ᠵᠢᠶᠠᠩᠨᠠᠨ ᠤᠷᠤᠨ ᠤ ᠡᠪᠦᠯ ᠤᠨ ᠦᠵᠡᠮᠵᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/4
                          ᠵᠢᠶᠠᠩᠨᠠᠨ ᠤᠷᠤᠨ ᠤ ᠡᠪᠦᠯ ᠤᠨ ᠦᠵᠡᠮᠵᠢ                                          ᠢᠦᠢ ᠳ᠋ᠠ ᠹᠦ᠋ ᠵᠤᠬᠢᠶᠠᠪᠠ                                          ᠡᠷᠳᠡᠨᠢᠬᠠᠳᠠ ᠣᠷᠴᠢᠭᠤᠯᠪᠠ    ᠤᠮᠠᠷᠠᠳᠤ ᠤᠷᠤᠨ ᠳᠤ ᠡᠪᠦᠯᠵᠢᠵᠦ ᠦᠩᠭᠡᠷᠡᠭᠰᠡᠨ ᠬᠦᠮᠦᠰ ᠪᠦᠷ ᠴᠦ ᠵᠤᠤᠬ᠎ᠠ ᠳᠤᠭᠤᠷᠢᠨ ᠴᠠᠢ ᠤᠤᠭᠤᠵᠤ᠂ ᠬᠤᠨᠢᠨ ᠮᠢᠬ᠎ᠠ ᠬᠦᠰᠭᠦᠯᠡᠨ᠂ ᠯᠤᠬᠠᠱᠧᠩ ᠢᠳᠡᠵᠦ᠂ ᠳᠤᠭᠰᠢᠨ ᠬᠠᠷ᠎ᠠ ᠪᠠᠯᠭᠤᠭᠰᠠᠨ ᠳᠤᠷᠠᠰᠤᠮᠵᠢ ᠲᠠᠢ ᠶᠤᠮ᠃ ᠭᠠᠵᠠᠷ ᠤᠨ ᠵᠤᠤᠬ᠎ᠠ᠂ ᠬᠠᠯᠠᠭᠤᠨ ᠬᠠᠨᠵᠦ ᠲᠠᠢ ᠭᠡᠷ ᠪᠦᠯᠢ ᠪᠤᠯ ᠦᠷᠦᠭᠡᠨ ᠤ ᠭᠠᠳᠠᠨ᠎ᠠ ᠭᠡᠳᠦᠨ ᠲᠤᠬᠤᠢ ᠴᠠᠰᠦ ᠤᠷᠤᠵᠤ᠂ ᠠᠶᠤᠩᠭ᠎ᠠ ᠴᠠᠬᠢᠯᠭᠠᠨ ᠬᠡᠮᠡᠷ ᠳᠤᠭᠰᠢᠨ ᠰᠢᠭᠤᠷᠭ᠎ᠠ ᠰᠢᠭᠤᠷᠠᠵᠤ ᠪᠠᠶᠢᠬᠤ ᠶᠢ ᠪᠦᠷ ᠳᠤᠭᠤᠬᠤ ᠦᠬᠡᠢ᠂ ᠢᠴᠡᠭᠡᠯᠡᠭᠰᠡᠨ ᠭᠡᠮᠡᠷ ᠦᠷᠦᠭᠡᠨ ᠳᠤ ᠪᠠᠨ ᠬᠤᠶᠠᠷ ᠭᠤᠷᠪᠠᠨ ᠰᠠᠷ᠎ᠠ ᠬᠤᠷᠭᠤᠳᠠᠬᠤ ᠨᠢ ᠬᠠᠷᠢᠨ ᠪᠦᠷ ᠬᠠᠪᠤᠳᠠᠢ᠃ ᠨᠠᠰᠤᠳᠠᠶᠢᠴᠤᠳ ᠢ ᠪᠠᠶᠢᠴᠢᠬ᠎ᠠ᠂ ᠢᠰᠢᠭᠡ ᠬᠡᠮᠡᠷ ᠳᠤᠭᠯᠠᠵᠤ ᠨᠠᠭᠠᠳᠬᠤ ᠳᠤᠷᠠᠳᠠᠢ ᠵᠢᠭᠠᠯ ᠬᠡᠦᠬᠡᠳ ᠴᠦ ᠡᠪᠦᠯ ᠴᠠᠭ  ᠢᠶᠠᠨ ᠳᠤᠷᠠᠰᠤᠨ ᠦᠬᠡᠶᠢᠯᠡᠳᠡᠭ᠃ ᠣᠴᠢᠷ ᠨᠢ ᠡᠨᠡ ᠳᠤᠮᠳᠠ ᠠᠯᠢᠮ᠎ᠠ ᠵᠢᠮᠢᠰ ᠪᠠᠭ᠎ᠠ ᠰᠠᠭ᠎ᠠ ᠤᠯᠵᠤ ᠠᠮᠳᠠᠯᠠᠬᠤ ᠪᠦᠭᠡᠳ ᠪᠢᠲᠡᠭᠦᠨ᠂ ᠰᠠᠷ᠎ᠠ ᠰᠢᠨ᠎ᠡ ᠭᠡᠬᠦ ᠨᠢᠵᠢᠭᠢᠷ ᠡᠳᠦᠷ ᠤᠳ ᠪᠠᠶᠢᠳᠠᠭ ᠶᠤᠮᠰᠠᠨ᠃    ᠭᠡᠳᠡᠯ᠎ᠡ ᠵᠢᠶᠠᠩᠨᠠᠨ ᠭᠠᠵᠠᠷ ᠪᠤᠯ ᠤᠨᠳᠤᠤ ᠪᠠᠶᠢᠳᠠᠭ ᠶᠤᠮ᠃ ᠶᠢᠰᠦ ᠤᠷᠤᠴᠢᠬᠠᠭᠰᠠᠨ ᠪᠠᠶᠢᠳᠠᠯ᠎ᠠ ᠮᠤᠳᠤᠨ ᠤ ᠨᠠᠪᠴᠢ ᠨᠡᠯᠦ ᠳᠤ ᠪᠠᠨ ᠬᠦᠬᠡ᠃ ᠠᠷᠦ ᠭᠠᠵᠠᠷ ᠤᠨ ᠬᠦᠢᠳᠡᠨ ᠰᠠᠯᠬᠢ ᠬᠠᠶᠠ ᠨᠢᠬᠡ ᠢᠷᠡᠳᠡᠭ ᠠᠪᠠᠴᠤ᠂ ᠨᠢᠬᠡ ᠬᠤᠶᠠᠷ ᠡᠳᠦᠷ ᠤᠨ ᠯᠠ ᠤᠴᠢᠷ᠃ ᠵᠢᠪᠠᠷ ᠲᠤᠨᠵᠤ᠂ ᠡᠭᠦᠯᠡ ᠠᠷᠢᠯᠤᠭᠠᠳ᠂ ᠵᠡᠬᠡᠯᠢ ᠳᠦᠭᠦᠷᠡᠩ ᠨᠠᠪᠴᠢ ᠪᠦᠷᠬᠦᠬᠦ ᠦᠶᠡᠰ᠂ ᠪᠤᠷᠤ ᠬᠡᠦᠬᠡᠨ ᠤ ᠬᠠᠴᠠᠷ ᠲᠤ ᠪᠠᠨ ᠳᠦᠷᠭᠢᠭᠰᠡᠨ ᠤᠸ᠎ᠠ ᠮᠡᠳᠦ ᠦᠷᠯᠦᠭᠡ ᠶᠢᠨ ᠬᠢᠷᠠᠭᠤ ᠨᠢ ᠮᠠᠨᠳᠤᠬᠤ ᠨᠠᠷᠠᠨ ᠪᠠ ᠰᠢᠪᠠᠭᠤᠳ ᠤᠨ ᠡᠭᠡᠰᠢᠭᠯᠡᠭᠡᠨ ᠢ ᠳᠠᠭᠠᠵᠤ᠂ ᠭᠠᠵᠠᠷ ᠳᠦᠭᠦᠷᠡᠩ ᠴᠢᠬᠢᠭ ᠤᠨ ᠦᠨᠦᠷ ᠰᠡᠩᠬᠢᠨᠡᠭᠦᠯᠳᠡᠭ᠃ ᠭᠦᠭᠰᠢᠳ ᠨᠢᠯᠬᠠᠰ ᠡᠨᠡ ᠦᠶᠡᠰ ᠦᠷᠦᠭᠡᠨ ᠠᠴᠠ ᠪᠠᠨ ᠪᠤᠯᠳᠠᠶᠢᠵᠦ᠂ ᠴᠤᠩᠬᠤ ᠳᠤᠰᠢᠶ᠎ᠠ ᠨᠢᠷᠤᠭᠤ ᠪᠠᠨ ᠨᠠᠷᠠᠨ ᠳᠤ ᠡᠬᠡᠬᠡᠵᠦ᠂ ᠦᠷᠦᠭᠡᠨ ᠤ ᠭᠠᠳᠠᠨᠠᠬᠢ ᠬᠠᠪᠤ ᠴᠡᠩᠭᠡᠯ ᠢ ᠡᠳ᠋ᠯᠡᠳᠡᠭ᠃ ᠵᠢᠶᠠᠩᠨᠠᠨ ᠤᠷᠤᠨ ᠤ ᠡᠪᠦᠯ ᠤᠨ ᠡᠨᠡ ᠬᠦ ᠦᠵᠡᠮᠵᠢ ᠰᠠᠶᠢᠬᠠᠨ ᠪᠢᠰᠢ ᠤᠤ︖    ᠵᠢᠶᠠᠩᠨᠠᠨ ᠤᠷᠤᠨ ᠳᠤ ᠳᠦᠷᠦᠵᠦ ᠦᠰᠦᠭᠰᠡᠨ ᠨᠠᠳᠠ ᠳᠤ᠂ ᠬᠡᠦᠬᠡᠳ ᠦᠶ᠎ᠡ ᠶᠢᠨ ᠵᠢᠶᠠᠩᠨᠠᠨ ᠭᠠᠵᠠᠷ ᠤᠨ ᠡᠪᠦᠯ ᠤᠨ ᠰᠠᠭᠤᠭᠳᠠᠯ ᠶᠡᠭᠡ ᠭᠦᠨ ᠪᠠᠶᠢᠵᠦ᠂ ᠬᠡᠳᠦ᠋ᠢᠪᠡᠷ ᠠᠯᠭᠤᠷ ᠢᠶᠠᠷ ᠢᠳᠡᠷ ᠨᠠᠰᠤᠨ ᠳᠤ ᠤᠷᠤᠵᠤ᠂ ᠪᠢᠴᠢᠭ ᠤᠩᠰᠢᠵᠦ ᠨᠤᠮ ᠪᠢᠴᠢᠳᠡᠭ ᠬᠦᠮᠦᠨ ᠤ ᠬᠡᠪ ᠨᠠᠮᠪᠠ ᠵᠤᠵᠠᠭᠠᠷᠠᠨ᠂ ᠬᠦᠨ ᠨᠠᠮᠤᠷ ᠤᠨ ᠦᠳᠭᠡᠨ ᠰᠢᠷᠭᠠᠯ ᠦᠩᠭᠡᠨ  ᠳᠤ ᠬᠠᠶᠢᠷᠠᠳᠠᠢ ᠪᠤᠯᠤᠭᠰᠠᠨ ᠠᠪᠠᠴᠤ᠂ ᠵᠢᠶᠠᠩᠨᠠᠨ ᠭᠠᠵᠠᠷ ᠤᠨ ᠡᠪᠦᠯ ᠤᠨ ᠦᠩᠬᠡ ᠭᠡᠵᠦ ᠤᠮᠠᠷᠠᠳᠤ ᠤᠷᠤᠨ ᠤ ᠵᠤᠨ ᠤ ᠰᠦᠨᠢ ᠠᠴᠠ ᠳᠤᠯᠢᠳᠠᠮᠷ ᠦᠬᠡᠢ ᠷᠤᠮᠠᠨᠲ᠋ᠢᠭ ᠭᠡᠶᠢᠪᠦᠷ ᠰᠠᠨᠠᠭᠳᠠᠭᠠᠳ ᠪᠠᠶᠢᠬᠤ ᠪᠤᠯᠤᠯ᠎ᠠ᠃    ᠪᠢ ᠪᠠᠰᠠ ᠹᠦᠵᠢᠶᠠᠨ᠂ ᠭᠤᠸᠠᠩᠳᠦ᠋ᠩ ᠵᠡᠷᠭᠡ ᠭᠠᠵᠠᠷ ᠬᠦᠷᠴᠦ ᠦᠩᠭᠡᠷᠡᠭᠰᠡᠨ᠃ ᠳᠡᠨᠳᠡᠬᠢ ᠶᠢᠨ ᠡᠪᠦᠯ ᠭᠡᠵᠦ ᠮᠠᠰᠢ ᠠᠴᠠ ᠮᠠᠰᠢ ᠳᠤᠯᠠᠭᠠᠨ᠃ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠰᠠᠷ᠎ᠠ ᠰᠢᠨ᠎ᠡ ᠪᠤᠯᠤᠮᠠᠷ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠳᠠᠯ᠎ᠠ ᠨᠢᠮᠬᠡᠨ ᠱᠠ ᠡᠮᠦᠰᠴᠢᠭᠡᠭᠰᠡᠨ ᠬᠦᠮᠦᠰ ᠪᠠᠶᠢᠭᠠᠳ ᠪᠠᠶᠢᠳᠠᠭ᠃ ᠭᠦᠳᠡᠭᠡ ᠭᠠᠳᠠᠭ᠎ᠠ ᠵᠠᠮᠪᠠᠭ᠎ᠠ ᠬᠤᠷᠤᠭ᠎ᠠ ᠳᠠᠭᠠᠭᠠᠳ ᠪᠠᠰᠠ ᠨᠠᠮᠤᠷ ᠴᠠᠭ ᠤᠨ ᠴᠡᠴᠡᠭ ᠭᠤᠷᠤᠯᠵᠠᠴᠢᠬᠠᠭᠰᠠᠨ ᠬᠠᠷᠠᠭᠳᠠᠳᠠᠭ᠃ ᠠᠶᠤᠩᠭ᠎ᠠ ᠨᠢᠵᠢᠬᠢᠨᠡᠵᠦ᠂ ᠳᠤᠭᠰᠢᠨ ᠪᠤᠷᠤᠭᠠᠨ ᠤᠷᠤᠭᠰᠠᠨ ᠤ ᠳᠠᠷᠠᠭ᠎ᠠ ᠵᠢᠭᠠᠬᠠᠨ ᠬᠦᠢᠳᠡᠨ ᠪᠤᠯᠵᠤ ᠠᠪᠳᠠᠭ ᠠᠪᠠᠴᠤ ᠬᠦᠮᠦᠰ ᠵᠦᠪᠬᠡᠨ ᠨᠢᠬᠡ ᠵᠠᠬ᠎ᠠ ᠭᠠᠳᠠᠷ ᠳᠡᠪᠡᠯ ᠳᠠᠪᠬᠤᠷᠯᠠᠵᠤ ᠡᠮᠦᠰᠬᠦ ᠯᠠ ᠳᠡᠳᠦᠢ᠃ ᠹᠦᠵᠢᠶᠠᠨ᠂ ᠭᠤᠸᠠᠩᠳᠦ᠋ᠩ ᠵᠡᠷᠭᠡ ᠭᠠᠵᠠᠷ ᠠᠷᠠᠰᠤᠨ ᠳᠡᠪᠡᠯ ᠬᠦᠪᠦᠩ ᠤᠯᠤᠩᠳᠠᠢ ᠡᠮᠦᠰᠬᠦ ᠤᠴᠢᠷ ᠭᠡᠵᠦ ᠶᠡᠷᠦ ᠪᠠᠶᠢᠬᠤ ᠦᠬᠡᠢ᠃ ᠡᠶᠢᠮᠦᠷᠬᠦᠦ ᠮᠠᠰᠢ ᠡᠮᠦᠨᠡᠳᠦ ᠶᠢᠨ ᠠᠭᠤᠷ ᠠᠮᠢᠰᠬᠤᠯ ᠭᠡᠵᠦ ᠮᠢᠨᠦ ᠭᠡᠯᠡᠵᠦ ᠪᠠᠶᠢᠬᠤ ᠵᠢᠶᠠᠩᠨᠠᠨ ᠤᠷᠤᠨ ᠤ ᠡᠪᠦᠯ ᠤᠨ ᠪᠠᠶᠢᠳᠠᠯ ᠪᠢᠰᠢ᠂ ᠵᠦᠪᠬᠡᠨ ᠡᠮᠦᠨ᠎ᠡ ᠤᠷᠤᠨ ᠤ ᠤᠷᠳᠤ ᠬᠠᠪᠤᠷ ᠳᠡᠳᠦᠢ᠂ ᠡᠰᠡᠭᠦᠯ᠎ᠡ ᠬᠠᠪᠤᠷ ᠪᠤᠶᠤ ᠨᠠᠮᠤᠷ ᠤᠨ ᠦᠷᠬᠦᠯᠵᠢᠯᠡᠯ᠃    ᠵᠢᠶᠠᠩᠨᠠᠨ ᠭᠠᠵᠠᠷ ᠤᠨ ᠬᠦᠷᠦᠰᠦ ᠰᠢᠷᠤᠢ ᠦᠶᠦᠭ ᠪᠠᠶᠠᠨ ᠪᠦᠭᠡᠳ ᠵᠦᠬᠡᠯᠡᠨ ᠴᠢᠭᠢᠭᠯᠡᠭ ᠪᠠᠶᠢᠳᠠᠭ ᠤᠴᠢᠷ  ᠠᠴᠠ ᠳᠤᠯᠠᠭᠠᠨ ᠠᠭᠠᠷ ᠢ ᠬᠠᠳᠠᠭᠠᠯᠠᠵᠤ᠂ ᠤᠷᠭᠤᠮᠠᠯ ᠪᠤᠳᠠᠰ ᠢ ᠢᠳᠡᠰᠢᠭᠦᠯᠵᠤ ᠪᠠᠶᠢᠳᠠᠭ᠃ ᠡᠶᠢᠮᠦ ᠠᠴᠠ ᠬᠤᠯᠤᠰᠤᠨ ᠤ ᠤᠩᠭᠠᠷᠢᠯ ᠶᠢᠰᠦ ᠤᠷᠤᠳᠠᠯ᠎ᠠ ᠬᠦᠬᠡ ᠪᠠᠷ ᠢᠶᠠᠨ ᠪᠠᠶᠢᠵᠤ᠂ ᠮᠤᠮᠢᠵᠢ ᠭᠤᠷᠪᠠᠨ ᠰᠠᠷ᠎ᠠ ᠠᠴᠠ ᠳᠡᠭᠡᠭᠰᠢ ᠤᠯᠠᠭᠠᠨ ᠢᠶᠠᠷ ᠢᠶᠠᠨ ᠪᠠᠶᠢᠳᠠᠭ᠃ ᠴᠢᠶᠠᠨ ᠳᠠᠩ ᠵᠢᠶᠠᠩ ᠮᠦᠷᠡᠨ ᠤ ᠬᠤᠶᠠᠷ ᠡᠷᠭᠢ ᠳᠤ ᠬᠢ ᠪᠠᠭᠳᠠᠷ ᠴᠠᠢ ᠶᠢᠨ ᠮᠤᠳᠤ ᠨᠤᠭᠤᠳ ᠨᠠᠪᠴᠢ ᠨᠢ ᠵᠤᠯᠭᠠᠷᠠᠭᠰᠠᠨ ᠪᠠᠶᠢᠳᠠᠯ᠎ᠠ ᠴᠠᠭᠠᠨ ᠴᠦᠮᠦᠭᠡ ᠨᠢ ᠮᠤᠳᠤᠨ ᠨᠠᠮᠠᠭᠠᠨ ᠳᠤ ᠪᠠᠨ ᠨᠠᠭᠠᠯᠳᠤᠵᠤ᠂ ᠨᠠᠷᠠᠨ ᠳᠤ ᠭᠢᠯᠳᠠᠭᠠᠨᠠᠬᠤ ᠨᠢ ᠳᠡᠷᠢᠭᠦᠯᠡᠭᠴᠢ ᠴᠡᠴᠡᠭ ᠤᠨ ᠪᠠᠭ ᠮᠡᠳᠦ ᠭᠤᠴᠤ ᠬᠠᠷᠠᠭᠳᠠᠳᠠᠭ᠃ ᠡᠪᠡᠰᠦᠨ ᠤ ᠦᠩᠬᠡ ᠵᠢᠭᠠᠬᠠᠨ ᠰᠢᠷᠭᠠᠯᠳᠤᠭᠰᠠᠨ ᠠᠪᠠᠴᠤ᠂ ᠭᠠᠵᠠᠷ ᠤᠨ ᠤᠭ ᠢᠶᠠᠷ ᠨᠡᠯᠦ ᠳᠤ ᠪᠠᠨ ᠨᠤᠭᠤᠭᠠᠨ ᠪᠠᠶᠢᠵᠤ᠂ ᠭᠡᠭᠡᠷ᠎ᠡ ᠶᠢᠨ ᠭᠠᠯ ᠳᠤ ᠰᠢᠳᠠᠭᠳᠠᠵᠤ ᠳᠠᠭᠤᠰᠬᠤ ᠦᠬᠡᠢ ᠮᠦᠷᠳᠡᠭᠡᠨ ᠭᠦᠢᠳᠡᠨ ᠰᠠᠯᠬᠢᠨ ᠳᠤ ᠴᠦ ᠬᠡᠶᠢᠰᠴᠦ ᠤᠨᠠᠬᠤ ᠦᠬᠡᠢ ᠪᠠᠶᠢᠳᠠᠭ ᠪᠢᠯᠠ᠃ ᠭᠡᠷᠪᠡ ᠰᠠᠯᠬᠢᠨ ᠡᠶᠡᠪᠡᠷᠭᠦᠦ᠂ ᠨᠠᠷᠠᠨ ᠳᠤᠩᠭᠠᠯᠠᠭ ᠰᠠᠶᠢᠬᠠᠨ ᠡᠳᠦᠷ ᠳᠤᠬᠢᠶᠠᠯᠳᠤᠵᠤ᠂ ᠭᠠᠭᠴᠠᠭᠠᠷ ᠳᠡᠭᠦᠷᠬᠡ ᠶᠢᠨ ᠭᠠᠳᠠᠨ᠎ᠠ ᠬᠡᠰᠦᠭᠦᠴᠢᠯᠡᠨ ᠵᠤᠭᠠᠯᠠᠬᠤᠯᠠᠷ᠂ ᠴᠡᠯᠮᠡᠭ ᠳᠡᠭᠷᠢ᠂ ᠪᠢᠳᠤᠷᠶᠠᠨ ᠤᠭᠳᠠᠷᠭᠤᠢ ᠶᠢᠨ ᠳᠤᠤᠷ᠎ᠠ ᠡᠪᠦᠯ ᠴᠠᠭ ᠤᠨ ᠭᠦᠢᠳᠡᠨ ᠵᠢᠭᠡᠬᠦᠨ ᠤᠭᠳᠤ ᠰᠠᠨᠠᠭᠳᠠᠬᠤ ᠦᠬᠡᠢ᠂ ᠬᠠᠷᠢᠨ ᠡᠬᠡ ᠪᠠᠶᠢᠭᠠᠯᠢ ᠳᠤ ᠪᠠᠨ ᠵᠢᠷᠮᠤᠰᠤᠯᠡᠭᠰᠡᠨ ᠰᠤᠷᠭᠤᠭ ᠬᠦᠭᠡᠷᠦᠬᠦᠨ ᠠᠮᠢ ᠨᠠᠰᠤᠨ ᠤ ᠠᠭᠤᠷ ᠠᠮᠢᠰᠬᠤᠭ᠎ᠠ ᠶᠢ ᠤᠯᠵᠤ ᠦᠨᠦᠷᠳᠦᠳᠡᠭ ᠰᠠᠨ᠃ ︽ ᠡᠪᠦᠯ ᠪᠤᠯᠴᠢᠬᠠᠯ᠎ᠠ᠂ ᠬᠠᠪᠤᠷ ᠪᠠᠰᠠ ᠬᠤᠯᠠ ᠭᠡᠵᠦ ᠤᠤ︖︾ ᠭᠡᠳᠡᠭ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠰᠠᠶᠢᠬᠠᠨ ᠢᠭᠳᠦᠯᠦᠯ ᠵᠢᠶᠠᠩᠨᠠᠨ ᠤᠷᠤᠨ ᠤ ᠠᠭᠤᠯᠠ ᠤᠰᠤᠨ ᠳᠤ ᠨᠡᠩ ᠳᠤᠬᠢᠷᠠᠬᠤ ᠶᠤᠮᠰᠠᠨ᠃    ᠡᠪᠦᠯ ᠴᠠᠭ ᠤᠨ ᠭᠦᠳᠡᠭᠡ ᠵᠤᠭᠠᠴᠠᠯ ᠢ ᠶᠠᠷᠢᠬᠤᠯᠠᠷ᠂ ᠡᠨᠡ ᠭᠡᠵᠦ ᠶᠤᠰᠤᠳᠠᠢ ᠵᠢᠶᠠᠩᠨᠠᠨ ᠨᠤᠳᠤᠭ ᠠᠴᠠ ᠠᠳᠡ ᠤᠷᠤᠰᠢᠭᠴᠢᠳ ᠲᠤ ᠪᠠᠨ ᠤᠯᠭᠤᠭᠰᠠᠨ ᠡᠨᠡᠷᠢ ᠤᠯᠭᠤᠮᠵᠢ ᠭᠡᠵᠦ ᠶᠠᠷᠢᠭᠤᠰᠢᠳᠠᠢ᠃ ᠴᠠᠰᠦ ᠮᠦᠰᠦᠨ ᠤ ᠬᠤᠴᠢᠮᠠᠯ ᠪᠤᠯᠤᠭᠰᠠᠨ ᠤᠮᠠᠷᠠᠳᠤ ᠤᠷᠤᠨ ᠤ ᠬᠦᠮᠦᠰ ᠲᠤ ᠠᠪᠴᠦ ᠬᠡᠯᠡᠪᠡᠯ᠂ ᠡᠶᠢᠮᠦ ᠰᠠᠶᠢᠬᠠᠨ ᠪᠤᠶᠠᠨ ᠵᠠᠪᠰᠢᠶᠠᠨ ᠢ ᠨᠠᠰᠤᠨ ᠲᠤᠷᠰᠢᠳᠠ ᠤᠯᠵᠤ ᠡᠳ᠋ᠯᠡᠬᠦ ᠦᠬᠡᠢ᠃ ᠭᠧᠷᠮᠠᠨ ᠤ ᠡᠪᠦᠯ ᠶᠠᠮᠠᠷ ᠪᠠᠶᠢᠳᠠᠭ ᠢ ᠪᠢ ᠮᠡᠳᠡᠬᠦ ᠦᠬᠡᠢ᠂ ᠭᠡᠳᠡᠯ᠎ᠡ ᠤᠯᠠᠩᠬᠢ ᠵᠤᠬᠢᠶᠠᠯᠴᠢᠳ ᠤᠨ ︽ᠫᠠᠽᠢᠶᠧᠷᠭᠠᠩ︾ ᠭᠡᠳᠡᠭ ᠦᠬᠡ ᠪᠠᠷ ᠰᠡᠳᠦᠪᠯᠡᠵᠦ ᠵᠤᠬᠢᠶᠠᠯ ᠪᠢᠴᠢᠳᠡᠭ ᠵᠠᠩᠰᠢᠯ  ᠠᠴᠠ ᠦᠵᠡᠪᠡᠯ᠂ ᠭᠧᠷᠮᠠᠨ ᠤ ᠡᠮᠦᠨ᠎ᠡ ᠪᠦᠰᠡ ᠨᠤᠳᠤᠭ ᠤᠨ ᠳᠦᠷᠪᠡᠨ ᠤᠯᠠᠷᠢᠯ ᠤᠨ ᠰᠤᠯᠢᠭᠳᠠᠯ ᠪᠠᠷᠤᠭ ᠮᠠᠨ ᠤ ᠵᠢᠶᠠᠩᠨᠠᠨ ᠤᠷᠤᠨ ᠲᠠᠢ ᠪᠠᠷᠤᠭᠴᠠᠭᠠᠬᠤ ᠰᠢᠭ᠋ ᠳ᠋ᠡ᠃ ᠠᠷᠪᠠᠨ ᠶᠢᠰᠦᠳᠦᠭᠡᠷ ᠵᠠᠭᠤᠨ ᠤ ᠲᠡᠷᠡ ᠬᠦ ᠨᠤᠳᠤᠭ ᠤᠰᠤᠨ  ᠤ ᠰᠢᠯᠦᠭᠴᠢ ᠬᠡᠮᠡᠭᠳᠡᠭᠰᠡᠨ ᠫᠧᠲ᠋ᠧᠷᠷᠣᠰᠧᠭᠭᠧᠷ ︵1843 — — 1918︶ ᠪᠠᠷ ︽ ᠵᠤᠭᠠᠯᠠᠨ ᠭᠡᠰᠦᠭᠦᠢ︾ ᠭᠡᠬᠦ ᠰᠡᠳᠤᠪ ᠢᠶᠠᠷ ᠵᠤᠬᠢᠶᠠᠯ ᠪᠢᠴᠢᠭᠰᠡᠨ ᠨᠢ ᠨᠡᠩ ᠠᠷᠪᠢᠨ ᠪᠠᠶᠢᠳᠠᠭ᠃ ᠭᠡᠬᠦ ᠳᠤ ᠪᠠᠨ ᠳᠡᠭᠦᠨ ᠤ ᠪᠢᠷ ᠤᠨ ᠳᠤᠤᠷᠠᠬᠢ ᠦᠵᠡᠮᠵᠢ ᠪᠠᠶᠢᠳᠠᠯ ᠭᠡᠵᠦ ᠳᠤᠮᠳᠠᠳᠤ ᠤᠯᠤᠰ ᠤᠨ ᠵᠢᠶᠠᠩᠰᠦ᠂ ᠵᠧᠵᠢᠶᠠᠩ ᠤᠨ ᠠᠭᠤᠯᠠ ᠤᠰᠤᠨ ᠤ ᠦᠩᠬᠡ ᠦᠵᠡᠮᠵᠢ ᠲᠠᠢ ᠮᠠᠰᠢ ᠳᠦᠰᠦᠭᠡᠷᠭᠡᠭ ᠳ᠋ᠡ᠃    ᠵᠢᠶᠠᠩᠨᠠᠨ ᠤᠷᠤᠨ ᠤᠰᠤ ᠮᠦᠷᠡᠨ ᠦᠯᠡᠮᠵᠢ ᠪᠦᠭᠡᠳ ᠶᠡᠭᠡ ᠳᠠᠯᠠᠢ ᠠᠴᠠ ᠤᠶᠢᠷᠠᠬᠠᠨ ᠤᠴᠢᠷ ᠨᠠᠭᠤᠷ ᠴᠦᠬᠦᠷᠤᠮ ᠠᠷᠪᠢᠨ᠂ ᠴᠢᠭᠢᠭ ᠤᠨ ᠠᠮᠢᠰᠬᠤᠯ ᠳᠡᠭᠦᠯᠳᠡᠷ ᠪᠠᠶᠢᠳᠠᠭ ᠳᠤᠯᠠ ᠡᠪᠦᠯ ᠪᠤᠯᠬᠤᠯᠠᠷ ᠴᠦ ᠪᠠᠶᠢᠨ ᠪᠠᠶᠢᠨ ᠰᠡᠩᠰᠡᠨ ᠪᠤᠷᠤᠭᠠᠨ ᠤᠷᠤᠭᠠᠳ ᠪᠠᠶᠢᠳᠠᠭ᠃ ᠴᠢᠭᠢᠭ ᠮᠠᠨᠠᠨ ᠰᠡᠩᠰᠡᠨ ᠪᠤᠷᠤᠭᠠᠨ ᠳᠤᠮᠳᠠᠬᠢ ᠳᠤᠰᠬᠤᠨ ᠤ ᠦᠵᠡᠮᠵᠢ ᠭᠡᠵᠦ ᠮᠦᠨ ᠴᠦ ᠨᠢᠬᠡ ᠵᠦᠢᠯ ᠤᠨ ᠬᠡᠯᠡᠬᠦ ᠶᠢᠨ ᠠᠷᠭ᠎ᠠ ᠦᠬᠡᠢ ᠰᠤᠯᠠ ᠰᠡᠯᠡᠭᠦᠦ ᠠᠬᠤᠢ ᠰᠠᠨ᠃ ᠲᠠ ᠪᠤᠳᠤᠵᠤ ᠦᠵᠡ ᠳ᠋ᠡ᠂ ᠨᠠᠮᠤᠷ ᠤᠨ ᠬᠤᠷᠢᠶᠡᠯᠳᠡ ᠶᠢᠨ ᠳᠠᠷᠠᠭ᠎ᠠ᠂ ᠭᠤᠤᠯ ᠤᠨ ᠳᠡᠷᠭᠡᠳᠡᠬᠢ ᠭᠡᠳᠦᠨ ᠡᠷᠦᠬᠡ ᠠᠶᠢᠯ ᠭᠦᠭᠦᠷᠬᠡ  ᠶᠢᠨ ᠨᠠᠭᠠᠭᠤᠷ ᠵᠡᠷᠭᠡᠴᠡᠨ ᠪᠠᠶᠢᠷᠢᠯᠠᠵᠦ᠂ ᠭᠤᠤᠯ ᠭᠦᠳᠡᠭᠡᠰᠦᠨ ᠠᠯᠤᠰ ᠢ ᠰᠢᠷᠳᠡᠬᠦ ᠪᠦᠭᠡᠳ ᠭᠤᠤᠯ ᠤᠨ ᠨᠠᠭᠠᠭᠤᠷ ᠴᠠᠭᠠᠭᠤᠷ ᠡᠶᠢᠷᠡᠭ ᠰᠡᠶᠢᠷᠡᠭ ᠤᠢ ᠰᠢᠭᠤᠢ᠂ ᠵᠢᠴᠢ ᠡᠭᠦᠯᠡ ᠮᠠᠨᠠᠨ ᠭᠤᠭᠴᠤᠭᠠᠯᠠᠵᠤ᠂ ᠡᠶᠡᠪᠡᠷ ᠬᠤᠷ᠎ᠠ ᠴᠠᠶᠢᠯᠵᠠᠬᠤ  ᠨᠢ ᠡᠪᠦᠯ ᠴᠠᠭ ᠤᠨ ᠤᠰᠤᠨ ᠪᠤᠳᠤᠭ ᠤᠨ ᠵᠢᠷᠤᠭ ᠪᠤᠰᠤ ᠤᠤ︖ ᠡᠳᠡᠭᠡᠷ ᠦᠵᠡᠮᠵᠢ ᠳᠤ ᠪᠠᠰᠠ ᠰᠡᠳᠭᠢᠯ ᠬᠠᠩᠬᠤ ᠦᠬᠡᠢ ᠪᠠᠶᠢᠪᠠᠯ᠂ ᠡᠭᠦᠳᠡᠨ ᠡᠮᠦᠨ᠎ᠡ ᠪᠠᠨ ᠪᠡᠬᠡᠨ ᠥᠩᠭᠡ ᠶᠢᠨ ᠪᠦᠷᠢᠶᠡᠰᠦᠳᠦ ᠵᠢᠵᠢᠭ ᠤᠩᠭᠤᠴᠠ ᠵᠤᠭᠰᠤᠭᠠᠵᠤ᠂ ᠤᠯᠠᠯᠵᠢᠨ ᠪᠦᠷᠭᠡ ᠳᠤ ᠪᠠᠨ ᠭᠡᠳᠦᠨ ᠵᠤᠴᠢᠨ ᠵᠠᠯᠠᠵᠤ᠂ ᠤᠷᠤᠢ ᠪᠤᠯᠳᠠᠯ᠎ᠠ ᠠᠷᠢᠭᠢᠳᠠᠭᠠᠳ᠂ ᠮᠦᠨ ᠬᠦᠶᠦᠬᠡᠨ ᠭᠡᠶᠢᠪᠦᠷ ᠵᠤᠯᠠ ᠶᠢᠨ ᠭᠡᠷᠡᠯ ᠢ ᠰᠠᠷᠠᠨ ᠤ ᠳᠤᠶᠠᠭ᠎ᠠ ᠲᠠᠢ ᠢᠵᠢᠯᠢᠰᠢᠭᠦᠯᠬᠦ ᠶᠤᠮ ᠪᠤᠯ ᠪᠦᠷ ᠴᠦ ᠰᠠᠶᠢᠬᠠᠨ ᠵᠤᠭᠤᠭ ᠪᠤᠯᠬᠤ ᠰᠠᠨ᠃ ᠡᠨᠡ ᠦᠶ᠎ᠡ ᠳᠤ ᠬᠦᠮᠦᠨ ᠤ ᠰᠡᠳᠭᠢᠯ ᠶᠠᠭᠠᠬᠢᠨ ᠳᠠᠶᠢᠪᠦᠰᠢᠷᠡᠵᠦ᠂ ᠤᠯᠵᠤ ᠠᠯᠳᠠᠬᠤ ᠦᠬᠦᠬᠦ ᠰᠡᠭᠡᠬᠦ ᠶᠠᠭᠤ ᠭᠡᠳᠡᠭ ᠢ ᠮᠠᠷᠳᠠᠮᠠᠷ ᠪᠤᠯᠬᠤ ᠦᠬᠡᠢ ᠤᠤ︖ ᠪᠢᠳᠡ ᠳᠠᠩ ᠤᠨ ᠰᠢᠯᠦᠭ ᠲᠤ ᠬᠢ ︽ᠦᠳᠡᠰᠢ ᠶᠢᠨ ᠪᠤᠷᠤᠭ᠎ᠠ ᠱᠤᠤᠭᠢᠬᠤ ᠠᠭᠱᠠᠨ ᠮᠦᠷᠡᠨ ᠭᠤᠤᠯ ᠤᠨ ᠮᠤᠳᠤᠨ︾ ᠭᠡᠬᠦ ᠰᠠᠶᠢᠬᠠᠨ ᠦᠬᠦᠯᠡᠪᠦᠷᠢ ᠶᠢ ᠪᠤᠳᠤᠵᠤ ᠦᠵᠡᠶ᠎ᠡ᠃ ᠰᠢᠯᠦᠭᠴᠢᠨ ᠵᠢᠶᠠᠩᠨᠠᠨ ᠭᠠᠵᠠᠷ ᠤᠨ ᠡᠪᠦᠯ ᠤᠨ ᠦᠵᠡᠮᠵᠢ ᠳᠤ ᠰᠤᠭᠳᠤᠭᠤᠷᠬᠤ ᠳᠤ ᠪᠠᠨ ᠮᠦᠷᠡᠨ ᠳᠠᠩᠬᠢᠰ ᠤᠨ ᠰᠠᠶᠢᠨ ᠡᠷᠡᠰ ᠲᠤ ᠴᠦ ᠡᠶᠡᠪᠡᠷᠬᠦᠦ ᠤᠪᠤᠷ ᠲᠠᠢ ᠪᠤᠯᠴᠢᠬᠠᠵᠠᠢ᠃ ᠵᠢᠶᠠᠩᠨᠠᠨ ᠭᠠᠵᠠᠷ ᠤᠨ ᠡᠪᠦᠯ ᠤᠨ ᠦᠵᠡᠮᠵᠢ ᠢᠩᠬᠢᠵᠦ ᠬᠦᠮᠦᠨ ᠢ ᠰᠤᠭᠳᠤᠷᠠᠭᠤᠯᠳᠠᠭ ᠪᠠᠶᠢᠵᠠᠢ᠃ ᠪᠤᠷᠤᠭᠠᠨ ᠬᠡᠬᠦᠯᠡᠷ ᠴᠠᠰᠤ ᠶᠢ ᠶᠠᠷᠢᠬᠤ ᠦᠬᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠬᠡᠢ᠃ ︽ᠦᠳᠡᠰᠢ ᠪᠤᠯᠬᠤᠷ ᠴᠠᠰᠤᠨ ᠤᠷᠤᠮᠠᠷ ᠪᠠᠶᠢᠨ᠎ᠠ᠂ ᠠᠮᠳᠠᠳᠤ ᠰᠠᠷᠬᠤᠳ ᠨᠢᠬᠡᠨ ᠬᠤᠨᠳᠠᠭ᠎ᠠ ᠪᠠᠯᠭᠤᠬᠤ ᠤᠤ︖︾ ᠭᠡᠰᠡᠨ ᠨᠢ ᠵᠢᠶᠠᠩᠨᠠᠨ ᠭᠠᠵᠠᠷ ᠤᠨ ᠦᠳᠡᠰᠢ ᠪᠦᠷᠦᠢ ᠶᠢᠨ ᠴᠠᠰᠤᠨ ᠤ ᠦᠵᠡᠮᠵᠢ᠂ ︽ ᠭᠦᠢᠯᠡᠰᠦᠨ ᠤ ᠨᠠᠮᠠᠭ᠎ᠠ ᠰᠡᠭᠦᠳᠡᠬᠡᠨᠡᠭᠰᠡᠨ ᠨᠤᠳᠤᠭ ᠤᠨ ᠰᠢᠷ᠎ᠠ ᠵᠠᠮ᠂ ᠬᠦᠶᠦᠬᠡᠨ ᠴᠠᠰᠤ ᠭᠢᠯᠪᠠᠰᠤᠷᠠᠭᠰᠠᠨ ᠰᠠᠷᠬᠤᠳ ᠤᠨ ᠦᠨᠦᠷᠳᠦ ᠳᠤᠰᠬᠤ︾ ᠭᠡᠰᠡᠨ ᠨᠢ ᠴᠠᠰᠦ ᠰᠠᠷᠠ ᠳᠡᠷᠢᠭᠦᠯᠡᠭᠴᠢ ᠴᠡᠴᠡᠭ ᠭᠡᠬᠦ ᠡᠪᠦᠯ ᠴᠠᠭ ᠤᠨ ᠭᠤᠷᠪᠠᠨ ᠠᠷᠤᠤᠬᠠᠨ ᠠᠷᠢᠭᠢ ᠬᠡᠦᠬᠡᠨ ᠲᠠᠢ ᠢᠨᠢᠶᠡᠯᠴᠡᠨ ᠨᠠᠭᠠᠳᠴᠦ ᠪᠠᠶᠢᠭ᠎ᠠ ᠳᠦᠷᠰᠦ᠃ ︽ᠡᠭᠦᠳᠡᠨ ᠭᠠᠳᠠᠭ᠎ᠠ ᠨᠤᠬᠠᠢ ᠪᠤᠷᠭᠢᠬᠤ ᠳᠠᠭᠤᠨ᠂ ᠰᠦᠨᠢ ᠶᠢᠨ ᠴᠠᠰᠤᠨ᠎ᠠ ᠪᠤᠴᠠᠨ ᠢᠷᠡᠭᠰᠡᠨ ᠬᠦᠮᠦᠨ︾ ᠭᠡᠰᠡᠨ ᠨᠢ ᠵᠢᠶᠠᠩᠨᠠᠨ  ᠤ ᠴᠠᠰᠣᠳᠦ ᠦᠳᠡᠰᠢ ᠬᠦᠨ ᠰᠦᠨᠢ ᠶᠢᠨ ᠨᠠᠮ ᠵᠢᠮ ᠪᠠᠶᠢᠳᠠᠯ ᠳ᠋ᠡ᠃ ︽ ᠤᠶᠠᠩᠭᠠᠳᠤ ᠮᠤᠳᠤᠨ ᠬᠦᠨ ᠴᠠᠰᠤᠨ᠎ᠠ ᠠᠳᠠᠯ᠎ᠠ᠂ ᠦᠦᠷ ᠰᠦᠨᠢ ᠨᠠᠮᠠᠭ᠎ᠠ ᠰᠠᠯᠠᠭ᠎ᠠ ᠠᠨᠤ ᠳᠡᠯᠭᠡᠵᠤᠬᠦᠢ︾᠂ ᠰᠢᠨ᠎ᠡ ᠦᠷᠯᠦᠬᠡ ᠪᠤᠯᠬᠤᠶ᠎ᠠ ᠬᠡᠦᠬᠡᠳ ᠨᠤᠬᠠᠢ ᠵᠡᠷᠭᠡᠳᠡ ᠪᠠᠨ ᠭᠦᠬᠡᠷᠴᠦ᠂ ᠴᠠᠰᠤ ᠴᠡᠴᠡᠭ ᠤᠨ ᠰᠠᠶᠢᠬᠠᠨ ᠦᠵᠡᠮᠵᠢ ᠶᠢ ᠮᠡᠳᠡᠭᠦᠯᠬᠦ ᠭᠡᠳ ᠶᠠᠭᠠᠷᠠᠨ᠎ᠠ᠃    ᠰᠢᠯᠦᠭᠴᠢᠳ ᠤᠨ ᠰᠠᠶᠢᠬᠠᠨ ᠦᠬᠡᠰ ᠵᠦᠪᠬᠡᠨ ᠵᠢᠶᠠᠩᠨᠠᠨ ᠢ ᠯᠠ ᠪᠢᠴᠢᠭᠰᠡᠨ ᠠᠷᠠᠢ ᠪᠢᠰᠢ ᠴᠦ ᠮᠠᠭᠠᠳ᠂ ᠡᠭᠦᠨ ᠢ ᠪᠢᠴᠢᠭᠰᠡᠨ ᠰᠢᠯᠦᠭᠴᠢᠳ ᠢ ᠴᠦ ᠪᠦᠷ ᠵᠢᠶᠠᠩᠨᠠᠨ ᠤ ᠬᠦᠮᠦᠨ ᠭᠡᠵᠦ ᠬᠡᠯᠡᠬᠦ ᠶᠢᠨ ᠠᠷᠭ᠎ᠠ ᠦᠬᠡᠢ᠃ ᠲᠡᠭᠡᠬᠦᠯᠡᠷ ᠡᠳᠡᠭᠡᠷ ᠭᠡᠳᠦᠨ ᠰᠠᠶᠢᠬᠠᠨ ᠦᠭᠦᠯᠡᠪᠦᠷᠢ ᠪᠠᠷ ᠵᠢᠶᠠᠩᠨᠠᠨ ᠭᠠᠵᠠᠷ ᠤᠨ ᠴᠠᠰᠤᠳᠦ ᠦᠵᠡᠮᠡᠵᠢ ᠶᠢ ᠬᠠᠷᠠᠭᠤᠯᠬᠤ ᠨᠢ ᠮᠢᠨᠦ ᠪᠢᠳᠠᠭᠤ ᠦᠵᠦᠭ ᠢᠶᠠᠷ ᠳᠦᠷᠰᠦᠯᠡᠨ ᠪᠢᠴᠢᠭᠰᠡᠨ ᠠᠴᠠ ᠨᠡᠩ ᠰᠠᠶᠢᠬᠠᠨ ᠪᠢᠰᠢ ᠤᠤ︖    ᠵᠠᠷᠢᠮ ᠭᠡᠳᠦᠨ ᠵᠢᠯ᠂ ᠵᠢᠶᠠᠩᠨᠠᠨ ᠳᠤ ᠪᠤᠷᠤᠭᠠᠨ ᠴᠦ ᠦᠬᠡᠢ᠂ ᠴᠠᠰᠤ ᠴᠦ ᠦᠬᠡᠢ ᠪᠠᠶᠢᠳᠠᠯ ᠴᠦ ᠭᠠᠷᠴᠦ ᠮᠠᠭᠠᠳ᠃ ᠲᠡᠭᠡᠬᠦᠯᠡᠷ ᠪᠠᠨ ᠪᠢᠯᠢᠭ ᠤᠨ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠰᠡᠭᠦᠯ᠂ ᠬᠤᠶᠠᠷ ᠰᠠᠷ᠎ᠠ ᠶᠢᠨ ᠡᠬᠢ ᠬᠡᠭᠦᠯᠡᠷ ᠪᠠᠭ᠋ᠠᠨ ᠬᠦᠢᠳᠡᠷᠡᠵᠦ ᠵᠢᠭᠠᠬᠠᠨ ᠴᠠᠰᠤ ᠤᠷᠤᠳᠠᠭ᠃ ᠨᠢᠳᠤᠨᠤᠨ ᠡᠶᠢᠮᠦ᠂ ᠦᠨᠦ ᠵᠢᠯ ᠴᠦ ᠪᠠᠷᠤᠭ ᠡᠶᠢᠮᠦ ᠪᠠᠶᠢᠳᠠᠯ ᠲᠠᠢ ᠪᠠᠶᠢᠨ᠎ᠠ᠃ ᠴᠠᠭ ᠠᠭᠤᠷ ᠢᠶᠠᠷ ᠳᠦᠯᠬᠢᠨ ᠪᠤᠳᠤᠬᠤ ᠳᠤ᠂ ᠳᠠᠷᠠᠭ᠎ᠠ ᠤᠨ ᠤ ᠬᠤᠶᠠᠷ ᠰᠠᠷ᠎ᠠ ᠶᠢᠨ ᠰᠡᠭᠦᠯᠴᠢ ᠡᠶᠢᠮᠦ ᠪᠠᠶᠢᠯᠲᠠᠢ᠃ ᠲᠡᠭᠡᠬᠦᠯᠡᠷ ᠮᠦᠨ ᠳᠤᠯᠤᠭ᠎ᠠ ᠨᠠᠢᠮᠠᠨ ᠡᠳᠦᠷ ᠯᠠ ᠡᠶᠢᠮᠦ ᠪᠠᠶᠢᠯᠲᠠᠢ ᠳ᠋ᠠ᠃ ᠡᠶᠢᠮᠦᠷᠬᠦᠦ ᠡᠪᠦᠯ ᠢ ᠭᠦᠳᠡᠭᠡ ᠨᠤᠳᠤᠭ ᠤᠨ ᠬᠢᠨ ᠭᠠᠩ ᠡᠪᠦᠯ ᠭᠡᠳᠡᠭ᠃ ᠡᠨᠡ ᠨᠢ ᠪᠤᠭᠤᠳᠠᠢ ᠶᠢᠨ ᠤᠨᠠᠯᠳᠠ ᠳᠤ ᠰᠠᠶᠢᠨ᠂ ᠭᠡᠬᠦᠯᠡᠷ ᠬᠦᠮᠦᠨ ᠠᠮᠠ ᠬᠤᠬᠢᠷᠠᠯ ᠰᠦᠢᠳᠤᠯ ᠳᠤ ᠤᠴᠠᠷᠠᠳᠠᠭ᠂ ᠭᠠᠩ ᠬᠠᠭᠰᠠᠷᠠᠭ᠎ᠠ ᠪᠤᠯᠪᠠᠯ᠂ ᠬᠤᠭᠤᠯᠠᠢ ᠶᠢᠨ ᠡᠪᠡᠳᠴᠢᠨ᠂ ᠬᠠᠯᠳᠠᠪᠤᠷᠢᠳᠦ ᠬᠢᠮᠤᠷᠠᠭ᠎ᠠ ᠠᠮᠠᠷᠠᠬᠠᠨ ᠳᠡᠯᠭᠡᠷᠡᠳᠡᠭ᠃ ᠭᠡᠪᠡᠴᠦ ᠵᠢᠶᠠᠩᠨᠠᠨ ᠤ ᠡᠪᠦᠯ ᠤᠨ ᠦᠵᠡᠮᠵᠢ ᠳᠤ ᠰᠤᠭᠳᠤᠭᠤᠷᠬᠤ ᠶᠢ ᠭᠦᠰᠡᠭᠴᠢᠳ ᠡᠶᠢᠮᠦᠷᠬᠦᠦ ᠡᠪᠦᠯ ᠪᠤᠯᠪᠠᠯ ᠨᠡᠩ ᠪᠠᠶᠠᠰᠳᠠᠭ᠂ ᠡᠳᠦᠷ ᠳᠤᠩᠭᠠᠯᠠᠭ ᠤᠴᠢᠷ ᠭᠦᠳᠡᠭᠡ ᠭᠠᠳᠠᠭ᠎ᠠ ᠭᠠᠷᠬᠤ ᠳᠤᠬᠢᠶᠠᠯ ᠤᠯᠠᠨ ᠪᠤᠯᠳᠠᠭ ᠠᠵᠢ᠃ ᠨᠠᠭᠠᠳᠤᠨ ᠨᠠᠷᠬᠢᠬᠤ ᠳᠤᠷᠠᠳᠠᠢ ᠬᠦᠮᠦᠰ ᠡᠶᠢᠮᠦ ᠡᠪᠤᠯ ᠳᠤ ᠳᠤᠩ ᠳᠤᠷᠠᠳᠠᠢ᠃    ᠴᠤᠩᠬᠤᠨ ᠴᠠᠭᠠᠨᠠᠬᠢ ᠳᠤᠩᠭᠠᠯᠠᠭ ᠠᠭᠠᠷ ᠶᠠᠭ ᠯᠠ ᠬᠦᠨ ᠨᠠᠮᠤᠷ ᠬᠡᠮᠡᠷ᠃ ᠦᠨᠳᠦᠷ ᠭᠦᠨ ᠤᠭᠳᠡᠷᠭᠤᠢ᠂ ᠡᠶᠡᠯᠰᠡᠭ ᠵᠦᠬᠡᠯᠡᠨ ᠨᠠᠷᠠᠨ ᠬᠦᠮᠦᠨ ᠢ ᠭᠠᠳᠠᠭᠰᠢ ᠳᠠᠳᠠᠨ᠎ᠠ᠃ ᠬᠤᠭᠤᠰᠤᠨ ᠦᠬᠡ ᠬᠡᠯᠡᠬᠦ ᠪᠠᠷ ᠢᠶᠠᠨ ᠬᠤᠷᠳᠤᠨ ᠭᠠᠳᠠᠭᠰᠢ ᠭᠠᠷᠬᠤ ᠶᠤᠮᠰᠠᠨ᠃ ᠦᠨᠦᠷ ᠠᠮᠳᠠ ᠦᠬᠡᠢ ᠡᠨᠡ ᠡᠸ᠋ᠰᠰᠧ ᠶᠢ ᠪᠢᠴᠢᠬᠦ ᠪᠠᠨ ᠪᠤᠯᠢᠵᠦ᠂ ᠳᠠᠶᠠᠭ ᠢᠶᠠᠨ ᠠᠪᠤᠨ ᠦᠵᠦᠭ ᠢᠶᠠᠨ ᠳᠡᠯᠪᠢᠵᠦ᠂ ᠨᠠᠭᠤᠷ ᠤᠨ ᠡᠷᠭᠢ ᠳᠤ ᠵᠤᠰᠠᠬᠤ ᠪᠠᠷ ᠤᠴᠢᠶ᠎ᠠ᠃    ᠣᠷᠴᠢᠭᠤᠯᠤᠭᠴᠢ ᠶᠢᠨ ᠬᠠᠶ᠋ᠢᠭ᠄ ᠦᠪᠦᠷ ᠮᠣᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠮᠣᠩᠭᠤᠯ ᠰᠤᠳᠤᠯᠤᠯ ᠤᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ
ᠢᠷᠡᠯᠲᠡ᠄ ᠦᠪᠤᠷ ᠮᠤᠩᠭᠤᠯ ᠤᠨ ︽ᠨᠡᠶᠢᠬᠡᠮ︾ ᠰᠡᠳᠬᠦᠯ