠡ︖︾ ᠭᠡᠪᠡ᠃     ᠶᠢᠨ ᠯᠢᠩ ᠬᠤᠷᠣᠭᠤ ᠪᠠᠨ ᠠᠮᠠᠨ ᠳᠤ ᠪᠠᠨ ᠬᠦᠯᠬᠦᠭᠰᠡᠭᠡᠷ᠂ ᠰᠢᠩᠭᠡᠭᠡᠯᠲᠡ ᠶᠢᠨ ᠳᠣᠷᠠᠨ ᠤ ᠡᠮᠦᠨ᠎ᠡ ᠬᠠᠨᠳᠤᠨ᠄ ︽ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ ᠤᠨ ᠠᠪᠠᠭ᠎ᠠ ᠠᠨᠢᠶ᠎ᠠ ᠨᠠᠷ ᠨᠠᠳᠠ ᠳᠤ ᠡᠨᠡ ᠡᠯᠧᠺᠳ᠋ᠷᠣᠨ ᠬᠦᠭᠵᠢᠮ ᠢ ᠪᠡᠯᠭᠡᠯᠡᠭᠰᠡᠨ ᠳᠤ ᠲᠠᠯᠠᠷᠬᠠᠵᠤ ᠪᠠᠶᠢᠨ᠎ᠠ᠃ ᠭᠡᠲᠡᠯ᠎ᠡ ᠮᠢᠨᠦ ᠬᠠᠮᠤᠭ ᠠᠴᠠ ᠣᠯᠬᠤ ᠶᠢ ᠬᠦᠰᠡᠭᠰᠡᠨ ᠨᠢ ᠲᠡᠷᠡ ᠺᠣᠮᠫᠢᠦ᠋ᠲ᠋ᠧᠷ︾ ᠭᠡᠰᠡᠨ ᠢᠶᠠᠨ ᠲᠡᠷᠡ ᠨᠢᠭᠡᠨ ᠳᠣᠮᠳᠠᠳᠣ ᠰᠣᠷᠭᠠᠭᠤᠯᠢ ᠶᠢᠨ ᠰᠣᠷᠣᠭᠴᠢ ᠶᠢᠨ ᠲᠡᠪᠡᠷᠢᠵᠦ ᠪᠠᠶᠢᠭ᠎ᠠ ᠺᠣᠮᠫᠢᠦ᠋ᠲ᠋ᠧᠷ ᠢ ᠵᠢᠭᠠᠨ᠄ ︽ᠪᠢ ᠳᠠᠷᠠᠭ᠎ᠠ ᠤᠳᠠᠭ᠎ᠠ ᠪᠠᠰᠠ ᠣᠷᠣᠯᠳᠣᠭᠠᠨ ᠳᠤ ᠣᠷᠣᠯᠴᠠᠨ᠎ᠠ᠂ ᠵᠠᠪᠠᠯ ᠺᠣᠮᠫᠢᠦ᠋ᠲ᠋ᠧᠷ ᠢ ᠣᠯᠵᠣ ᠠᠪᠤᠨ᠎ᠠ︾ ᠭᠡᠯ᠎ᠡ᠃    ᠰᠤᠷᠪᠤᠯᠵᠢᠯᠠᠬᠴᠢ ᠮᠢᠺᠷᠣᠹᠤᠨ ᠢᠶᠠᠨ ᠠᠪᠴᠣ᠄ ︽ᠮᠠᠰᠢ ᠰᠠᠶᠢᠨ᠂ ᠴᠢ ᠶᠡᠬᠡᠬᠡᠨ ᠡᠷᠴᠢ ᠵᠣᠷᠢᠭ ᠲᠠᠢ ᠪᠠᠶᠢᠨ᠎ᠠ᠂ ᠦᠪᠡᠷ ᠤᠨ ᠢᠶᠠᠨ ᠬᠦᠰᠡᠯ ᠢ ᠪᠡᠶᠡᠯᠡᠭᠦᠯᠬᠦ ᠶᠢ ᠴᠢᠨᠢ ᠬᠦᠰᠡᠶ᠎ᠡ︾ ᠭᠡᠵᠦ ᠵᠦᠩᠨᠡᠪᠡ᠃ ᠶᠢᠨ ᠯᠢᠩ ᠳᠣᠯᠣᠭᠠᠢ ᠳᠣᠬᠢᠨ᠂ ᠶᠣᠰᠣᠷᠬᠠᠭ ᠭᠡᠭᠴᠢ ᠪᠠᠷ᠄ ︽ᠲᠠᠯᠠᠷᠬᠠᠯ᠎ᠠ︾ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠢᠦᠳ᠋ ᠸᠤᠯᠹᠷᠠᠮ ᠤᠨ ᠳ᠋ᠧᠩ ᠤᠨᠲᠠᠷᠠᠬᠤ ᠲᠠᠢ ᠵᠡᠷᠭᠡ᠂ ᠶᠢᠨ ᠯᠢᠩ ᠪᠠᠷᠤᠭ ᠲᠤᠲᠠᠭᠠᠬᠤ ᠶᠢᠨ ᠵᠠᠪᠳᠣᠭᠤ ᠬᠤᠢ ᠽᠢ ᠶᠢᠨ ᠳᠡᠷᠭᠡᠳᠡ ᠬᠦᠷᠴᠦ ᠣᠴᠢᠭᠠᠳ ᠨᠢᠭᠡ ᠯᠡ ᠠᠮᠢᠰᠬᠤᠭ᠎ᠠ ᠪᠠᠷ᠄ ︽ᠨᠠᠮ᠎ᠠ ᠶᠢ ᠠᠶᠣᠯᠭᠠᠭᠠᠳ ᠠᠯᠠᠴᠢᠬᠠᠬᠤ ᠰᠢᠬᠠᠯ᠎ᠠ︾ ᠭᠡᠪᠡ ᠃ ᠬᠤᠢ ᠽᠢ ᠮᠦᠰᠢᠶᠡᠭᠡᠳ ᠲᠡᠭᠦᠨ ᠤ ᠮᠦᠷᠦ ᠶᠢ ᠨᠢ ᠲᠡᠪᠡᠷᠢᠨ ᠪᠠᠶᠢᠵᠤ᠄ ︽ᠵᠦᠭᠡᠷ ᠵᠦᠭᠡᠷ᠂ ᠡᠮᠢᠶᠡᠯ ᠢᠶᠠᠨ ᠢᠯᠡᠷᠡᠭᠦᠯᠦᠭᠰᠡᠨ ᠦᠬᠡᠢ ᠴᠢᠨᠢ ᠬᠠᠷᠢᠨ ᠰᠠᠶᠢᠨ︾ ᠭᠡᠪᠡ᠃ ᠭᠡᠷ ᠲᠤ ᠪᠠᠨ ᠬᠠᠷᠢᠬᠤ ᠵᠠᠮ ᠳᠤ᠂ ᠬᠤᠢ ᠽᠢ ᠶᠢᠨ ᠯᠢᠩ ᠤᠨ ᠡᠯᠧᠺᠳ᠋ᠷᠣᠨ ᠬᠦᠭᠵᠢᠮ ᠢ ᠨᠢ ᠠᠪᠴᠣ ᠶᠠᠪᠣᠪᠠᠯ᠂ ᠵᠠᠮ ᠬᠤᠯᠠ ᠬᠦᠭᠵᠢᠮ ᠬᠦᠨᠳᠦ ᠲᠤᠯᠠ ᠬᠤᠢ ᠽᠢ ᠨᠢᠭᠡ ᠵᠠᠮ ᠭᠠᠷ ᠢᠶᠠᠨ ᠰᠣᠯᠢᠭᠰᠠᠨ ᠴᠦ ᠮᠦᠷᠦ ᠳᠠᠯᠤ ᠨᠢ ᠡᠪᠡᠷᠰᠢᠶᠡᠨ ᠨᠢᠷᠣᠭᠤ ᠨᠢ ᠡᠪᠡᠳᠴᠦ᠂ ᠶᠢᠨ ᠢ ᠮᠢᠩ ᠢ ᠦᠬᠢᠨ ᠲᠠᠢ ᠪᠠᠨ ᠢᠷᠡᠭᠦᠯᠦᠭᠰᠡᠨ ᠦᠬᠡᠢ ᠳᠤ ᠪᠠᠨ ᠦᠨᠡᠬᠡᠷ ᠬᠠᠷᠠᠮᠰᠠᠯ᠎ᠠ᠃ ᠲᠡᠷᠡ ᠶᠢᠨ ᠯᠢᠩ ᠳᠤ᠄ ︽ᠮᠣᠨᠳᠠᠭᠠᠨ ᠴᠦ ᠡᠯᠧᠺᠳ᠋ᠷᠣᠨ ᠬᠦᠭᠵᠢᠮ ᠣᠯᠵᠠᠢ᠂ ᠬᠡᠷᠪᠡ ᠦᠨᠡᠬᠡᠷ ᠺᠣᠮᠫᠢᠦ᠋ᠲ᠋ᠧᠷ ᠣᠯᠣᠭᠰᠠᠨ ᠪᠣᠯ ᠮᠠᠨ ᠤ ᠬᠤᠶᠠᠭᠤᠯᠠ ᠭᠡᠷ ᠲᠤ ᠪᠠᠨ ᠠᠪᠠᠴᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ︾ ᠭᠡᠨ᠎ᠡ᠃     ᠶᠢᠨ ᠯᠢᠩ ᠲᠡᠭᠦᠨ ᠤ ᠦᠭᠡ ᠶᠢ ᠬᠠᠷᠢᠭᠤᠯᠤᠭ᠎ᠠ ᠦᠬᠡᠢ᠂ ᠲᠡᠭᠦᠨ ᠤ ᠠᠷᠣ ᠠᠴᠠ ᠬᠡᠯᠳᠦᠷᠢᠨ᠎ᠡ᠂ ᠴᠢᠷᠠᠢ ᠳᠡᠭᠡᠷ᠎ᠡ  ᠨᠢ ᠰᠠᠶ᠋ᠢᠬᠠᠨ ᠤ ᠪᠠᠶᠠᠷ ᠤᠨ ᠮᠦᠰᠢᠶᠡᠳᠦ ᠠᠯᠠᠭ᠎ᠠ᠃ ᠬᠤᠢ ᠽᠢ ᠲᠡᠭᠦᠨ ᠢ ᠡᠷᠬᠢᠨ ᠬᠠᠷᠠᠭᠠᠳ᠄ ︽ᠴᠢ ᠦᠨᠡᠬᠡᠷ ᠪᠠᠶᠠᠷᠯᠠᠬᠤ ᠦᠬᠡᠢ ᠦᠦ︖ ᠨᠢᠭᠡᠳᠦᠭᠡᠷ ᠳᠡᠰ ᠤᠨ ᠱᠠᠩᠨᠠᠯ ᠢ ᠣᠯᠣᠭᠰᠠᠨ ᠦᠬᠡᠢ ᠶᠢᠨ ᠬᠢ ᠪᠢᠵᠡ︖︾ ᠭᠡᠵᠦ ᠠᠰᠠᠭᠤᠨ᠎ᠠ᠃     ᠶᠢᠨ ᠯᠢᠩ ᠭᠡᠨᠡᠳᠲᠡ ᠪᠠᠷ᠄ ︽︿ᠲᠠᠶᠢᠶᠠᠨ ᠴᠢᠬᠢ ᠶᠢ ᠴᠢᠩᠭᠠᠭᠠᠵᠤ ᠥᠰᠥᠯᠲᠡ ᠶᠢ ᠨᠢ ᠲᠦᠷᠭᠡᠳᠭᠡᠬᠦ﹀ ᠭᠡᠳᠡᠭ ᠭᠡᠪᠰᠢᠮᠡᠯ ᠬᠡᠯᠡᠯᠭᠡ ᠶᠢ ᠲᠠ ᠰᠣᠨᠣᠰᠣᠭᠰᠠᠨ ᠦᠦ︖︾ ᠭᠡᠵᠦ ᠠᠰᠠᠭᠤᠪᠠ᠃    ᠬᠤᠢ ᠽᠢ ᠫᠦᠰ ᠭᠡᠲᠡᠯ᠎ᠡ ᠢᠨᠢᠶᠡᠭᠡᠳ᠄ ︽ᠡᠨᠡ ᠴᠢᠨᠢ ᠬᠠᠷᠢᠨ ᠳ᠋ᠠ︕ ᠪᠢ ᠴᠢᠨᠢ ᠵᠢᠪ ᠵᠢᠩᠬᠢᠨᠢ ᠶᠡᠭᠡ ᠰᠣᠷᠭᠠᠭᠤᠯᠢ ᠶᠢᠨ ᠬᠢᠲᠠᠳ ᠬᠡᠯᠡᠨ ᠤ ᠰᠠᠯᠪᠤᠷᠢ ᠠᠴᠠ ᠲᠡᠭᠦᠰᠦᠭᠰᠡᠨ ᠰᠢᠦ︾ ᠭᠡᠯ᠎ᠡ᠃ ᠡᠨᠡ ᠦᠭᠡ ᠪᠠᠶᠢᠨ ᠬᠡᠯᠡᠵᠦ ᠪᠠᠷᠠᠭᠠᠳ᠂ ᠬᠤᠢ ᠽᠢ ᠶᠢᠨ ᠯᠢᠩ ᠶᠠᠭᠤᠨ ᠳᠤ ᠡᠭᠦᠨ ᠢ ᠠᠰᠠᠭᠤᠵᠣ ᠪᠠᠶᠢᠭ᠎ᠠ᠂ ᠪᠠᠰᠠ ᠲᠡᠷᠡ ᠶᠠᠭᠤᠨ ᠳᠤ ᠰᠡᠳᠭᠢᠯ ᠳᠣᠳᠣᠷ᠎ᠠ ᠪᠠᠨ ᠪᠠᠶᠠᠷᠯᠠᠬᠤ ᠦᠬᠡᠢ ᠪᠠᠶᠢᠭ᠎ᠠ ᠶᠢ ᠨᠢ ᠭᠡᠶᠢᠲᠡᠯ᠎ᠡ ᠮᠡᠳᠡᠴᠢᠬᠡᠪᠡ᠄ ᠣᠣᠯ ᠨᠢ ᠲᠡᠷᠡ ᠡᠵᠢ ᠨᠢ ᠭᠡᠷ ᠲᠤ ᠬᠠᠷᠢᠭᠰᠠᠨ ᠤ ᠳᠠᠷᠠᠭ᠎ᠠ ᠲᠡᠭᠦᠨ ᠢ ᠰᠢᠬᠠᠮᠳᠠᠭᠤᠯᠵᠣ ᠡᠯᠧᠺᠳ᠋ᠷᠣᠨ ᠬᠦᠭᠵᠢᠮ ᠰᠣᠷᠭᠠᠬᠤ ᠡᠭᠴᠡ ᠠᠶᠣᠭᠰᠠᠨ ᠪᠠᠶᠢᠵᠠᠢ︕     ᠶᠢᠨ ᠯᠢᠩ ᠪᠠᠭ᠎ᠠ ᠳᠤ ᠪᠠᠨ ᠳᠡᠭᠦᠯᠳᠡᠷ ᠭᠦᠭᠵᠢᠮ ᠰᠣᠷᠣᠭᠠᠳ ᠨᠢᠭᠡᠮᠦᠰᠦᠨ ᠠᠶᠣᠴᠢᠬᠠᠭᠰᠠᠨ ᠠᠵᠢ᠃ ᠶᠢᠨ ᠯᠢᠩ ᠤᠨ ᠳᠡᠭᠦᠯᠳᠡᠷ ᠬᠦᠭᠵᠢᠮ ᠢ ᠬᠤᠢ ᠽᠢ ᠲᠡᠭᠦᠨ ᠤ ᠵᠢᠯ ᠤᠨ ᠣᠢ ᠶᠢᠨ ᠲᠦᠷᠦᠭᠰᠡᠨ ᠡᠳᠦᠷ ᠲᠣᠬᠢᠶᠠᠬᠤ ᠦᠶᠡᠰ ᠬᠤᠳᠠᠯᠳᠣᠨ ᠠᠪᠣᠭᠰᠠᠨ ᠶᠤᠮ᠃ ᠲᠡᠷᠡ ᠦᠶ᠎ᠡ ᠳᠤ ᠵᠠᠬ᠎ᠠ ᠳᠡᠯᠭᠡᠬᠦᠷ ᠳᠡᠭᠡᠷ᠎ᠡ ᠪᠣᠳᠠᠰ ᠤᠨ ᠦᠨ᠎ᠡ ᠮᠠᠰᠢ ᠬᠢᠮᠳᠠ᠂ ᠨᠢᠭᠡᠨ ᠬᠠᠮᠤᠭ ᠤᠨ ᠰᠠᠶᠢᠨ ︽ᠵᠦᠵᠢᠶᠠᠩ︾ ᠳᠡᠮᠳᠡᠭᠲᠦ ᠳᠡᠭᠦᠯᠳᠡᠷ ᠭᠦᠭᠵᠢᠮ ᠰᠠᠶ᠋ᠢ ᠮᠢᠩᠭ᠎ᠠ ᠭᠠᠷᠤᠢ ᠵᠣᠭᠤᠰ ᠃    ᠬᠤᠢ ᠽᠢ ᠪᠣᠯᠣᠨ ᠶᠢᠨ ᠢ ᠮᠢᠩ ᠬᠤᠷᠢᠮᠯᠠᠬᠤ ᠦᠶᠡᠰ ᠳᠡᠳᠦᠢ ᠶᠡᠭᠡ ᠵᠠᠷᠣᠯᠭ᠎ᠠ ᠪᠠᠶᠢᠭᠰᠠᠨ ᠦᠬᠡᠢ᠂ ᠲᠡᠷᠡ ᠬᠦ ᠵᠣᠭᠤᠰ ᠢᠶᠠᠨ ᠬᠠᠳᠠᠭᠠᠯᠠᠭᠠᠳ ᠶᠢᠨ ᠯᠢᠩ ᠤᠨ ᠵᠢᠯ ᠤᠨ ᠣᠢ ᠲᠣᠬᠢᠶᠠᠭᠰᠠᠨ ᠡᠳᠦᠷ ︽ᠬᠦᠬᠡᠮᠦ᠋ᠷᠡᠨ︾ ᠪᠦᠷᠢᠨ ᠪᠠᠷᠠᠭᠠᠲᠣ ᠳᠡᠯᠭᠡᠭᠦᠷ ᠲᠤ ᠵᠣᠭᠤᠰ ᠢᠶᠠᠨ ᠵᠠᠷᠣᠴᠠᠭᠤᠯᠣᠭᠠᠳ ᠂ ᠡᠨᠡ ᠬᠦ ᠭᠦᠯᠢᠭᠡᠨᠡᠵᠦ ᠬᠢᠯᠲᠠᠭᠠᠨᠠᠭᠰᠠᠨ ᠮᠣᠨᠳᠠᠭ ᠡᠳ᠋ ᠢ ᠭᠡᠷ ᠲᠤ ᠪᠠᠨ ᠴᠢᠷᠤᠵᠦ ᠠᠪᠴᠢᠷᠠᠭᠰᠠᠨ ᠶᠤᠮ᠃ ᠳᠡᠭᠦᠯᠳᠡᠷ ᠬᠦᠭᠵᠢᠮ ᠢ ᠭᠡᠷ ᠲᠤ ᠪᠠᠨ ᠠᠪᠴᠢᠷᠠᠭᠰᠠᠨ ᠤ ᠳᠠᠷᠠᠭ᠎ᠠ ᠳᠦᠷᠪᠡᠨ ᠵᠢᠯ ᠰᠣᠯᠠ ᠲᠠᠯᠪᠢᠭᠰᠠᠨ ᠶᠤᠮ᠃ ᠳᠦᠷᠪᠡᠨ ᠵᠢᠯ ᠤᠨ ᠳᠣᠳᠣᠷ᠎ᠠ ᠳᠡᠭᠦᠯᠳᠡᠷ ᠬᠦᠭᠵᠢᠮ ᠤᠨ ᠦᠨ᠎ᠡ ᠨᠢ ᠵᠢᠯ ᠳᠠᠷᠠᠭᠠᠯᠠᠨ ᠦᠰᠦᠭᠰᠡᠨ ᠠᠴᠠ ᠬᠤᠢ ᠽᠢ ᠦᠪᠡᠷ ᠤᠨ ᠲᠣᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠬᠢᠷᠠᠬᠠᠢ ᠬᠠᠷᠠᠴᠠ ᠪᠣᠯᠣᠨ ᠰᠢᠢᠳᠪᠦᠷᠢ ᠵᠣᠷᠢᠭ ᠲᠤ ᠪᠠᠨ ᠣᠮᠣᠭᠰᠢᠨ ᠵᠣᠷᠢᠭᠵᠢᠨ᠎ᠠ ᠃ ᠬᠡᠷᠪᠡ ᠶᠢᠨ ᠯᠢᠩ ᠤᠨ ᠲᠠᠪᠤ ᠨᠠᠰᠣᠯᠠᠬᠤ ᠦᠶᠡᠰ ᠬᠤᠳᠠᠯᠳᠣᠨ ᠠᠪᠬᠤ ᠳᠤ ᠬᠦᠷᠪᠡᠯ ᠰᠠᠨᠠᠭ᠎ᠠ ᠪᠠᠶᠢᠭᠠᠳ ᠣᠨᠤᠭ᠎ᠠ ᠬᠦᠷᠬᠦ ᠦᠬᠡᠢ ᠪᠣᠯᠣᠨ᠎ᠠ᠃     ᠶᠢᠨ ᠯᠢᠩ ᠲᠠᠪᠤᠨ ᠨᠠᠰᠣᠳᠠᠢ ᠳᠤ ᠪᠠᠨ ᠠᠩᠬ᠎ᠠ ᠳᠡᠭᠦᠯᠳᠡᠷ ᠬᠦᠭᠵᠢᠮ ᠤᠨ ᠬᠢᠴᠢᠶᠡᠯ ᠣᠷᠣᠬᠤ ᠦᠶᠡᠰ ᠪᠠᠭᠰᠢ ᠨᠢ ᠲᠡᠭᠦᠨ ᠤ ᠪᠢᠴᠢᠬᠠᠨ ᠭᠠᠷ ᠢ ᠠᠳᠬᠤᠨ ᠨᠠᠷᠢᠨ ᠨᠢᠮᠪᠠᠢ ᠠᠵᠢᠭᠯᠠᠨ ᠬᠠᠷᠠᠭᠠᠳ ᠂ ᠡᠨᠡ ᠨᠢ ᠨᠢᠭᠡᠨ ᠬᠤᠣᠰ ᠰᠣᠭᠳᠠ ᠰᠠᠶᠢᠬᠠᠨ ᠬᠦᠭᠵᠢᠮ ᠳᠠᠷᠤᠬᠤ ᠰᠠᠶᠢᠨ ᠭᠠᠷ ᠪᠣᠯᠬᠤ ᠶᠢ ᠮᠡᠳᠡᠷᠡᠪᠡ ᠃ ᠡᠵᠢ ᠨᠢ ᠪᠣᠯᠣᠭᠰᠠᠨ ᠬᠤᠢ ᠽᠢ ᠰᠡᠮ ᠪᠠᠶᠠᠷᠯᠠᠨ᠂ ᠪᠦᠷᠦᠭ ᠪᠠᠷᠤᠭ ᠤᠨ ᠳᠣᠮᠳᠠ ᠠᠷᠪᠠᠨ ᠵᠢᠯ ᠤᠨ ᠳᠠᠷᠠᠭ᠎ᠠ ᠨᠢᠭᠡᠨ ᠴᠠᠭᠠᠨ ᠵᠠᠰᠠᠯᠲᠤ ᠵᠠᠯᠠᠭᠤ ᠦᠬᠢᠨ ᠲᠡᠭᠦᠯᠳᠡᠷ ᠬᠦᠭᠵᠢᠮ ᠤᠨ ᠠᠷᠤ ᠳᠤ ᠲᠣᠬᠢᠳᠠᠢ ᠰᠠᠭᠤᠭᠠᠳ ᠂ ᠰᠠᠪᠬᠠᠨ ᠴᠠᠭᠠᠨ ᠠᠷᠪᠠᠨ ᠬᠤᠷᠣᠭᠤ ᠨᠢ ᠡᠷᠪᠡᠬᠡᠢ ᠮᠡᠲᠦ ᠪᠦᠵᠢᠨ ᠨᠢᠰᠴᠦ ᠭᠦᠭᠵᠢᠮ ᠤᠨ ᠠᠶᠠᠯᠭᠤ ᠨᠢ ᠪᠤᠯᠠᠭ ᠤᠨ ᠤᠰᠤ ᠁ ᠳᠠᠯᠠᠢ ᠶᠢᠨ ᠳᠠᠪᠠᠯᠭᠠᠨ ᠮᠡᠲᠦ ᠰᠠᠨᠠᠭᠳᠠᠨ᠎ᠠ᠃ ᠡᠶᠢᠮᠦᠷᠬᠦᠦ ᠲᠠᠭᠠᠮᠠᠭᠯᠠᠨ ᠪᠣᠳᠣᠯᠲᠠ ᠨᠢ ᠦᠨᠡᠬᠡᠷ ᠬᠦᠮᠦᠨ ᠢ ᠣᠮᠣᠭᠰᠢᠭᠤᠯᠣᠨ ᠵᠣᠷᠢᠭᠵᠢᠭᠤᠯᠣᠨ᠎ᠠ᠃    ᠬᠤᠢ ᠽᠢ ᠦᠬᠢᠨ ᠢᠶᠠᠨ ᠰᠣᠷᠭᠠᠵᠤ ᠬᠡᠯᠡᠭᠰᠡᠨ ᠨᠢ᠄ ︽ᠳᠡᠭᠦᠯᠳᠡᠷ ᠬᠦᠭᠵᠢᠮ ᠢ ᠰᠠᠶᠢᠲᠤᠷ ᠰᠣᠷᠬᠤ ᠪᠣᠯ ᠡᠵᠢ ᠶᠢᠨ ᠴᠢᠨᠢ ᠴᠢᠮ᠎ᠠ ᠳᠤ ᠲᠠᠯᠪᠢᠭᠰᠠᠨ ᠬᠠᠮᠤᠭ ᠤᠨ ᠶᠡᠭᠡ ᠬᠦᠰᠡᠯ ᠨᠠᠶᠢᠳᠠᠯᠭ᠎ᠠ︾ ᠭᠡᠪᠡ᠃    ᠡᠬᠢᠯᠡᠵᠦ ᠰᠣᠷᠣᠭᠰᠠᠨ ᠬᠠᠭᠠᠰ ᠵᠢᠯ ᠳᠤ ᠪᠠᠨ ᠠᠯᠢᠪᠠ ᠪᠦᠬᠦᠨ ᠢᠯᠭᠤᠮ ᠣᠷᠣᠭᠰᠢᠳᠠᠢ ᠂ ᠶᠢᠨ ᠯᠢᠩ ᠪᠣᠯ ᠴᠣᠪᠤᠭᠤ ᠳᠡᠭᠵᠢᠨ ᠬᠡᠦᠭᠡᠳ ᠲᠤᠯᠠ ᠪᠦᠬᠦᠯᠢ ᠴᠠᠭ ᠢᠶᠠᠷ ᠭᠦᠭᠵᠢᠮ ᠤᠨ ᠰᠠᠨᠳᠠᠯᠢ ᠳᠡᠭᠡᠷ᠎ᠡ ᠣᠭᠲᠣ ᠬᠦᠳᠡᠯᠬᠦ ᠰᠠᠭᠤᠬᠤ ᠨᠢ ᠲᠡᠭᠦᠨ ᠤ ᠠᠷᠭ᠎ᠠ ᠠᠭᠠᠰᠢ ᠶᠢ ᠪᠠᠷᠠᠭᠳᠠᠭᠤᠯᠣᠭᠰᠠᠨ ᠪᠠᠶᠢᠯ᠎ᠠ᠃ ᠵᠠᠶᠢᠯᠠᠨ ᠲᠣᠲᠠᠭᠠᠬᠤ ᠰᠠᠨᠠᠭ᠎ᠠ ᠴᠠᠭ ᠢᠮᠠᠭᠲᠠ ᠣᠷᠭᠤᠵᠣ ᠪᠠᠶᠢᠭᠰᠠᠨ ᠴᠦ ᠬᠤᠢ ᠽᠢ ᠶᠢᠨ ᠥᠭᠭᠦᠭᠰᠡᠨ ᠲᠠᠷᠣᠯᠲᠠ ᠠᠴᠠ ᠪᠣᠯᠵᠤ ᠶᠢᠨ ᠯᠢᠩ ᠶᠡᠭᠡ ᠪᠠᠷ ᠡᠰᠡᠷᠭᠦᠴᠡᠯ ᠲᠠᠯᠪᠢᠵᠤ ᠴᠢᠳᠠᠭ᠎ᠠ ᠦᠬᠡᠢ᠃ ᠵᠠᠷᠢᠮ ᠦᠶ᠎ᠡ ᠳᠤ ᠲᠡᠷᠡ ᠰᠣᠷᠴᠣ ᠴᠢᠳᠠᠬᠤ ᠦᠬᠡᠢ ᠪᠣᠯ ᠬᠤᠢ ᠽᠢ ᠠᠭᠤᠷᠯᠠᠨ ᠲᠡᠭᠦᠨ ᠢ ᠬᠠᠷᠢᠶᠠᠵᠤ ᠵᠣᠳᠣᠬᠤ ᠳᠤ ᠪᠠᠨ ᠬᠡᠳᠦ᠋ᠢᠪᠡᠷ ᠳᠣᠳᠣᠷ᠎ᠠ ᠪᠠᠨ ᠲᠦᠪᠳᠡᠬᠦ ᠦᠬᠡᠢ ᠪᠠᠶᠢᠭᠰᠠᠨ ᠴᠦ᠂ ᠬᠦᠭᠵᠢᠮ ᠰᠣᠷᠬᠤ ᠬᠡᠦᠭᠡᠳ ᠪᠦᠷ ᠡᠶᠢᠮᠦᠷᠬᠦᠦ ᠳᠠᠪᠳᠠᠯᠳᠠ ᠶᠢ ᠦᠩᠭᠡᠷᠡᠭᠡᠬᠦ ᠴᠢᠬᠤᠯᠠᠲᠠᠢ ᠶᠢ ᠪᠣᠳᠣᠭᠠᠳ ᠲᠠᠶᠢᠪᠣᠰᠢᠷᠠᠴᠢᠬᠠᠳᠠᠭ ᠪᠢᠯᠡ᠃ ᠬᠠᠭᠠᠰ ᠵᠢᠯ ᠤᠨ ᠳᠠᠷᠠᠭ᠎ᠠ ᠳᠡᠭᠦᠯᠳᠡᠷ ᠬᠦᠭᠵᠢᠮ ᠤᠨ ᠬᠢᠴᠢᠶᠡᠯ ᠤᠨ ᠠᠭᠤᠯᠭ᠎ᠠ ᠨᠢ ᠭᠦᠨᠵᠡᠭᠡᠶᠢᠷᠡᠵᠦ᠂ ᠬᠠᠭᠤᠳᠠᠰᠤ ᠳᠦᠭᠦᠷᠡᠩ ᠰᠢᠨᠠᠭᠠᠨ ᠬᠤᠷᠣᠬᠠᠢ ᠰᠢᠭ᠋ ᠨᠣᠲ ᠠᠷᠬᠠᠶᠢᠯᠠᠴᠠᠨ᠂ ᠶᠢᠨ ᠯᠢᠩ ᠨᠠᠰᠤ ᠬᠠᠷᠠᠬᠠᠨ ᠪᠠᠭ᠎ᠠ ᠤᠴᠢᠷ ᠠᠴᠠ ᠣᠩᠰᠢᠨ ᠲᠠᠨᠢᠬᠤ ᠴᠢᠳᠠᠪᠤᠷᠢ ᠪᠠᠷ ᠠᠨᠠᠢ᠂ ᠵᠠᠪᠠᠯ ᠬᠤᠢ ᠽᠢ ᠬᠠᠵᠠᠭᠤ ᠳᠤ ᠰᠠᠭᠤᠵᠤ ᠬᠠᠪᠰᠣᠷᠬᠤ ᠴᠢᠬᠤᠯᠠᠲᠠᠢ ᠪᠠᠶᠢᠵᠠᠢ ᠃ ᠬᠤᠢ ᠽᠢ ᠶᠡᠷᠦ ᠨᠣᠲ ᠰᠣᠷᠤᠭ᠎ᠠ ᠦᠬᠡᠢ ᠲᠤᠯᠠ ᠣᠳᠣ ᠪᠠᠭᠰᠢ ᠠᠴᠠ ᠪᠠᠨ ᠪᠠᠷᠢᠨ ᠰᠣᠷᠴᠣ ᠪᠠᠷᠢᠨ ᠵᠢᠭᠠᠬᠤ ᠪᠣᠯᠵᠤ᠂ ᠶᠣᠰᠣᠳᠠᠢ ᠨᠠᠶᠠ ᠬᠦᠷᠦᠭᠡᠳ ᠦᠯᠢᠶᠡᠵᠦ ᠳᠡᠯᠡᠳᠬᠦ ᠶᠢ ᠰᠣᠷᠣᠭᠰᠠᠨ ᠰᠢᠣᠬᠠᠨ ᠪᠣᠯᠵᠠᠢ᠃ ᠲᠣᠮᠣ ᠬᠦᠮᠦᠨ ᠶᠠᠭᠤᠮ᠎ᠠ ᠰᠣᠷᠬᠤ ᠨᠢ ᠬᠡᠦᠭᠡᠳ ᠠᠴᠠ ᠪᠠᠰᠠ ᠬᠦᠴᠢᠷ ᠂ ᠬᠤᠢ ᠽᠢ ᠡᠳᠦᠷ ᠪᠦᠷᠢ ᠬᠦᠵᠦᠭᠦᠦ ᠪᠠᠨ ᠰᠣᠨᠣᠭᠠᠨ ᠨᠣᠲ ᠢ ᠲᠣᠭᠠᠯᠠᠨ ᠲᠠᠭᠠᠮᠠᠭᠯᠠᠬᠤ ᠳᠤ ᠪᠠᠨ ᠡᠷᠬᠡ ᠦᠬᠡᠢ ᠪᠣᠬᠢᠨᠢᠳᠤᠨ᠎ᠠ᠃    ᠪᠣᠬᠢᠨᠢᠳᠤᠬᠤ ᠲᠠᠢ ᠵᠡᠷᠭᠡ ᠶᠢᠨ ᠯᠢᠩ ᠥᠭᠡᠳᠡ ᠨᠢᠳᠦ ᠡᠷᠡᠶᠢᠯᠭᠡᠨ ᠲᠡᠭᠦᠨ ᠢ ᠪᠢᠳᠠᠭᠤ ᠭᠡᠮᠡᠨ ᠭᠤᠮᠣᠷᠬᠠᠵᠤ᠂ ᠬᠦᠴᠦ ᠲᠠᠯᠪᠢᠬᠤ ᠦᠬᠡᠢ ᠭᠡᠮᠡᠨ ᠵᠢᠮᠡᠯᠡᠵᠦ ᠦᠪᠡᠷ ᠢᠶᠠᠨ ᠨᠣᠲ ᠲᠠᠨᠢᠬᠤ ᠦᠬᠡᠢ ᠳᠡᠭᠡᠷ᠎ᠡ ᠪᠠᠨ ᠡᠵᠢ ᠪᠠᠨ ᠴᠢᠷᠦᠭᠳᠡᠭᠦᠯᠵᠦ ᠨᠣᠲ ᠲᠠᠨᠢᠬᠤ ᠭᠡᠵᠦ ᠲᠦᠪᠡᠭᠳᠡᠭᠦᠯᠦᠨ᠎ᠡ ᠭᠡᠵᠦ ᠬᠡᠯᠡᠨ᠎ᠡ᠃ ᠶᠢᠨ ᠯᠢᠩ ᠡᠵᠢ ᠳᠤ ᠪᠠᠨ ᠬᠠᠷᠢᠶᠠᠭᠳᠠᠭᠠᠳ ᠶᠠᠷᠢᠶᠠᠨ ᠦᠬᠡᠢ ᠭᠡᠮᠦᠷ ᠭᠤᠮᠣᠷ ᠪᠣᠯᠵᠤ ᠂ ᠭᠦᠭᠵᠢᠮ ᠤᠨ ᠰᠠᠨᠳᠠᠯᠢ ᠳᠡᠭᠡᠷ᠎ᠡ ᠰᠠᠭᠤᠭᠠᠳ ᠤᠯᠠᠮ ᠶᠡᠭᠡ ᠪᠠᠴᠢᠮᠳᠠᠨ ᠰᠠᠨᠳᠣᠷᠣᠭᠰᠠᠭᠠᠷ ᠭᠦᠭᠵᠢᠮ ᠢᠶᠠᠨ ᠠᠬᠢᠨ ᠳᠠᠬᠢᠨ ᠪᠣᠷᠣᠭᠤ ᠳᠠᠷᠤᠵᠤ᠂ ᠪᠣᠷᠣᠭᠤᠳᠠᠬᠤ ᠳᠣᠲᠣᠮ ᠬᠠᠷᠢᠶᠠᠭᠳᠠᠨ ᠂ ᠡᠶᠢᠨ ᠬᠦ ᠬᠤᠷᠯᠤ ᠨᠢ ᠪᠣᠷᠣᠭᠤ ᠪᠠᠷ ᠡᠷᠭᠢᠭᠡᠳ᠂ ᠡᠵᠢ ᠦᠬᠢᠨ ᠬᠤᠶᠠᠭᠤᠯᠠ ᠪᠠᠨ ᠪᠣᠷᠣᠭᠤ ᠵᠦᠭ ᠲᠤ ᠪᠠᠨ ᠬᠠᠨᠳᠣᠵᠠᠢ᠃
ᠢᠷᠡᠯᠲᠡ᠄ ︽ᠬᠡᠤᠬᠡᠳ ᠬᠦᠮᠤᠵᠢᠬᠦᠯᠦᠭᠰᠡᠨ ᠦᠯᠢᠬᠡᠷ︾ ᠨᠤᠮ