ᠨᠤᠲᠤᠭ ᠤᠨ ᠵᠠᠮ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/12/4
                                  ᠲᠣ · ᠨᠠᠰᠦᠨᠵᠢᠷᠭᠠᠯ ᠵᠤᠬᠢᠶᠠᠪᠠ    ᠵᠠᠮ ᠪᠣᠯᠭᠠᠨ ᠤ ᠳᠣᠮᠳᠠ ᠠᠴᠠ ᠨᠤᠲᠤᠭ ᠤᠨ ᠵᠠᠮ ᠪᠣᠯ ᠬᠠᠮᠤᠭ ᠤᠨ ᠣᠶᠢᠷ᠎ᠠ ᠪᠠᠶᠢᠵᠤ᠂ ᠬᠠᠮᠤᠭ ᠤᠨ ᠳᠤᠲᠤᠨᠣ ᠰᠠᠨᠠᠭᠳᠠᠳᠠᠭ᠃ ᠳᠣᠷᠠᠰᠣᠯ ᠮᠦᠷᠦᠭᠡᠳᠦᠯ ᠪᠦᠬᠦᠨ ᠳᠤ ᠨᠣᠲᠤᠭ ᠢᠶᠠᠨ ᠰᠠᠨᠠᠬᠤ ᠰᠡᠳᠭᠢᠯᠭᠡ ᠪᠣᠯ ᠬᠠᠮᠤᠭ ᠠᠴᠠ ᠭᠦᠨ ᠪᠠᠶᠢᠳᠠᠭ᠃ ᠠᠶᠠᠨ ᠤ ᠬᠤᠯᠠ ᠠᠴᠠ ᠬᠠᠷᠠᠭᠳᠠᠬᠤ ᠨᠢ ᠣᠨᠠᠭᠰᠠᠨ ᠰᠢᠷᠣᠢ ᠣᠣᠭᠤᠭᠰᠠᠨ ᠣᠰᠣ ᠪᠠᠶᠢᠯ ᠦᠭᠡᠢ᠂ ᠠᠯᠤᠰ ᠳᠠᠯᠠᠢ ᠶᠢᠨ ᠬᠢᠵᠠᠭᠠᠷ ᠲᠤ ᠨᠣᠲᠤᠭ ᠨᠢᠭᠡᠲᠡᠨ ᠨᠢᠭᠡ ᠳᠣᠣᠷ᠎ᠠ ᠠᠭᠤᠯᠵᠠᠵᠤ ᠤᠴᠠᠷᠠᠬᠤ ᠳᠤ ᠣᠶᠠᠷᠠᠯ ᠤᠨ ᠨᠢᠯᠪᠣᠰᠣ ᠬᠠᠮᠠᠷ ᠬᠠᠪᠴᠢᠨ ᠪᠦᠮᠪᠦᠷᠢᠬᠦᠢ︕ ᠭᠡᠬᠦ ᠳᠤ ᠪᠠᠨ ᠬᠡᠨ ᠨᠢᠭᠡᠨ ᠬᠦᠮᠦᠨ ᠳᠤ ᠨᠣᠲᠤᠭ ᠢᠶᠠᠨ ᠵᠦᠭᠯᠡᠵᠤ ᠭᠡᠷ ᠲᠤ ᠪᠠᠨ ᠬᠠᠷᠢᠬᠤ ᠰᠡᠳᠭᠢᠯᠭᠡ ᠶᠠᠭᠤᠨ ᠠᠴᠠ ᠴᠤ ᠬᠦᠨᠳᠦᠬᠡᠨ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ︕    ᠬᠦᠮᠦᠰ ᠡᠨᠡ ᠶᠢᠷᠲᠢᠨᠴᠣ ᠳᠤ ᠠᠩᠬ᠎ᠠ ᠮᠡᠨᠳᠦᠯᠡᠬᠦ ᠳᠤ ᠪᠠᠨ ᠡᠩ ᠳᠡᠯᠡᠬᠡᠢ ᠶᠢᠨ ᠡᠷᠢᠶᠡᠨ ᠪᠠᠷᠠᠭᠠᠨ᠂ ᠬᠠᠯᠠᠭᠤᠨ ᠬᠦᠢᠲᠡᠨ ᠢ ᠢᠯᠭᠠᠨ ᠲᠠᠨᠢᠬᠤ ᠠᠴᠠ ᠡᠬᠢᠯᠡᠵᠤ ᠬᠦᠯ ᠳᠤ ᠤᠷᠤᠭᠤᠯᠳᠠᠭ ᠨᠢ ᠲᠡᠭᠦᠨ ᠤ ᠡᠯᠢᠭᠡᠲᠡᠵᠤ ᠣᠨᠠᠭᠰᠠᠨ ᠰᠢᠷᠣᠢ᠂ ᠦᠰᠭᠡᠵᠤ ᠲᠣᠷᠨᠢᠭᠤᠯᠣᠭᠰᠠᠨ ᠦᠯᠦᠭᠡᠢ ᠨᠣᠲᠤᠭ ᠨᠢ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠃ ︽ᠪᠦᠭᠡᠷᠡᠦᠯᠡᠢ︕ ᠪᠣᠣ ᠣᠬᠢᠯᠠ᠂ ᠂᠂᠂︾ ᠭᠡᠵᠤ ᠡᠵᠢ ᠮᠢᠨᠢ ᠨᠠᠮ᠎ᠠ ᠶᠢ ᠠᠷᠭᠠᠳᠠᠵᠤ ᠪᠠᠶᠢᠭᠰᠠᠨ ᠲᠡᠷᠡ ᠮᠠᠬᠠᠷᠠ ᠲᠠᠢ ᠦᠯᠦᠭᠡᠢ ᠶᠢ ᠣᠳᠣ ᠬᠠᠷᠠᠬᠤ ᠳᠤ ᠭᠡᠷ᠂ ᠦᠯᠦᠭᠡᠢ ᠬᠤᠶᠠᠷ ᠨᠢ ᠨᠠᠳᠠ ᠳᠤ ᠠᠪᠤ᠂ ᠡᠵᠢ ᠬᠤᠶᠡᠷ ᠰᠢᠭ᠋ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠰᠠᠨᠠᠭᠳᠠᠳᠠᠭ᠃ ᠬᠡᠷᠪᠡ ᠲᠡᠷᠡ ᠦᠯᠦᠭᠡᠢ ᠨᠠᠮ᠎ᠠ ᠶᠢ ᠪᠠᠭᠳᠠᠭᠠᠳᠠᠭ ᠶᠣᠮ ᠪᠣᠯ ᠦᠯᠦᠭᠡᠢ ᠳᠤ ᠪᠠᠨ ᠪᠢ ᠳᠠᠬᠢᠨ ᠣᠷᠣᠵᠣ ᠬᠡᠪᠲᠡᠮᠡᠷ ᠰᠠᠨᠠᠭᠳᠠᠬᠤ ᠶᠤᠮ ︕ ᠨᠤᠲᠤᠭ ᠤᠨ ᠰᠢᠷᠤᠢ ᠠᠯᠲᠠ ᠠᠴᠠ ᠦᠨᠡᠲᠡᠢ︕ ᠬᠦᠮᠦᠰ ᠬᠠᠷᠢ ᠭᠠᠵᠠᠷ ᠠᠮᠢᠳᠣᠷᠠᠵᠤ ᠲᠡᠮᠡᠤᠯᠬᠦ ᠳᠤ ᠪᠠᠨ ᠨᠤᠲᠤᠭ ᠤᠨ ᠢᠶᠠᠨ ᠠᠳᠬᠤ ᠰᠢᠷᠣᠢ ᠶᠢ ᠨᠢ ᠠᠪᠴᠣ ᠶᠠᠪᠤᠳᠠᠭ︕    ᠠᠷᠣ ᠭᠡᠷ ᠢᠶᠠᠨ ᠰᠠᠨᠠᠬᠤ ᠳᠤ ᠪᠠᠨ ᠠᠯᠠᠭᠠᠨ ᠳᠤ ᠪᠠᠨ ᠪᠢᠲᠡᠭᠦᠯᠡᠵᠦ ᠦᠨᠦᠰᠳᠡᠭ᠂᠂᠂᠂᠂ ᠬᠦᠮᠦᠨ ᠭᠡᠵᠤ ᠭᠡᠷ ᠣᠷᠣᠨ ᠠᠴᠠ ᠪᠠᠨ ᠵᠠᠶᠢᠳᠠᠬᠤ ᠲᠣᠰᠤᠮ ᠢᠶᠠᠨ ᠨᠣᠲᠤᠭ ᠢᠶᠠᠨ ᠰᠠᠨᠠᠬᠤ ᠰᠡᠳᠭᠢᠯᠭᠡ ᠨᠢ ᠭᠦᠨ ᠪᠣᠯᠳᠠᠭ᠂ ᠲᠡᠶᠢᠮᠦ ᠮᠦᠷᠲᠡᠭᠡᠨ ᠨᠠᠰᠦ ᠨᠡᠮᠡᠭᠳᠡᠬᠦ ᠶᠢ ᠳᠠᠭᠠᠯᠳᠦᠨ ᠪᠠᠭ᠎ᠠ ᠶᠢᠨ ᠥᠶ᠎ᠡ ᠪᠠᠨ ᠳᠤᠷᠠᠰᠣᠨ ᠰᠠᠨᠠᠭᠠᠯᠵᠠᠬᠤ ᠨᠢ ᠨᠡᠩ ᠬᠡᠴᠡᠭᠦᠦ ᠪᠣᠯᠳᠠᠭ᠂ ᠬᠤᠷᠣᠭᠤ ᠪᠠᠨ ᠪᠠᠯ ᠲᠠᠢ ᠭᠡᠮᠡᠷ ᠰᠢᠮᠡᠵᠤ ᠪᠠᠶᠢᠭᠰᠠᠨ ᠦᠶ᠎ᠡ ᠪᠠᠨ ᠡᠷᠭᠢᠴᠡᠭᠦᠯᠬᠦ ᠳᠤ ᠨᠠᠢᠮᠠᠲᠠᠢ ᠲᠡᠷᠡ ᠵᠢᠯ ᠠᠴᠠ ᠠᠶᠢᠯ ᠤᠨ ᠰᠣᠷᠭᠠᠭᠤᠯᠢ ᠳᠤ ᠪᠠᠨ ᠪᠢ ᠠᠯᠢᠶᠠᠷᠬᠠᠵᠤ ᠨᠠᠭᠠᠳᠬᠤ  ᠪᠠᠨ ᠪᠣᠳᠣᠭᠠᠳ ᠠᠯᠪᠠ ᠪᠠᠷ ᠶᠠᠪᠣᠵᠣ ᠪᠠᠶᠢᠭᠰᠠᠨ ᠮᠢᠨᠢ ᠪᠣᠳᠣᠭᠳᠠᠨ᠎ᠠ᠂ ᠠᠷᠣ ᠶᠢᠨ ᠠᠭᠤᠯᠠᠨ ᠤ ᠠᠯᠠᠭ ᠬᠠᠳᠠᠨ ᠤ ᠵᠠᠪᠰᠠᠷ ᠠᠴᠠ ᠠᠯᠠᠭᠳᠠᠭ᠎ᠠ ᠶᠢᠨ ᠡᠭᠦᠷ ᠢ ᠤᠬᠤᠵᠤ᠂ ︽ ᠠᠯᠠᠭᠳᠠᠭ᠎ᠠ ᠠ ᠭᠡᠳ᠂ ᠠᠪᠤ ᠨᠠᠮ᠎ᠠ ᠶᠢ ᠢᠷᠡᠭᠡ ᠭᠡᠳ᠂᠂᠂︾ ᠭᠡᠮᠡᠨ ᠲᠣᠭᠯᠠᠵᠣ ᠪᠠᠶᠢᠭᠰᠠᠨ ᠮᠢᠨᠢ ᠡᠷᠢᠭᠳᠡᠨ᠎ᠡ᠃ ᠵᠡᠭᠦᠨ ᠭᠤᠣᠯ ᠤᠨ ᠴᠡᠭᠡᠯ ᠤᠨ ᠣᠰᠣᠨ ᠳᠤ ᠣᠮᠪᠠᠨ᠂ ᠰᠢᠷᠭᠠᠯ ᠡᠯᠡᠰᠦᠨ ᠳᠤ ᠨᠠᠷᠠᠨ ᠳᠤ ᠡᠭᠡᠭᠡᠨ ᠬᠡᠪᠲᠡᠵᠦ ᠦᠳᠡ ᠶᠢᠨ ᠬᠤᠶᠢᠨᠠᠬᠢ ᠬᠢᠴᠢᠶᠡᠯ ᠠᠴᠠ ᠪᠠᠨ ᠬᠤᠴᠣᠷᠴᠢᠬᠠᠵᠤ ᠪᠠᠭᠰᠢ ᠳᠤ ᠪᠠᠨ ᠵᠢᠮᠡᠯᠡᠭᠳᠡᠵᠣ ᠪᠠᠶᠢᠭᠰᠠᠨ ᠢᠶᠠᠨ ᠰᠠᠨᠠᠭᠠᠯᠵᠠᠨ᠎ᠠ᠃ ᠲᠡᠷᠡ ᠦᠶ᠎ᠡ ᠶᠢᠨ ᠨᠢᠯᠬ᠎ᠠ ᠪᠠᠭ᠎ᠠ ᠶᠢᠨ ᠣᠶᠣᠨ ᠳᠤ ᠭᠡᠷ ᠠᠴᠠ ᠪᠠᠨ ᠭᠠᠷᠴᠣ ᠠᠶᠢᠯ ᠨᠤᠲᠤᠭ ᠤᠨ ᠢᠶᠠᠨ ᠠᠭᠤᠯᠠ ᠣᠰᠣᠨ ᠳᠤ ᠪᠠᠨ ᠠᠭᠤᠰᠣᠯᠴᠠᠵᠣ ᠨᠠᠭᠠᠳᠣᠨ ᠲᠣᠭᠯᠠᠬᠤ ᠪᠠᠨ ᠯᠡ ᠪᠣᠳᠣᠳᠠᠭ᠂ ᠬᠠᠷᠢᠨ ᠰᠣᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠠᠨ ᠳᠤ ᠢᠷᠡᠪᠡᠯ ᠬᠢᠴᠢᠶᠡᠯ ᠪᠠᠭᠤᠬᠤ ᠶᠢ ᠬᠡᠴᠢᠨᠡᠨ ᠶᠠᠭᠠᠷᠠᠬᠤ ᠶᠢ ᠪᠣᠣ ᠮᠡᠳᠡ︕ ᠮᠢᠨᠤ ᠴᠡᠭᠡᠵᠢᠯᠡᠵᠤ ᠪᠠᠶᠢᠬᠤ ᠪᠠᠷ ᠨᠢᠭᠡ ᠦᠳᠡ  ᠳᠤ ᠪᠢ ᠭᠤᠷᠪᠠᠳᠣᠭᠠᠷ ᠬᠢᠴᠢᠶᠡᠯ ᠪᠠᠭᠤᠮᠠᠭᠴᠠ ᠪᠠᠨ ᠰᠠᠨᠳᠠᠯᠢ ᠠᠴᠠ ᠪᠠᠨ ᠬᠤᠪᠬᠤ ᠦᠰᠦᠷᠦᠨ ᠴᠢᠨᠡᠭᠡ ᠮᠡᠳᠡᠨ ᠵᠢᠭᠢᠲᠡᠯ᠎ᠡ ᠭᠦᠶᠦᠵᠤ ᠭᠡᠷ ᠲᠤ ᠪᠠᠨ ᠣᠷᠣᠵᠣ ᠢᠷᠡᠪᠡᠯ᠂ ᠡᠵᠢ ᠄ ︽ᠡᠨᠡ ᠬᠦᠣ ᠬᠡᠳᠦᠢ ᠡᠷᠳᠡ ᠢᠷᠡᠴᠢᠭᠡᠭᠰᠡᠨ ᠶᠣᠮ︖ ᠲᠡᠭᠡᠭᠡᠳ ᠠᠬ᠎ᠠ ᠴᠢᠨᠢ︖︾ ᠭᠡᠵᠣ ᠠᠰᠠᠭᠤᠵᠣ ᠭᠠᠷᠣᠯ᠎ᠠ᠃ ︽ᠰᠣᠷᠭᠠᠭᠤᠯᠢ ᠲᠠᠷᠬᠠᠪᠠᠯ ᠡᠳᠦᠷ ᠡᠳᠦᠷ ᠶᠠᠭᠠᠬᠢᠵᠣ ᠭᠦᠶᠦᠭᠰᠡᠨ ᠴᠣ᠋ ᠠᠬ᠎ᠠ ᠠᠴᠠ ᠬᠤᠴᠣᠷᠳᠠᠭ᠂ ᠭᠡᠶ᠎ᠡ ᠡᠨᠡ ᠡᠳᠦᠷ ᠣᠷᠢᠳᠠᠵᠠᠢ ᠭᠡᠰᠡᠨ ᠴᠢᠨᠢ᠂ ᠪᠠᠷᠠᠵᠠᠢ︕ ᠰᠠᠶ᠋ᠢ ᠭᠤᠷᠪᠠᠳᠣᠭᠠᠷ ᠬᠢᠴᠢᠶᠡᠯ ᠪᠠᠭᠤᠵᠤ ᠪᠠᠶᠢᠭᠰᠠᠨ᠂ ᠶᠠᠭᠤᠨ ᠤ ᠬᠢ ᠨᠢ ᠳᠦᠷᠪᠡᠳᠦᠭᠡᠷ ᠬᠢᠴᠢᠶᠡᠯ ᠭᠡᠳ ᠠᠳᠡᠭᠦᠷᠡᠴᠢᠬᠡᠵᠡᠢ︾ ᠭᠡᠵᠤ ᠪᠢ ᠡᠵᠢ ᠳᠤ ᠪᠠᠨ ᠲᠠᠶᠢᠯᠪᠣᠷᠢᠯᠠᠨ᠎ᠠ᠃ ᠣᠣᠯ ᠨᠢ᠂ ᠦᠳᠡ ᠳᠤ ᠰᠣᠷᠭᠠᠭᠤᠯᠢ ᠲᠠᠷᠬᠠᠬᠤ ᠪᠣᠯᠭᠠᠨ ᠪᠠᠭᠰᠢ ᠠᠴᠠ ᠭᠡᠷ ᠲᠤ ᠪᠠᠨ ᠣᠴᠢᠪᠠᠯ ᠠᠪᠤ ᠡᠵᠢ ᠪᠠᠨ ᠬᠠᠪᠰᠣᠷᠴᠣ ᠠᠷᠭᠠᠯ ᠲᠦᠯᠡᠭᠡ ᠬᠤᠮᠢᠬᠤ ᠂ ᠠᠳᠣᠭᠤ ᠮᠠᠯ ᠡᠷᠭᠢᠭᠦᠯᠬᠦ ᠳᠤ ᠨᠢ ᠬᠠᠪᠰᠣᠷᠴᠣ ᠠᠵᠢᠯ ᠬᠢᠬᠦ᠂ ᠳᠠᠰᠬᠠᠯ ᠳᠠᠭᠠᠯᠭᠠᠪᠤᠷᠢ ᠪᠠᠨ ᠴᠠᠭ ᠲᠣᠬᠠᠢ ᠳᠤ ᠨᠢ ᠪᠡᠶᠡᠯᠡᠭᠦᠯᠬᠦ᠂᠂᠂ ᠵᠡᠷᠭᠡ ᠰᠣᠷᠭᠠᠯ ᠦᠭᠡ ᠶᠠᠷᠢᠳᠠᠭ᠃ ᠲᠡᠷᠡ ᠡᠳᠦᠷ᠂ ᠡᠨᠡ ᠪᠠᠭᠰᠢ ᠶᠠᠭᠠᠬᠢᠭᠠᠳ ᠯᠡ ᠭᠤᠷᠪᠠᠳᠣᠭᠠᠷ ᠬᠢᠴᠢᠶᠡᠯ ᠪᠠᠭᠤᠬᠤ ᠦᠶ᠎ᠡ ᠳᠤ ᠣᠯᠠᠨ ᠰᠣᠷᠭᠠᠯ ᠢᠶᠠᠨ ᠶᠠᠷᠢᠴᠢᠬᠠᠭᠰᠨ ᠶᠤᠮ ᠳ᠋ᠠ ᠭᠡᠵᠣ ᠬᠠᠷᠢᠭᠤᠯᠳᠠ ᠦᠭᠡᠢ ᠭᠠᠶᠢᠬᠠᠨ᠎ᠠ᠂᠂᠂᠂ ᠣᠳᠣ ᠪᠣᠳᠣᠬᠤ ᠳᠤ ᠲᠣᠭᠤᠯ ᠤᠨ ᠪᠡᠯᠴᠢᠭᠡᠷ ᠤᠨ ᠢᠨᠠᠲᠣ ᠠᠴᠠ ᠬᠤᠷᠭ᠎ᠠ ᠢᠰᠢᠭᠡ ᠶᠢᠨ ᠮᠠᠶᠢᠯᠠᠯᠳᠤᠭᠠᠨ ᠲᠠᠢ ᠬᠠᠰᠢᠶ᠎ᠠ ᠵᠦᠭ ᠢᠶᠠᠨ ᠭᠦᠶᠦᠯᠳᠦᠨ ᠶᠠᠭᠠᠷᠠᠵᠣ ᠪᠠᠶᠢᠭᠰᠠᠨ ᠮᠠᠨᠢ ᠨᠡᠩ ᠴᠤ ᠣᠴᠢᠷᠲᠠᠢ︕    ᠠᠪᠤ ᠡᠵᠢ ᠶᠢᠨ ᠬᠤᠷᠮᠣᠢ ᠶᠢ ᠨᠢ ᠳᠠᠭᠠᠵᠣ ᠳᠡᠷᠪᠡᠯᠵᠡᠭᠰᠡᠨ ᠪᠠᠯᠴᠢᠷ ᠨᠠᠰᠣ ᠮᠢᠨᠢ ᠠᠯᠣᠰ ᠤᠨ ᠴᠠᠭᠠᠨᠠᠬᠢ ᠠᠭᠤᠯᠠᠰ  ᠤᠨ ᠵᠠᠮᠬᠠᠷᠠᠨ ᠣᠳᠬᠤ ᠡᠭᠦᠯᠡᠰ ᠰᠢᠭ ᠵᠠᠶᠢᠳᠠᠬᠤ ᠴᠠᠭ ᠮᠦᠴᠡ ᠬᠡᠨ ᠬᠦᠮᠦᠨ ᠳᠤ ᠪᠦᠷ ᠪᠠᠶᠢᠭ᠎ᠠ ᠶᠣᠮ᠂ ᠨᠠᠳᠠ  ᠳᠤ ᠴᠣ᠋ ᠪᠠᠶᠢᠭᠰᠠᠨ ᠳ᠋ᠠ᠂ ᠠᠷᠣ ᠶᠢᠨ ᠳᠠᠪᠠᠭ᠎ᠠ ᠪᠠᠨ ᠳᠠᠪᠠᠵᠣ ᠰᠣᠮᠣ ᠶᠢᠨ ᠰᠣᠷᠭᠠᠭᠤᠯᠢ ᠳᠤ ᠳᠠᠪᠰᠢᠨ ᠣᠷᠣᠭᠰᠠᠨ ᠲᠠᠷᠡ ᠦᠶ᠎ᠡ ᠨᠢ ᠨᠠᠳᠠ ᠳᠤ ᠠᠶᠢᠯ ᠭᠡᠷ ᠢᠶᠠᠨ ᠰᠠᠨᠠᠬᠤ ᠰᠡᠳᠭᠢᠯᠭᠡ ᠶᠢ ᠵᠢᠷᠣᠬᠡᠨ ᠳᠤ ᠣᠭᠤᠰᠤᠷᠯᠠᠵᠤ ᠲᠠᠯᠪᠢᠭᠰᠠᠨ ᠰᠢᠭ᠋ ᠶᠣᠮ᠃     ᠪᠢ ᠰᠤᠷᠭᠠᠭᠤᠯᠢ ᠶᠢᠨ ᠪᠠᠶᠢᠷᠢ ᠳᠤ ᠠᠩᠬ᠎ᠠ ᠰᠠᠭᠤᠵᠣ ᠪᠠᠶᠢᠭᠰᠠᠨ ᠦᠶ᠎ᠡ ᠳᠤ ᠪᠠᠨ ᠭᠡᠷ ᠢᠶᠠᠨ ᠰᠠᠨᠠᠬᠤ ᠮᠢᠨᠢ ᠬᠡᠴᠡᠭᠦᠦ᠂ ᠰᠣᠷᠭᠠᠭᠤᠯᠢ ᠳᠤ ᠪᠠᠨ ᠣᠴᠢᠬᠤ ᠳᠣᠷ᠎ᠠ ᠦᠭᠡᠢ ᠶᠢ ᠶᠠᠭᠠᠬᠢᠶ᠎ᠠ᠂ ᠲᠡᠭᠡᠭᠡᠳ ᠡᠵᠢ ᠳᠤ ᠪᠠᠨ ᠡᠷᠬᠡᠯᠡᠵᠤ᠂ ᠠᠪᠤ ᠳᠤ ᠪᠠᠨ ᠵᠠᠩᠨᠠᠭᠤᠯᠵᠣ ᠪᠠᠶᠢᠭᠰᠠᠨ︕ ᠪᠣᠳᠣᠭᠠᠳ ᠦᠵᠡᠪᠡᠯ ᠬᠦᠭᠡᠷᠦᠬᠦᠢ ᠳ᠋ᠠ᠂ ᠮᠢᠨᠤ ᠨᠢᠭᠡ ᠬᠠᠮᠳᠣ ᠰᠣᠷᠣᠯᠭᠠᠳᠠᠨ ᠪᠠᠶᠢᠷᠢ ᠳᠤ ᠰᠠᠭᠤᠭᠠᠳ ᠨᠢᠭᠡ ᠭᠠᠷᠠᠭ ᠢ ᠳᠠᠭᠠᠭᠠᠭᠰᠠᠨ ᠦᠭᠡᠢ ᠭᠡᠷ ᠪᠠᠨ ᠰᠠᠨᠠᠬᠤ ᠳᠤ ᠪᠠᠨ ᠄ ︽ᠪᠢ ᠲᠡᠰᠬᠦ ᠦᠭᠡᠢ᠂ ᠲᠡᠰᠬᠦ ᠦᠭᠡᠢ︕︾ ᠭᠡᠳ ᠣᠬᠢᠯᠠᠵᠤ ᠪᠠᠶᠢᠭᠰᠠᠨ᠂ ᠲᠡᠭᠡᠭᠡᠳ ᠯᠡ ᠭᠤᠷᠪᠠᠳᠣᠭᠠᠷ ᠡᠳᠦᠷ ᠲᠤ ᠨᠢ ᠣᠷᠣ ᠪᠠᠨ ᠡᠭᠦᠷᠦᠭᠡᠳ ᠭᠡᠷ ᠲᠤ ᠪᠠᠨ ᠬᠠᠷᠢᠴᠢᠬᠠᠭᠰᠠᠨ ᠪᠢᠯᠡ᠃ ᠪᠠᠭᠰᠢ᠂ ᠭᠡᠷ ᠤᠨ ᠠᠬᠠᠮᠠᠳ ᠤᠨ ᠬᠢ ᠨᠢ ᠭᠤᠶᠣᠳᠠᠯ ᠢᠳᠬᠠᠯ ᠴᠣ᠋ ᠶᠠᠮᠠᠷ ᠴᠦ ᠲᠣᠰᠠ ᠪᠣᠯᠣᠭᠰᠠᠨ ᠦᠭᠡᠢ ᠰᠣᠷᠣᠯᠭ᠎ᠠ ᠵᠤᠭᠰᠤᠭᠰᠠᠨ ᠪᠠᠶᠢᠵᠠᠢ᠃ ᠠᠶᠢᠯ ᠭᠡᠷ ᠠᠴᠠ ᠪᠠᠨ ᠰᠠᠶ᠋ᠢ ᠡᠬᠢᠯᠡᠵᠤ ᠰᠠᠯᠵᠣ ᠪᠠᠶᠢᠭ᠎ᠠ ᠬᠡᠣᠬᠡᠳ ᠭᠡᠷ ᠢᠶᠠᠨ ᠰᠠᠨᠠᠬᠤ ᠨᠢ ᠵᠠᠶᠢᠯᠠᠰᠢ ᠦᠭᠡᠢ ᠃ ᠶᠡᠭᠡ ᠬᠦᠮᠦᠨ ᠴᠤ ᠭᠡᠷ ᠨᠤᠲᠤᠭ ᠠᠴᠠ ᠪᠠᠨ ᠰᠠᠯᠵᠤ ᠂ ᠬᠠᠷᠢ ᠭᠠᠵᠠᠷ ᠬᠦᠨᠳᠡᠯᠡᠨ ᠨᠣᠲᠤᠭ ᠲᠤ ᠠᠵᠢᠯᠯᠠᠵᠤ ᠠᠮᠢᠳᠤᠷᠠᠬᠤ ᠦᠶ᠎ᠡ ᠳᠤ ᠭᠡᠷ ᠢᠶᠠᠨ ᠰᠠᠨᠠᠬᠤ ᠶᠢᠨ ᠦᠨᠦᠷ ᠠᠮᠳᠠ ᠠᠮᠲᠠᠯᠠᠭᠳᠠᠳᠠᠭ ᠨᠢ ᠯᠠᠪᠲᠠᠢ ᠃ ᠬᠡᠣᠬᠡᠳ ᠢᠶᠠᠨ ᠬᠠᠷᠠᠬᠠᠨ ᠪᠠᠭ᠎ᠠ ᠠᠴᠠ ᠨᠢ ᠬᠤᠰᠢᠭᠤ ᠠᠶᠢᠮᠠᠭ  ᠤᠨ ᠰᠣᠷᠭᠠᠭᠤᠯᠢ ᠳᠤ ᠬᠦᠷᠭᠡᠵᠤ ᠰᠣᠷᠣᠯᠴᠠᠭᠤᠯᠬᠤ ᠳᠤ᠂ ᠡᠵᠢ ᠠᠪᠤ ᠪᠣᠶᠣ ᠡᠮᠡᠭᠡ ᠡᠪᠦᠭᠡ ᠨᠢ ᠳᠠᠭᠠᠵᠣ ᠰᠠᠭᠤᠵᠤ ᠪᠠᠶᠢᠯ᠎ᠠ ᠴᠣ᠋ ᠲᠡᠳᠡᠨ ᠢ ᠭᠡᠷ ᠨᠤᠲᠤᠭ ᠢᠶᠠᠨ ᠰᠠᠨᠠᠵᠣ ᠦᠭᠡᠢ ᠭᠡᠵᠣ ᠪᠣᠣ ᠪᠤᠳᠤ᠂ ᠬᠡᠣᠬᠡᠳ ᠳᠠᠯᠳᠠ ᠤᠬᠠᠮᠰᠠᠷ ᠢᠶᠠᠷ ᠭᠡᠷ ᠨᠤᠲᠤᠭ ᠢᠶᠠᠨ ᠰᠠᠨᠠᠵᠣ ᠪᠠᠶᠢᠬᠤ ᠶᠢ ᠣᠮᠳᠣᠭᠠᠶᠢᠯᠠᠵᠤ ᠪᠣᠯᠳᠠᠭ ᠦᠭᠡᠢ ᠳ᠋ᠠ︕ ᠲᠡᠷᠡ ᠦᠶ᠎ᠡ ᠳᠤ᠂ ᠪᠢᠳᠡ ᠭᠠᠷᠠᠭ ᠤᠨ ᠰᠡᠭᠦᠯᠴᠢ ᠪᠣᠯᠪᠠᠯ ᠰᠠᠨᠠᠭ᠎ᠠ ᠰᠡᠷᠭᠦᠵᠤ ᠳᠠᠭᠤ ᠦᠨᠳᠤᠷᠳᠡᠳᠡᠭ᠃ ᠶᠠᠭᠤ ᠭᠡᠪᠡᠯ ︿︿᠂᠂᠂ ᠬᠤᠨᠤᠭ ᠲᠤᠭᠤᠯᠤᠭᠠᠳ ᠭᠡᠷ ᠲᠤ ᠪᠠᠨ ᠢᠷᠡᠯ᠎ᠡ﹀﹀ ᠭᠡᠬᠦ ᠳᠠᠭᠤᠣ ᠰᠢᠭ᠋ ᠨᠤᠲᠤᠭ ᠤᠨ ᠵᠠᠮ ᠢᠶᠠᠨ ᠡᠯᠭᠦᠵᠤ ᠂ ᠭᠡᠷ  ᠲᠤ ᠪᠠᠨ ᠬᠠᠷᠢᠵᠤ ᠪᠠᠶᠢᠭᠰᠠᠨ ᠳ᠋ᠠ︕    ︽ᠬᠠᠪᠣᠷ ᠴᠠᠭ ᠨᠢ ᠪᠣᠯᠣᠭᠠᠳ ᠢᠷᠡᠪᠡᠯ ᠬᠠᠭᠳᠠ ᠨᠣᠭᠤᠭ᠎ᠠ ᠨᠢ ᠬᠦᠬᠡᠷᠡᠭᠡᠳ᠂ ᠬᠠᠪᠣᠷᠵᠢᠶᠠᠨ ᠳᠤ ᠪᠠᠨ ᠰᠠᠭᠤᠶ᠎ᠠ ᠭᠡᠯᠠᠢ ᠭᠠᠵᠠᠷ ᠮᠢᠨᠢ ᠬᠤᠯᠠ᠂ ᠨᠤᠲᠤᠭ ᠮᠢᠨᠢ ᠲᠠᠷᠠᠤ ᠪᠠᠶᠢᠨ᠎ᠠ᠂ ᠭᠠᠯᠭᠢᠭᠤᠯᠵᠠᠭᠠᠶ᠎ᠠ ᠪᠢᠳᠡ ᠁︾ ᠲᠡᠶᠢᠮᠦ ᠡ᠂ ᠬᠦᠳᠡᠭᠡ ᠭᠡᠷ ᠠᠴᠠ ᠪᠠᠨ ᠰᠠᠯᠣᠭᠠᠳ ᠬᠠᠮᠢᠭ᠎ᠠ ᠶᠠᠮᠠᠷ ᠭᠠᠵᠠᠷ ᠠᠵᠢᠯᠯᠠᠵᠤ᠂ ᠠᠮᠢᠳᠤᠷᠠᠵᠤ᠂ ᠰᠤᠷᠤᠯᠴᠠᠭᠰᠠᠨ ᠴᠦ ᠪᠣᠷᠣ ᠭᠡᠷ᠂ ᠪᠣᠭᠤᠨᠢ ᠰᠠᠷᠠᠪᠴᠢ ᠮᠢᠨᠢ ᠪᠣᠳᠣᠯ ᠰᠠᠨᠠᠯ ᠢ ᠡᠵᠡᠮᠳᠡᠭᠡᠳ ᠪᠠᠶᠢᠳᠠᠭ︕    ᠲᠡᠶᠢᠮᠦ ᠠᠴᠠ ᠬᠦᠮᠦᠰ ᠦᠰᠴᠦ ᠲᠦᠷᠦᠭᠰᠡᠨ ᠨᠤᠲᠤᠭ ᠢᠶᠠᠨ ᠦᠯᠦᠭᠡᠢ ᠲᠠᠢ ᠵᠦᠢᠷᠯᠡᠳᠡᠭ ᠨᠢ ᠴᠠᠭᠠᠨ᠎ᠠ ᠪᠠᠨ ᠤᠴᠢᠷᠲᠠᠢ ᠠᠵᠢ ᠁    ᠵᠤᠨ ᠤ ᠰᠠᠶᠢᠬᠠᠨ ᠳᠤᠷᠠᠰᠤᠮᠵᠢ ᠳᠤ᠂ ᠵᠦᠢᠯ ᠤᠨ ᠴᠡᠴᠡᠭ ᠨᠢ ᠳᠡᠯᠭᠡᠷᠡᠭᠡᠳ ᠵᠢᠷᠤᠭ ᠰᠢᠭ᠋ ᠪᠣᠯᠣᠭᠠᠳ ᠪᠠᠶᠢᠬᠤ  ᠳᠤ ᠭᠡᠷ ᠲᠤ ᠪᠠᠨ ᠬᠠᠷᠢᠬᠤ ᠶᠢᠨ ᠬᠠᠮᠤᠭ ᠰᠠᠶᠢᠬᠠᠨ ᠳᠤᠷᠠᠰᠤᠯ ᠬᠦᠪᠦᠷᠢᠳᠡᠭ ︕ ᠲᠡᠷᠡ ᠥᠶ᠎ᠡ ᠳᠤ᠂ ᠨᠣᠲᠤᠭ ᠤᠨ ᠮᠢᠨᠢ ᠬᠥᠬᠡ ᠲᠡᠭᠷᠢ ᠳᠤ ᠴᠠᠭᠠᠨ ᠡᠭᠦᠯᠡ ᠰᠣᠪᠤᠷᠠᠵᠤ᠂ ᠬᠦᠳᠡᠭᠡ ᠲᠠᠯ᠎ᠠ ᠳᠤ ᠬᠦᠯᠦᠭ ᠮᠣᠷᠢ ᠳᠠᠪᠬᠢᠨ᠎ᠠ ᠳ᠋ᠠ︕ ᠬᠠᠷᠢᠨ ᠲᠡᠭᠡᠬᠦ ᠪᠠᠷ᠂ ᠲᠤᠨᠤᠷᠡᠮ᠎ᠠ ᠰᠠᠶᠢᠬᠠᠨ ᠡᠲᠦᠷ ᠲᠤᠬᠢᠶᠠᠪᠠᠯ ︽ᠬᠠᠷᠢ ᠳᠤ ᠮᠣᠷᠳᠠᠭᠰᠠᠨ ᠬᠡᠣᠬᠡᠨ ᠲᠥᠷᠬᠦᠮ ᠢᠶᠠᠨ ᠰᠠᠨᠠᠮᠠᠷ ᠡᠳᠦᠷ ᠡ ︾ ᠭᠡᠵᠤ ᠭᠡᠷ ᠨᠣᠲᠤᠭ ᠢᠶᠠᠨ ᠰᠠᠨᠠᠵᠣ ᠮᠥᠷᠦᠭᠡᠳᠦᠭᠰᠡᠨ ᠰᠡᠳᠭᠢᠯᠭᠡ  ᠪᠠᠨ ᠪᠠᠶᠢᠭᠠᠯᠢ ᠤᠷᠴᠢᠨ ᠤ ᠰᠠᠶᠢᠨ ᠰᠠᠶᠢᠬᠠᠨ ᠲᠠᠢ ᠦᠯᠢᠳᠭᠡᠵᠦ ᠬᠡᠯᠡᠳᠡᠭ᠃    ᠨᠠᠮᠣᠷ ᠨᠢ ᠬᠡᠨ ᠨᠢᠭᠡᠨ ᠳᠤ ᠳᠣᠷᠠᠰᠣᠯ ᠮᠦᠷᠦᠭᠡᠳᠦᠯ ᠢ ᠵᠤᠵᠠᠭᠠᠷᠠᠭᠤᠯᠳᠠᠭ᠂ ᠳᠡᠭᠡᠷ᠎ᠡ ᠵᠠᠭᠤᠨ ᠤ ᠨᠠᠶᠠᠭᠠᠳ ᠣᠨ ᠤ ᠳᠤᠮᠳᠠᠴᠢ ᠶᠢᠨ ᠲᠡᠷᠡ ᠨᠠᠮᠣᠷ ᠪᠢ ᠠᠶᠢᠮᠠᠭ ᠠᠯᠣᠰ ᠤᠨ ᠶᠡᠭᠡ ᠰᠣᠷᠭᠠᠭᠤᠯᠢ ᠳᠤ ᠰᠢᠯᠭᠠᠨ ᠣᠷᠣᠵᠣ ᠭᠡᠷ ᠨᠣᠳᠤᠭ ᠠᠴᠠ ᠪᠠᠨ ᠣᠯᠠᠮ ᠵᠠᠶᠢᠳᠠᠭᠤ ᠪᠣᠯᠬᠤ ᠳᠤ᠂ ᠠᠶᠢᠯ ᠭᠡᠷ ᠮᠢᠨᠢ ᠨᠠᠳᠠ ᠳᠤ ᠠᠮᠢᠳᠣᠷᠠᠯ ᠤᠨ ᠲᠦᠰᠢᠭ ᠣᠶᠣᠨ ᠤ ᠬᠦᠨᠡᠰᠦ ᠪᠣᠯᠵᠤ ᠪᠠᠶᠢᠭᠰᠠᠨ ᠶᠣᠮ᠃ ᠢᠯᠠᠩᠭᠤᠶ᠎ᠠ᠂ ᠠᠮᠠᠷᠠᠯᠳᠠ ᠲᠠᠯᠪᠢᠵᠤ ᠭᠡᠷ ᠲᠤ ᠪᠠᠨ ᠬᠠᠷᠢᠬᠤ ᠦᠶ᠎ᠡ ᠳᠤ ᠠᠷᠣ ᠭᠡᠷ ᠤᠨ ᠬᠤᠯᠠᠩ ᠤᠨ ᠣᠲᠤᠭ᠎ᠠ ᠠᠭᠤᠯᠠᠰ ᠤᠨ ᠴᠠᠭᠠᠨᠠᠬᠢ ᠣᠨᠢᠶᠠᠷ ᠢᠶᠠᠷ ᠳᠠᠮᠵᠢᠨ ᠦᠨᠦᠰᠦᠭᠳᠡᠨ ᠮᠡᠳᠡᠷᠡᠭᠳᠡᠵᠤ ᠪᠠᠶᠢᠮᠠᠷᠬᠠᠨ ᠰᠠᠨᠠᠭᠳᠠᠳᠠᠭ᠃ ᠡᠩ ᠳᠡᠯᠡᠬᠡᠢ ᠳᠤ ᠠᠭᠤᠯᠠ ᠲᠠᠯ᠎ᠠ ᠣᠯᠠᠨ ᠣᠯᠠᠨ ᠬᠠᠷᠠᠭᠳᠠᠳᠠᠭ ᠴᠤ ᠠᠪᠤ ᠶᠢᠨ ᠮᠢᠨᠢ ᠪᠠᠷ᠎ᠠ ᠰᠢᠭ᠋ ᠬᠠᠨᠠᠶᠢᠭᠰᠠᠨ ᠨᠤᠲᠤᠭ ᠤᠨ ᠠᠭᠤᠯᠠᠰ ᠨᠢ ᠬᠤᠯᠠ ᠶᠢᠨ ᠬᠤᠯᠠ  ᠳᠤ ᠪᠠᠨ ᠲᠡᠷᠭᠡᠯ ᠬᠠᠷᠠᠭᠳᠠᠯ ᠲᠠᠢ ᠶᠢ ᠶᠠᠭᠠᠬᠢᠶ᠎ᠠ︕ ᠥᠩ ᠶᠢᠷᠲᠢᠨᠴᠣ ᠳᠤ ᠭᠤᠣᠯ ᠮᠦᠷᠡᠨ ᠰᠠᠶ᠎ᠠ ᠵᠢᠸ᠎ᠠ ᠣᠷᠣᠰᠳᠠᠭ᠂ ᠭᠡᠶ᠎ᠡ ᠡᠵᠢ ᠶᠢᠨ ᠮᠢᠨᠢ ᠰᠠᠷᠠᠪᠴᠢᠯᠠᠭ᠎ᠠ ᠳᠤ ᠬᠤᠴᠣᠷᠣᠭᠰᠠᠨ ᠲᠡᠷᠡ ᠭᠤᠣᠯ ᠰᠢᠭ᠋ ᠴᠡᠩᠬᠡᠷ ᠬᠠᠷᠠᠭᠳᠠᠮᠠᠷ ᠦᠭᠡᠢ ᠶᠢ ᠡᠶᠢᠶ᠎ᠡ︕    ᠲᠡᠷᠡ ᠨᠢᠭᠡ ᠠᠮᠠᠷᠠᠯᠳᠠ ᠶᠢᠨ ᠣᠴᠢᠷ ᠨᠢ ᠨᠠᠳᠠ ᠳᠤ ᠶᠡᠷᠦ ᠨᠢ ᠮᠠᠷᠳᠠᠭᠳᠠᠰᠢ ᠦᠭᠡᠢ ᠭᠦᠨ ᠰᠠᠭᠤᠭᠳᠠᠯ ᠦᠯᠡᠳᠡᠵᠠᠢ᠃ ᠪᠢ᠂ ᠮᠠᠰᠢᠨ ᠲᠡᠷᠭᠡᠨ ᠠᠴᠠ ᠪᠠᠭᠤᠵᠣ ᠨᠣᠳᠤᠭ ᠤᠨ ᠰᠢᠷ᠎ᠠ ᠵᠠᠮ ᠢᠶᠠᠨ ᠡᠯᠭᠦᠵᠤ᠂ ᠭᠡᠷ ᠵᠦᠭ  ᠢᠶᠠᠨ ᠴᠢᠨᠡᠭᠡ ᠮᠡᠳᠡᠨ ᠠᠯᠬᠤᠵᠣ ᠪᠠᠶᠢᠬᠤ ᠳᠤ ᠲᠡᠷᠳᠡᠭᠡ ᠡᠷᠭᠢ ᠠᠴᠠ ᠵᠢᠭᠢᠳᠡᠯ᠎ᠡ ᠰᠣᠨᠣᠯᠵᠠᠭᠠᠳ ᠢᠷᠡᠬᠦ ︽ᠰᠢᠷᠭᠠᠯ ᠠᠷᠰᠯᠠᠨ︾ ᠮᠢᠨᠢ ᠬᠠᠮᠤᠭ ᠠᠴᠠ ᠡᠮᠦᠨ᠎ᠡ ᠨᠠᠮ᠎ᠠ ᠶᠢ ᠣᠭᠳᠣᠨ ᠠᠪᠴᠣ᠂ ᠬᠤᠶᠠᠷ ᠬᠠ ᠪᠠᠨ ᠡᠷᠭᠦᠰᠭᠢᠨ ᠭᠠᠷ ᠬᠦᠯ᠂ ᠬᠠᠴᠠᠷ ᠨᠢᠭᠤᠷ ᠢ ᠦᠨᠦᠰᠦᠨ ᠳᠣᠯᠢᠶᠠᠵᠣ ︽ᠬᠠᠯᠠᠭᠤᠨ ᠢᠶᠠᠷ ᠣᠭᠳᠣᠵᠣ ᠪᠠᠶᠢᠬᠤ︾ ᠰᠡᠳᠭᠢᠯᠭᠡ ᠪᠠᠨ ᠢᠯᠡᠳᠭᠡᠵᠤ ᠯᠡ ᠪᠠᠶᠢᠭᠰᠠᠨ᠃ ᠭᠡᠬᠦ ᠳᠤ ᠪᠠᠨ ᠬᠤᠶᠢᠭᠤᠷ ᠣᠷᠳᠣᠭᠤᠷ ᠡᠷᠭᠢᠴᠡᠵᠤ ᠠᠶᠢᠯ ᠵᠦᠭ ᠭᠦᠶᠦᠨ᠎ᠡ᠂ ᠳᠠᠬᠢᠭᠠᠳ ᠮᠢᠨᠣ ᠵᠦᠭ ᠭᠦᠶᠦᠨ᠎ᠡ᠂ ᠳᠠᠬᠢᠭᠠᠳ ᠯᠡ ᠭᠡᠷ ᠵᠦᠭ ᠭᠦᠶᠦᠨ᠎ᠡ ᠂ ᠬᠦᠭᠡᠷᠦᠬᠦᠢ᠂ ᠨᠠᠮ᠎ᠠ ᠶᠢ ᠢᠷᠡᠵᠠᠢ ᠭᠡᠵᠣ ᠭᠡᠷ ᠤᠨ ᠬᠦᠮᠦᠰ ᠲᠤ ᠴᠢᠮᠡᠭᠡ ᠳᠠᠮᠵᠢᠭᠤᠯᠵᠤ ᠪᠠᠶᠢᠭᠰᠠᠨ ᠪᠣᠯᠣᠯᠲᠠᠢ︕ ᠶᠣᠰᠣᠲᠠᠢ ᠭᠡᠷ  ᠲᠤ ᠪᠠᠨ ᠪᠤᠴᠠᠬᠤ ᠰᠡᠳᠭᠢᠯᠭᠡ ᠂ ᠡᠯᠢᠭᠡᠨ ᠰᠠᠲᠦᠨ ᠂ ᠨᠣᠲᠤᠭ ᠤᠨ ᠪᠦᠬᠦᠢ ᠶᠠᠭᠤᠮ᠎ᠠ ᠨᠢ ᠢᠵᠢᠯᠢᠳᠦᠨ ᠠᠭᠤᠰᠤᠯᠴᠠᠭᠰᠠᠨ ᠪᠠᠶᠢᠳᠠᠭ︕    ᠡᠪᠦᠯ ᠨᠢ ᠬᠦᠮᠦᠨ ᠳᠤ ᠳᠤᠯᠠᠭᠠᠬᠠᠨ ᠪᠠᠭᠤᠴᠠ ᠶᠢ ᠡᠷᠢᠭᠳᠡᠭᠦᠯᠦᠨ᠎ᠡ᠃ ᠰᠦᠨᠢ ᠶᠢᠨ ᠲᠡᠭᠷᠢ ᠳᠤ ᠠᠯᠣᠰ ᠤᠨ ᠣᠳᠣᠳ ᠭᠢᠯᠠᠯᠵᠠᠬᠤ ᠨᠢ ᠶᠠᠭ ᠨᠤᠲᠤᠭ ᠢ ᠴᠢᠨᠢ ᠮᠠᠨᠠᠵᠤ ᠦᠭᠴᠦ ᠪᠠᠶᠢᠨ᠎ᠠ ᠰᠢᠭ᠋ ᠶᠤᠮ᠃ ᠠᠷᠣ ᠭᠡᠷ ᠠᠴᠠ ᠪᠠᠨ ᠲᠤᠰᠠᠭᠠᠷᠯᠠᠵᠤ᠂ ᠠᠵᠢᠯ ᠠᠮᠢᠳᠣᠷᠠᠯ ᠢᠶᠠᠨ ᠠᠰᠲᠠᠭᠠᠨ ᠲᠣᠳᠣᠮᠳᠠᠬᠤ ᠪᠣᠯᠣᠭᠰᠠᠨ ᠨᠠᠳᠠ ᠳᠤ ᠡᠵᠢ ᠶᠢᠨ ᠮᠢᠨᠢ ᠴᠢᠨᠠᠭᠰᠠᠨ ᠬᠠᠯᠠᠭᠤᠨ ᠴᠠᠢ ᠨᠡᠩ ᠠᠮᠲᠠᠲᠠᠢ ᠰᠠᠨᠠᠭᠳᠠᠬᠤᠢ᠂ ᠠᠪᠤ ᠶᠢᠨ ᠮᠢᠨᠢ ᠬᠤᠪᠢᠩ ᠲᠠᠢ ᠠᠷᠢᠬᠢᠨ ᠳᠤ ᠣᠯᠠᠮ ᠰᠢᠮᠡᠲᠡᠢ ᠰᠣᠭᠲᠣᠭᠤᠷᠬᠤᠢ ︕    ︽ᠠᠪᠦ ᠶᠢᠨ ᠳᠠᠭᠤᠣ ᠶᠢ ᠡᠭᠡᠰᠢᠭᠯᠡᠵᠦ    ᠭᠡᠷ ᠲᠤ ᠪᠠᠨ ᠬᠠᠷᠢᠮᠠᠷ ᠰᠠᠨᠠᠭᠳᠠᠭᠠᠳ ᠪᠠᠶᠢᠨ᠎ᠠ    ᠠᠯᠣᠰ ᠤᠨ ᠴᠡᠩᠬᠡᠷ ᠬᠠᠶᠠᠭ᠎ᠠ ᠶᠢ ᠴᠢᠭᠯᠡᠭᠡᠳ    ᠭᠡᠷ ᠲᠤ ᠪᠠᠨ ᠬᠠᠷᠢᠮᠠᠷ ᠪᠣᠳᠤᠭᠳᠠᠭᠠᠳ ᠪᠠᠶᠢᠨ᠎ᠠ    ᠠᠢ ᠳ᠋ᠠ ᠨᠤᠲᠤᠭ ᠮᠢᠨᠢ ᠁ ︾ ᠭᠡᠬᠦ ᠳᠠᠭᠤᠣ ᠶᠢ ᠠᠶᠠᠯᠭᠤᠯᠠᠮᠠᠷ ᠳ᠋ᠠ︕    ᠨᠢᠳᠤᠨᠤᠨ ᠵᠢᠯ ᠳᠤ ᠪᠢ ᠵᠣᠷᠰᠢᠯ ᠶᠣᠰᠤᠭᠠᠷ ᠭᠡᠷ ᠪᠦᠯᠢ ᠪᠠᠨ ᠠᠪᠴᠤ ᠨᠣᠳᠤᠭ ᠲᠤ ᠪᠠᠨ ᠬᠠᠷᠢᠵᠤ ᠭᠡᠷ  ᠲᠤ ᠪᠠᠨ ᠰᠢᠨᠡᠯᠡᠬᠦ ᠪᠠᠷ ᠢᠷᠡᠵᠣ ᠪᠢᠯᠡ᠃ ᠨᠠᠮ ᠤᠨ ᠬᠤᠷᠢᠳᠤᠭᠠᠷ ᠶᠡᠭᠡ ᠬᠤᠷᠠᠯ ᠤᠨ ᠵᠣᠷᠢᠭ ᠰᠠᠨᠠᠭ᠎ᠠ ᠶᠢᠨ ᠲᠤᠶᠠᠭᠠᠯᠠᠯ ᠢᠶᠠᠷ᠂ ᠨᠤᠲᠤᠭ ᠮᠠᠨᠢ ᠬᠦᠭᠵᠢᠨ ᠰᠢᠨᠡᠲᠦᠵᠦ᠂ ᠨᠤᠲᠤᠭ ᠤᠨ ᠬᠦᠮᠦᠰ ᠤᠨ ᠠᠮᠢᠳᠤᠷᠠᠯ ᠵᠣᠯ ᠵᠢᠷᠭᠠᠯ ᠢᠶᠠᠷ ᠪᠢᠯᠬᠠᠨ᠎ᠠ᠃ ᠮᠠᠨ ᠤ ᠬᠢᠨ ᠴᠦ ᠦᠩᠰᠢᠭ ᠠᠮᠢᠳᠤᠷᠠᠯ ᠢ ᠡᠳ᠋ᠯᠡᠵᠦ᠂ ᠬᠦᠭᠵᠢᠯ ᠤᠨ ᠰᠠᠶᠢᠨ ᠰᠠᠶᠢᠬᠠᠨ ᠢ ᠬᠦᠷᠲᠡᠭᠰᠡᠨ ᠪᠠᠶᠢᠯ᠎ᠠ᠃ ᠭᠠᠳᠠᠨ᠎ᠠ ᠠᠴᠢ ᠵᠢᠭᠡ ᠬᠡᠣᠬᠡᠳ ᠫᠣᠣᠵᠢᠩ ᠲᠠᠯᠪᠢᠵᠣ ᠣᠶᠢᠮᠠᠯᠳᠣᠨ᠎ᠠ᠂ ᠠᠪᠤ ᠮᠢᠨᠢ ᠵᠣᠬᠠᠨ ᠲᠣᠭᠤᠭᠠᠨ ᠳᠤ ᠪᠠᠨ ᠬᠤᠨᠢᠨ ᠮᠢᠬ᠎ᠠ ᠪᠠᠨ ᠪᠣᠴᠠᠯᠭᠠᠨ᠎ᠠ᠂ ᠡᠵᠢ ᠮᠢᠨᠢ ᠵᠣᠴᠢᠳ ᠤᠨ ᠦᠷᠦᠭᠡᠨ  ᠳᠤ ᠪᠠᠨ ᠴᠠᠭᠠᠨ ᠢᠳᠡᠭᠡ ᠪᠠᠨ ᠦᠷᠦᠨ᠎ᠡ᠃ ᠠᠨᠢᠶ᠎ᠠ ᠮᠢᠨᠢ ᠭᠡᠷ ᠲᠤ ᠵᠣᠴᠢᠨ ᠢᠶᠠᠷ ᠰᠠᠭᠠᠲᠠᠭ᠎ᠠ ᠨᠣᠳᠤᠭ ᠤᠨ ᠬᠡᠳᠦᠨ ᠪᠣᠭᠤᠷᠣᠯ ᠳᠤ ᠬᠦᠬᠦᠦᠷ ᠭᠠᠩᠰᠠ ᠣᠶᠢᠷᠠᠲᠤᠭᠤᠯᠤᠨ ᠬᠠᠭᠤᠴᠢ ᠬᠦᠭᠡᠷᠬᠦ ᠳᠤ ᠨᠢ ᠬᠦᠭ ᠨᠡᠮᠡᠨ᠎ᠡ᠃ ᠰᠢᠨ᠎ᠡ ᠵᠢᠯ ᠴᠠᠭᠠᠨ ᠰᠠᠷ᠎ᠠ ᠪᠠᠨ ᠣᠭᠳᠣᠬᠤ ᠳᠤ ᠪᠠᠨ ᠪᠦᠬᠦ ᠭᠡᠷ ᠢᠶᠠᠷ ᠢᠶᠠᠨ ᠬᠠᠮᠳᠣ ᠶᠢᠨ ᠪᠣᠳᠠᠭ᠎ᠠ ᠢᠳᠡᠬᠦ ᠨᠢ ᠨᠢᠭᠡ ᠭᠡᠷ ᠪᠦᠯᠢ ᠶᠢᠨ ᠬᠠᠯᠠᠭᠤᠨ ᠳᠣᠯᠠᠭᠠᠨ᠂ ᠬᠠᠮᠤᠭ ᠵᠦᠢᠯ ᠪᠦᠷᠢᠨ ᠪᠦᠳᠣᠨ ᠵᠣᠯ ᠵᠢᠷᠭᠠᠯ ᠲᠠᠢ ᠪᠠᠶᠢᠬᠤ ᠶᠢ ᠬᠠᠷᠠᠭᠤᠯᠵᠣ ᠪᠦᠬᠦ᠋ᠢᠯᠡ ᠴᠠᠭ ᠦᠶ᠎ᠡ ᠶᠢᠨ ᠪᠣᠯᠪᠠᠰᠣᠨ ᠪᠠᠶᠢᠯᠲᠠᠢ ︕    ᠲᠡᠶᠢᠮᠦ ᠠᠴᠠ᠂ ᠰᠢᠨᠡᠯᠡᠬᠦ ᠣᠶᠢᠷᠠᠲᠣᠭᠰᠠᠭᠠᠷ ᠯᠡ ᠨᠣᠲᠤᠭ ᠨᠣᠳᠤᠭ ᠤᠨ ᠰᠢᠷ᠎ᠠ ᠵᠠᠮ ᠨᠢ ᠲᠡᠳᠡᠭᠡᠷ ᠰᠠᠶ᠎ᠠ ᠵᠢᠸ᠎ᠠ ᠬᠦᠴᠦᠨ ᠤ ᠠᠵᠢᠯᠳᠡᠳ᠂ ᠰᠠᠷ᠎ᠠ ᠵᠢᠯ ᠢᠶᠠᠷ ᠭᠠᠳᠠᠭᠰᠢ ᠶᠠᠪᠣᠬᠤ ᠠᠯᠪᠠᠳᠠᠨ ᠪᠠ ᠠᠶᠠᠨᠴᠢᠳ ᠢᠶᠠᠨ ︿︿ᠭᠡᠷ  ᠲᠤ ᠪᠠᠨ ᠬᠠᠷᠢᠵᠣ ᠢᠷᠡᠬᠦ ᠶᠢ ᠴᠢᠨᠢ ᠣᠭᠳᠣᠵᠣ ᠪᠠᠶᠢᠨ᠎ᠠ︕﹀﹀ ᠭᠡᠵᠤ ᠦᠭᠡᠳᠡ ᠠᠴᠠ ᠨᠢ ᠦᠰᠦᠭ ᠳᠣᠷᠠᠶᠢᠵᠣ ᠦᠭᠭᠦᠨ᠎ᠡ᠂ ᠲᠡᠭᠡᠭᠡᠳ ᠯᠠ ᠦᠶᠡᠷ ᠤᠨ ᠣᠷᠣᠰᠬᠠᠯ ᠮᠡᠳᠣ ᠵᠠᠮ ᠪᠠᠭᠳᠠᠮ᠎ᠠ ᠦᠭᠡᠢ ᠭᠡᠷ ᠨᠣᠳᠤᠭ ᠲᠤ ᠪᠠᠨ ᠪᠣᠴᠠᠬᠤ ︽ᠬᠦᠮᠦᠨ ᠤ ᠳᠠᠪᠠᠯᠭᠠᠨ︾ ᠨᠤᠲᠤᠭ ᠤᠨ ᠢᠶᠠᠨ ᠵᠠᠮ ᠢᠶᠠᠷ ᠢᠪᠡᠷᠡᠨ᠎ᠡ ᠳ᠋ᠠ︕    ᠢᠢᠮᠦ ᠠᠴᠠ ᠂ ᠬᠦᠮᠦᠨ ᠪᠣᠯᠭᠠᠨ ᠭᠡᠷ ᠨᠣᠲᠤᠭ ᠢᠶᠠᠨ ᠰᠠᠨᠠᠬᠤ ᠶᠢᠨ ᠰᠡᠳᠭᠢᠯᠭᠡ ᠨᠢ ᠨᠡᠶᠢᠯᠡᠬᠦ ᠠᠴᠠ ᠶᠡᠷᠦ  ᠨᠢ ᠨᠠᠶᠢᠷ ᠤᠨ ᠰᠢᠷᠡᠭᠡ ᠠᠴᠠ ᠄    ︽ᠠᠳᠤᠭᠤ ᠮᠠᠯ ᠲᠠᠢ ᠬᠦᠳᠡᠭᠡ ᠳᠤ ᠪᠠᠨ ᠬᠠᠷᠢᠶ᠎ᠠ    ᠠᠶᠢᠷᠠᠭ ᠰᠦ ᠲᠠᠢ ᠭᠡᠷ ᠲᠤ ᠪᠠᠨ ᠬᠠᠷᠢᠶ᠎ᠠ    ᠠᠮᠢ ᠨᠢᠭᠡᠲᠠᠢ ᠠᠶᠢᠮᠠᠭ ᠰᠠᠲᠣᠨ ᠢᠶᠠᠷ ᠢᠶᠠᠨ    ᠠᠶᠠᠯᠠᠵᠤ ᠲᠤᠭᠤᠷᠢᠵᠤ ᠶᠠᠪᠣᠶ᠎ᠠ ᠳ᠋ᠤᠤ    ᠭᠡᠷ ᠲᠤ ᠪᠠᠨ ᠬᠠᠷᠢᠶ᠎ᠠ    ᠭᠡᠷ ᠲᠤ ᠪᠠᠨ ᠬᠠᠷᠢᠶ᠎ᠠ ᠁ ︾    ᠭᠡᠵᠦ ᠳᠠᠭᠤᠯᠠᠵᠠᠭᠠᠬᠤ ᠨᠢ ᠰᠣᠨᠣᠷᠲᠠᠨ᠎ᠠ ᠳ᠋ᠠ︕    ᠵᠠᠮ ᠪᠣᠯᠭᠠᠨ ᠤ ᠳᠣᠮᠳᠠ ᠠᠴᠠ ᠨᠤᠲᠤᠭ ᠤᠨ ᠵᠠᠮ ᠵᠠᠮ ᠪᠣᠯ ᠬᠠᠮᠤᠭ ᠤᠨ ᠣᠶᠢᠷ᠎ᠠ ᠪᠠᠶᠢᠳᠠᠭ᠂ ᠳᠣᠷᠠᠰᠣᠯ ᠮᠦᠷᠦᠭᠡᠳᠦᠯ ᠪᠦᠬᠦᠨ ᠳᠤ ᠨᠣᠲᠤᠭ ᠢᠶᠠᠨ ᠰᠠᠨᠠᠬᠤ ᠰᠡᠳᠭᠢᠯᠭᠡ ᠪᠣᠯ ᠬᠠᠮᠤᠭ ᠠᠴᠠ ᠭᠦᠨ ᠪᠠᠶᠢᠳᠠᠭ ᠰᠠᠨ︕
ᠢᠷᠡᠯᠲᠡ᠄ ᠦᠪᠤᠷ ᠮᠤᠩᠭᠤᠯ ᠤᠨ ︽ᠨᠡᠶᠢᠬᠡᠮ︾ ᠰᠡᠳᠬᠦᠯ